Oʻzbekiston Xalq demokratik partiyasi

#munosabat

❗️ DAVLAT HAM, OILA HAM MAS’UL

Hech kim kambag‘allik holatida yashashni istamaydi, aksincha, muhtojlikka qarshi kurashish, yaxshiliklarga intilish insonning azaliy tabiatiga xos fazilat.

Shuning uchun kambag‘allikni qisqartirish, hamyurtlarimizga imkoniyat yaratish, muammolari yechimiga ko‘maklashish, ijtimoiy-iqtisodiy faolligini oshirish yo‘lida murakkab, ammo o‘ta muhim o‘zgarishlar amalga oshirilyapti.

Bu masala kun tartibidan tushayotgani yo‘q, tizim doim takomillashib boryapti. Kambag‘allik holatiga tushib qolishning sabablarini bartaraf etish bo‘yicha davlat baholi qudrat vazifalarini bajaryapti, hali oldinda yangi vazifalar ham bor. Sabablar bilan bog‘liq muammolar yechim topganidan keyingi mas’uliyat ehtiyojmand oilaning zimmasida qoladi. Odam harakatga kelib, kurashib, intilmaguncha turmushi ham, tafakkuri ham o‘zgarishi qiyin. Deputatlarimizning hududlar, saylov okruglaridagi mahallalarda o‘tkazayotgan muloqotlari, shuningdek, o‘rganish tadbirlarida guvohi bo‘lyapmizki, qo‘llab-quvvatlashdan unumli foydalanib, hayotini, ro‘zg‘orini izga solib olgan ming-minglab oilalar bor.

Ammo, afsuski, qo‘llab-quvvatlash masalasiga noto‘g‘ri munosabatda bo‘linayotgan, uni doimiy deb o‘ylab, o‘zining turmushini yaxshilash uchun o‘zi intilmayotgan holatlar ham yo‘q emas. Shu sababli harakati yaxshi oila bilan harakati sust oilaning ijtimoiy holati farqlanishi tabiiy.

👆 Hukumat yaqinda qabul qilgan "Oilalarni kambag‘allikdan chiqarishga qaratilgan ko‘mak choralarini ko‘rsatishga doir tartib-taomillarni takomillashtirish to‘g‘risida"gi qaror shu jihatdan ham muhimdir. Endilikda kambag‘al oilalarga ko‘mak ijtimoiy shartnoma asosida ko‘rsatilishiga o‘tib boriladi. Yordam olgan oila bandlikka intilishi, tomorqasiga foydali ekin ekishi, farzandlarini bilimga rag‘batlantirishi, sog‘lig‘iga e’tiborli bo‘lishi, bir so‘z bilan aytganda, mas’uliyatdan uzoqlashmasligi lozim. Aks holda, ko‘rsatilayotgan ko‘mak faol oilalarga nisbatan kamayib boradi (30 foizgacha). Bu ijtimoiy adolat me’yorlariga mos keladi.

✅ Joriy yil 1-martdan Sirdaryo viloyati Xovos tumanida, 1-maydan esa respublikamizning boshqa hududlarida kambag‘al oilalarga ijtimoiy shartnoma asosida ko‘mak ko‘rsatishga o‘tiladi. Biz buni qo‘llab-quvvatlaymiz.

Shu bilan birga, kambag‘al oilalarga, ularning holati va harakatiga joylardagi mas’ullar to‘g‘ri, professional munosabatda bo‘lishi bo‘yicha deputatlik va jamoatchilik nazoratini izchil yo‘lga qo‘yishimiz kerak. Bu har bir hududdagi deputatimiz, faollarimiz uchun muhim vazifadir.

Ijtimoiy shartnomalarni rasmiylashtirish jarayonlarida masalaning mohiyatini oilalar tushunishiga qulay mazmunda yetkazish, to‘g‘ri targ‘ibot qilish, shartnomadan maqsad rag‘batga undash ekaniga e’tibor qaratish joiz bo‘ladi.

❗️ Xalq demokratik partiyasi barcha darajadagi deputatlik korpusi bilan bu masalaga alohida mas’uliyat bilan yondashadi, har bir hududda deputatlik nazoratini yo‘lga qo‘yadi.


Telegram | Facebook | Instagram