Qadrli hamkasblar va aziz talabalar! Sizlarni va yurtimizdagi barcha mo‘min-musulmonlarni mehr-oqibat, ezgulik va saxovat ayyomi – muborak Qurbon hayiti bilan chin qalbimdan samimiy tabriklayman.
Bu qutlug‘ bayramda hammamiz, avvalo, shunday fayzli va barokatli kunlarga yetkazgani uchun Alloh taologa cheksiz shukronalar aytamiz.
Albatta, biz o‘z diniy qadriyatlarimizni ulug‘lab, e’zozlab yashar ekanmiz, hozirgi yuksak texnologiyalar asrida mustahkam imon-e’tiqod bilan birga zamonaviy ilm-fan, kasb-hunarlar, xorijiy tillarni puxta egallash, innovatsiyalar sohasidagi yutuqlarni chuqur o‘zlashtirish, yoshlarimizni milliy va umuminsoniy qadriyatlar ruhida tarbiyalash barqaror taraqqiyotga erishishning eng muhim sharti ekanini yaxshi tushunamiz. Shu ma'noda Alisher Navoiy nomidagi Toshkent davlat o‘zbek tili va adabiyoti universitetida yo‘lga qo‘yilgan ta'lim va tarbiya mexanizmi millat taraqqiyotiga daxldor ekanini chuqur his qilamiz. Bizning kichik, ammo oldiga katta maqsadlarni qo'ygan jamoamiz, ilg‘or va tashabbuskor talabalarimiz bugun nafaqat mamlakatimizda, balki jahonda ham o‘zining nimaga
qodir ekanini namoyish eta oldi. Yaqindagina e'lon qilingan Times Higher Education xalqaro reyting kompaniyasi natijalariga ko‘ra universitetimiz dunyoning TOP-300+ , gender tengligini ta’minlash boʻyicha kuchli oʻnta universitetlar qatoridan o‘rin egallagani bizga faxr bilan birga katta mas'uliyat ham bag'ishlaydi. Negaki, endi biz xalqaro jamoatchilik nazariga tushdik, natijani yana-da yaxshilash majburiyatini oldik. Bu yo‘lda biz, shubhasiz, universitetimizning pedagogik jamoasiga va rektorat vakillariga hamda tashabbuskor talabalarimizga tayanamiz.
Barchangizni muqaddas Qurbon hayiti bilan tabriklayman. Ezgu ishlarimiz, intilishlarimizda Yaratgan Egamning O‘zi madadkor bo‘lsin!
Shuhrat Sirojiddinov
Alisher Navoiy nomidagi Toshkent davlat o‘zbek tili va adabiyoti universiteti rektori, akademik
