Zafarbek Solijonov

Газ ўрнига электрдан фойдаланиш экология учун ҳам муҳим

Алишер Қодировнинг кўп қаватли уйларда газдан электрга ўтиш кераклиги ҳақидаги таклифи кўпчиликнинг негатив муносабатига сабаб бўлди. Лекин Экопартия аъзолари муносабат билдиришдан олдин таҳлил қилиб кўриш кераклигини айтмоқда.

Хусусан, Жавлон Абдуллаев Қодировнинг таклифида қайта тикланувчи муқобил энергияга ўтиш кераклиги назарда тутилганини қайд этган. Унинг фикрича, чекланган ресурслар тақчиллиги муттасил ўсиб бораётгани сабаб олдимизда бундан бошқа оқилона йўл йўқ.

Депутат Ойбек Раҳимов ҳам Қодировнинг таклифини таҳлил қилиб, газдан воз кечиш электр таннархи пасайишига ҳам сабаб бўлиши мумкинлигини билдирган.

"Масалани чуқур таҳлил қиладиган бўлсак, аслида гап мамлакатимизда “яшил” энергияни ривожлантириш, шу орқали иқлим ўзгариши каби салбий оқибатларни камайтириш, қуёш, шамол, сув каби қайта тикланувчи манбалар орқали ҳосил қилинадиган энергия турларидан фойдаланишдадир", дейди партия аъзоси.

👉 @Zafarbek_Solijonov

Саудия Арабистони мадҳиясини қайтадан ёзмоқда. Нега?

Куни кеча мамлакат мадҳиянинг янги мусиқаси Ҳанс Зиммер томонидан басталаниши эълон қилинди. Саудия сиёсатини кузатмайдиган одам учун бу шунчаки бой арабларнинг навбатдаги олифтагарчилигидай кўриниши мумкин, лекин аслида бу қарор Салмоннинг 10 йиллик режасидаги қадамлардан бири.

Гап шунда-ки, Қирол Салмон Саудия Арабистонида улкан ислоҳотлар ўтказмоқда. У 2016 йилда Saudi Vision 2030 лойиҳасини эълон қилган. Бу нима дегани? Бу 2030 йилгача Саудия Арабистонини тўлиқ янги жамият ва давлатга трансформация қилишни англатади. Иқтисодиёти нефтга таянмайдиган, туризмнинг ва халқаро кўнгилочар тадбирларнинг маркази бўлган давлатга ўтиш. Шу давргача кўп ишлар қилинди.

Туризм учун 1 трлн доллардан кўпроқ маблағ ажратилиб, мамлакатнинг турли хил ҳудудларида туристлар учун масканлар қурилди. Масалан, Франсия билан ҳамкорликда ташкил этилган Ал-Ула воҳаси улардан бири. 35 йиллик таъқиқдан сўнг 2018 йилда Ар-Риёдда кинотеатр қайта очилди ва ҳозирда уларнинг сони 50 дан ортган. Яқин йилларда Макка ва Мадина ҳам кинотеатр қурилиши эълон қилинган.

Умрага келувчилар сонини йилига 8 миллиондан 30 миллионга чиқариш учун “Smart Mecca” лойиҳаси эълон қилинган. Лойиҳага 36 миллиард доллар ажратилган ва шаҳарда турли хил меҳмонхоналар, парклар, савдо марказлари қурилиши режалаштирилган. Бундан ташқари, 18 километрлик 9 та бекатдан иборат Макка метроси ҳам қурилиши айтилган.

Туризмдан ташқари, Саудияда аёллар ҳуқуқи масаласига ҳам ўзгартирилишлар киритилган. Хусусан, уларга автомобил бошқариш, эркакларсиз саёҳат қилиш ва Саудия бўйлаб ҳаракатланиш ва бошқа ҳуқуқлар берилган. Иқтисодиётда аёллар улушини 30 фоизга чиқариб, мамлакатдаги ишсизлик даражасини ҳам камайтириш режа қилинган.

Қироллик оиласи мамлакатда турли хил кўнгилочар тадбирлар уюштириш учун вазирлик ҳам ташкил қилган. Эътибор берган бўлсангиз Саудия Арабистонига Женифер Лопез, Эминем каби юлдузлар ҳар йили кела бошлади. Бу ҳаммаси ушбу вазирликнинг сай ҳаракатлари эвазига юз берди. Месси билан ҳамкорликда ишланган роликка ҳам кўзингиз тушган бўлса керак.

Хулоса қилиб айтадиган бўлсам, биздаги радикал қатлам кино, мусиқа харом, “аёллар уйда ўтириши керак” деб қичқираётган вақтида Исломнинг ватанида шу каби ўзгаришлар юз бермоқда.

👉 @Zafarbek_Solijonov

Бўзатов FEST танлови ғолиби “Ўзбекистонда хизмат кўрсатган артист” унвони билан тақдирланди

2019 йил Қорақалпоғистон Республикасида Бўзатов тумани ташкил этилган. 2020 йил эса Президент Шавкат Мирзиёев қорақалпоғистонлик ёшлар билан мулоқот чоғида ёш истеъдод эгалари мана шу гўзал масканга келиб, туманнинг обрўсини ва довруғини бутун дунёга танитиш учун “Ёшлар овози” – Бўзатов FEST танловини ўтказиш ташаббусини илгари сурганди.

