ToshDO‘TAU AXBOROT-RESURS MARKAZI

Aziz hamkasblar, qadrli talabalar!
Xalqimizda Navro‘z yangi yilning boshi, ezgu ishlarning avvali sifatida e'tirof etiladi. Ayniqsa, bu yil Navro‘zni har yilgidan ko‘proq kutdik. Sababi, barokatli Navro‘z muborak Ramazon oyiga to‘g‘ri keldi. Bu ham ezgu niyatlarning uyg‘unligi, yilning xayrli boshlanayotganidan darakdir.
Navro‘z Yangi O‘zbekistonda yangicha ruh, yangicha ko‘tarinkilik bilan nishonlanmoqda. Davlatimiz rahbari boshchiligida Uchinchi Renessans poydevori mustahkam qurilmoqda va bu jarayonga barchamiz o‘z hissamizni qo‘shmoqdamiz.
Bugungi kunda yana bir quvonarli voqea bilan sizlarni tabriklashdan mamnunman. Alisher Navoiy nomidagi Toshkent davlat oʻzbek tili va adabiyoti universiteti xalqaro akademik hamjamiyat tomonidan tan olindi va ilk bor QS World University Rankings 2025 reytingiga kiritildi. Universitetimiz “Modern Languages” (Zamonaviy tillar) yoʻnalishi boʻyicha dunyoning yetakchi oliy taʼlim muassasalari qatoridan joy egallab, 301-350 natijani qayd etdi. Bu ulkan yutuq nafaqat universitetimiz, balki butun Oʻzbekiston uchun faxr va iftixor manbaidir.
Sharqiy yangi yilning boshlanishi – Navro‘z barchamizga qutlug‘ bo‘lsin. Zimmamizdagi mas'uliyatli vazifalarni bajarishda hamjihatlik va kuch-g‘ayrat bizlarni aslo tark etmasin.
Navro‘z bayrami munosabati bilan sizlarni chin qalbdan tabriklayman. Bu ulug‘ bayram barchamiz uchun baxt, tinchlik, sog‘lik va omadlar keltirsin. Oilangizda totuvlik, faoliyatingizda rivoj, yurtimizda tinchlik va farovonlik hukm sursin. Universitetimizning milliy va xalqaro miqyosdagi muvaffaqiyatlari bardavom boʻlsin!

Hurmat bilan,
Shuhrat Sirojiddinov
Alisher Navoiy nomidagi Toshkent davlat oʻzbek tili va adabiyoti universiteti rektori, akademik.

🟠🟠🟠🟠
ToshDOʻTAU ilk bor QS reytingiga kirdi!

Alisher Navoiy nomidagi Toshkent davlat oʻzbek tili va adabiyoti universiteti (ToshDOʻTAU) xalqaro akademik hamjamiyat tomonidan tan olindi va ilk bor QS World University Rankings 2025 reytingiga kiritildi. Universitet “Modern Languages” (Zamonaviy tillar) yoʻnalishi boʻyicha dunyoning yetakchi oliy taʼlim muassasalari qatoridan joy egallab, 301-350 natijani qayd etdi.
Mazkur reyting akademik nufuz (academic reputation), ish beruvchilarning fikri (employer reputation), ilmiy maqolalar (research output) va xalqaro tadqiqot hamkorliklari (international research collaborations) kabi muhim ko‘rsatkichlar asosida shakllantirilgan bo‘lib, ToshDOʻTAU ushbu mezonlar bo‘yicha yetarli salohiyatga ega ekanligini isbotladi.
E’tiborlisi, ushbu yoʻnalishda Oʻzbekistondan atigi ikki oliy taʼlim muassasasi reytingga kiritilgan, ulardan biri ToshDOʻTAU bo‘lib, bu universitetning global miqyosda taʼlim va tadqiqot sohasidagi rolini mustahkamlashga xizmat qiladi.
Mazkur natija universitetning ilmiy-tadqiqot faoliyatini rivojlantirish, xalqaro standartlarga mos taʼlim dasturlarini ishlab chiqish va akademik hamkorlikni kengaytirish borasidagi strategiyasining samarali natijasi sifatida eʼtirof etilishi mumkin. ToshDOʻTAU xalqaro miqyosdagi mavqeini yanada mustahkamlash maqsadida ilmiy izlanishlarni kuchaytirish, professor-o‘qituvchilarning ilmiy nashr faolligini oshirish va talabalarning global akademik hamjamiyatga integratsiyasini taʼminlashga alohida eʼtibor qaratmoqda.

Batafsil maʼlumot: QS World University Rankings 2025: Modern Languages.

👍 Bizni tarmoqlarda kuzating👇

Telegram / Facebook / Instagram/ Twitter

Muhtarama ayollar, aziz opa-singillar, talaba qizlar!

Tabiat uyg‘onishi, bahorning musaffo nafaslari bilan kirib kelgan 8-mart – Xalqaro xotin-qizlar kuni barchamiz uchun eng ezgu va qadrli bayramlardan biridir. Shu munosabat bilan sizlarni chin qalbimdan samimiy muborakbod etaman!
Bugun yurtimizda xotin-qizlarning jamiyatdagi o‘rni va nufuzini yuksaltirish, ularni har tomonlama qo‘llab-quvvatlash davlat siyosati darajasiga ko‘tarilgan. Prezidentimiz ta’kidlaganlaridek, Uchinchi Renessans poydevorini barpo etishda ayollarimizning donishmandligi, mehnatsevarligi va bunyodkorlik salohiyati muhim o‘rin tutadi.
Universitetimiz jamoasida faoliyat yuritayotgan opa-singillarimiz va talaba qizlarimiz ilm-fan, ta’lim va jamiyat taraqqiyotiga munosib hissa qo‘shib kelmoqdalar. Biz sizlarning fidokorona mehnatingiz va yuksak intellektual salohiyatingiz bilan doimo faxrlanamiz. Ayniqsa, bayram arafasida universitetimiz tayanch doktoranti Rushanaxon Zaripovaning “Zulfiya” nomidagi davlat mukofoti bilan taqdirlangani barchamiz uchun katta iftixordir.
Sizlarning mehribon qalbingiz, oqilona qarorlaringiz, mehnatga bo‘lgan sadoqatingiz jamiyatimiz taraqqiyotiga xizmat qiladi.
Barchangizga mustahkam sog‘lik, baxt va oilaviy farovonlik tilayman. Yashnagan bahor fasli sizlarga faqat ezgulik, shodlik va baxt olib kelsin!

Shuhrat Sirojiddinov
Alisher Navoiy nomidagi ToshDOʻTAU rektori, akademik