РАШК КАСАЛИ...

Қўнғироқлар қилмай қўйдим,
Менсизликка ўрган дедим.
Ахир кунлар ботиши бор,
Кунсизликка ўрган дедим.

Ўз рашкимдан ўзим тўйдим,
Ҳар не кўрсам сенга йўйдим,
Кўзларимни силаб қўйдим,
Кўзларингни кўрган дедим.

Нима қилай, ёниб турсам,
Рашк касалман, энди билсам,
Ёнингда бир қизни кўрсам:
"Шу қиз билан юрган", дедим.

Ғийбатчилар raп қилдилар,
Пок номимни чап қилдилар,
Мийиғида кулиб секин,
«Ким у менга ҳурган» дедим.

Кўзга сурма суриб юрма,
Ҳар нарсани кўриб юрма,
Ишқи йўқни уриб юрма,
Ўзи Худо урган дедим.

Нима қилай ёмон севсам,
Юз ўгириб юзин кўрсам,
Мендан юзин ўгурганни,
Менга юзин бурган дедим.

Эй ишқдан ҳеч саводи йўқ,
Савол берсам жавоби йўқ,
Сени ҳеч кимга бермайман,
Сени Худо берган дедим.

2006 йил
© Гулжамол Асқарова
https://t.me/Adabiyot_olami