Давлат раҳбарининг ташаббусидан сўнг, 2021 йилдан бошлаб Ёшлар ишлари агентлиги ва ҳамкор ташкилотлар ушбу танловни ўтказиши анъанага айланди. Танлов бахшчилик, анъанавий ижро, опера ва эстрада йўналишлари бўйича маҳалладан бошланиб, сектор, туман, вилоят ва республика босқичларида ўтказилади.

Бугунгача Бўзатов FEST кўплаб истаъдод эгаларини кашф этди. Улардан бири – Отабек Назировдир. У танловнинг 2024 йилги мавсумида 23-30 ёш тоифаси бўйича опера йўналишида 1-ўринни қўлга киритган.

25 январь куни Президент Фармонига асосан “Ёшлар овози” – Бўзатов FEST танлови ғолиби Назиров Отабек Бахадир ўғли “Ўзбекистонда хизмат кўрсатган артист” фахрий унвони билан тақдирланди.

👉 @Zafarbek_Solijonov

Манбаларим хабар беришича, Қобил Дўсовни ИИБ масъуллари қонунни бузаётгани ҳақида огоҳлантириб, тилхатам олишган. Бироқ у бунга амал қилмаган. Шундан сўнг унга чора кўриш сўралган. Судга мурожаат қилинган. Эндиликда 11 ой 2 кунлик озодликни чеклаш жазоси озодликдан маҳрум қилиш жазосига алмаштирилди.

👉 @Zafarbek_Solijonov

Мактабгача ва мактаб таълими вазирига ойлик фалон миллионакан, ўринбосарига фалон миллионакан деган маълумот ёлғонакан. Матбуот котиби Дилфуза опа асосланмаган маълумот тарқатмасликни сўраяпти.

Мендаги маълумотларга кўра, ойлиги деб ёлғон маълумот тарқатганларга жавобгарлик чорасини кўриш режалаштириляпти. Шунинг учун бирор хабар олсангиз, уни албатта вазирликдан сўранг, еб қўйманг, тайёр матбуоти бор.

👉 @Zafarbek_Solijonov

Бугун Рақобат қўмитасининг ушбу хабарини ўқиб қолдим. “MO'JIZA HONEYMOON” МЧЖ томонидан ишлаб чиқарилган маҳсулот рекламасида беморлар шифо топаётганлиги кўрсатилганлиги дори воситалари ҳисобланиб, даволаш хоссаларига эга деган таассуротни уйғотиб,  уларни қўллаш натижасида одамлар даволанганлигига, уларни аҳволи яхшиланганлигига доир муайян ҳолларга ҳаволаларни  ўз ичига олганлиги аниқланган.

Юқоридаги ҳолат юзасидан ҳудудий бошқарма Махсус комиссияси томонидан  “MO'JIZA HONEYMOON” МЧЖга нисбатан “Реклама тўғрисида”ги Қонун талаблари бузилиши юзасидан иш қўзғатилиб, молиявий  жарима қўллаш хақида қарор қабул қилинди. Қўмита тўғри йўлда. Негалигини тушунтираман.

Қўмитанинг асосий вазифаси — соғлом рақобатни таъминлаш. Бу йўлда носоғлом рақобатнинг ҳар қандай турига қарши курашади. Реклама қонунчилигида тақиқланган ҳар қандай ҳолатга қарши туриши керак. Биламизки, охирги вақтлар содда одамларнинг диний ҳиссиётларидан фойдаланиб бойиш ҳолатлариям кўпайди. Дин арконларига пул берсангиз, аксар маҳсулотларни аслича бўлмаганидек даражада мақташданам қайтмаяпти.  Арабистонда арзимаган суммага берадиган ёғни ўзимизга олиб келиб ўн баробар қимматга сотаётган дин тужжорлариям талайгина. Буларга қаршиям яхшироқ курашиш керак.

👉 @Zafarbek_Solijonov

OʻzLiDeP Андижондаги ижтимоий ҳимоя реестридаги оилаларга ис газини аниқлайдиган ускуналар ўрнатди

Маълумотларга кўра, республикамизда сўнгги уч йил ичида куз-қиш мавсумида содир бўлаётган фавқулодда ҳолатларнинг аксарияти ис газидан заҳарланиш билан боғлиқ.

Бундай хавфли вазиятларни олдини олиш мақсадида “Инсон ҳаёти – бебаҳо” тамойили асосида OʻzLiDeP Андижон туманидаги маҳаллаларда “Огоҳ бўлинг – ис гази” акциясини ўтказди. Партия фаоллари ва маҳаллий депутатлар ҳамкорлигида ижтимоий ҳимоя реестридаги оилаларга ис газини аниқлайдиган ускуналар беғараз ўрнатилибди.

Шу билан бирга, фуқароларга детекторлардан фойдаланиш ва ис газининг хавфи ҳақида тушунтириш берилган.

Партия ташаббуслари мамлакат бўйлаб хавфсизликни таъминлашга хизмат қилмоқда. Шу каби ташаббуслар сони кўпаяверсин.

👉 @Zafarbek_Solijonov