Бул — мен

Ишкирнелик ғәрез-тилегиң,
(Бәлким таза емес пәлегиң),
Жарылып кетсе де жүрегиң,
Бул — Мен!

Бул дүнья әзелий бири кем,
Сөзлер көп қабақтай шириген,
Жараландым, бирақ тиримен,
Бул — Мен!

Өсек деген ашыл дәстүрхан,
Гилкий көпеклерди мәс қылған,
Көкте қудайы бар қасқырман,
Бул — Мен!

Нангөректей туқымың молдан,
Шыға бердиң кес-кеслеп жолдан,
Ийтке ийт өлими — мәрди майдан,
Бул — Мен!

Үре бер сен, үрип заўық ал,
Азғырсаң кетектен таўық ал,
Тезирек өзиңди таўып ал,
Бул — Мен!

Аллаяр Дарменов,
14.01.2025.

@Allayar_Darmenov