Urgut sadosi gazetasi

#Китобхонлик_ҳафталиги_2025

"Китобхонлик ҳафталиги" доирасида буюк саркарда ва давлат арбоби Амир Темурнинг бетакрор тарихий мероси — «Темур тузуклари» асарига бағишланган тарғибот тадбири бўлиб ўтди.

Тадбирда туман Ички ишлар бўлими ходимлари, “Жасорат қалқони” мактабининг фаол китобхон ўқувчилари ҳамда китобхонликни тарғиб қилувчи бошқа фаоллар иштирок этдилар.

Маънавий-маърифий руҳда ўтган мазкур тарғибот Туман марказий кутубхонаси абонемент ва фойдаланувчиларга хизмат кўрсатиш бўлими мутахассиси Моҳичеҳра Сафоева ташаббуси билан ташкил этилди.

Тадбирда сўзга чиққанлар "Темур тузуклари" асари орқали Амир Темурнинг давлат бошқаруви, ҳарбий стратегияси ва инсонпарварлик ғоялари ҳақида теран билимларга эга бўлиш мумкинлигини таъкидлаб ўтишди.

Улар китобнинг мазмун ва моҳияти, у орқали ёш авлодга етиб бораётган тарихий сабоқлар ҳақида фикр билдириб, уни ҳар бир ёш ўқиб чиқиши лозим бўлган асар сифатида эътироф этдилар.

@Urgutsadosigazetasi

"Беш ташаббус паралимпиадаси"нинг туман босқичи ўтказилди

Бугун Ургут туман ҳокимлиги, туман "Инсон" ижтимоий хизматлар маркази ҳамда спорт мактаблари ҳамкорлигида “Беш ташаббус паралимпиадаси” туман босқичининг адаптив спорт мусобақалари бўлиб ўтди. Тадбирда спортчилар, маҳалла фаоллари, ёшлар ва кенг жамоатчилик иштирок этди.

Байрамона руҳда ташкил этилган мусобақаларда маҳаллалардаги ногиронлиги бўлган 280 нафарга яқин ёшлар қатнашиб, 13 турдаги адаптив спорт йўналишлари – пара шахмат-шашка, стол тенниси, бадминтон, армрестлинг, 100 метрга югуриш, узоққа сакраш, аёллар енгил атлетикаси турлари бўйича беллашдилар.

Тадбирда туман ҳокими ўринбосари М.Холиқов иштирок этди ва бу каби тадбирлар имконияти чекланган фуқароларнинг жамиятда муносиб ўрин эгаллашлари, уларнинг жисмоний фаоллигини таъминлаш ва уларни ижтимоий ҳаётга кенг жалб этишда муҳим ўрин тутишини айтиб ўтди.

Мусобақалар сўнгида ғолибларга навбатдаги босқичга йўлланмалар, диплом, эсдалик совғалари  топширилди.

@Urgutsadosigazetasi

🇺🇿✈️ ELITA AKADEMIK MAKTABI XALQARO OLIMPIADADA

Urgutdagi yagona xususiy maktab - Elita Akademik maktabi iqtidorli o‘quvchilari Turkiyaning Antaliya shahrida bo‘lib o‘tgan nufuzli TIMO xalqaro matematika olimpiadasida ishtirok etib, yurtimiz bayrog‘ini yana bir bor yuksaklarga ko‘tardi.

1500 dan ortiq ishtirokchi orasida Shaxobov Bekzodjon 2-o‘rinni egallab, yurtimiz, oilasi va maktab sha’nini munosib himoya qildi.

Ilm yo‘lida mehnat, fidoyilik va qat’iyat bor joyda albatta, natija bo‘ladi!

@urgutsadosigazetasi

ШИЖОАТЛИ ВА ҒАЙРАТЛИ ЁШЛАР МАЙДОНИ

23-умумтаълим мактабида “Шижоат ва ғайрат” ҳарбий-спорт мусобақасининг Ургут тумани босқичи бўлиб ўтди.

Мазкур мусобақалар Мудофаа вазирлиги, Спорт вазирлиги, Давлат хавфсизлик хизмати, Ўзбекистон маҳаллалари уюшмаси, Ёшлар ишлари агентлиги ҳамда Республика Маънавият ва маърифат маркази ҳамкорлигида ташкил этилмоқда.

Мусобақаларда ўғил-қизлар жамоалари 7 та шарт асосида ўз иқтидор ва жисмоний тайёргарликларини синовдан ўтказди.

Натижаларга кўра, Юқори Тегана маҳалласи ёшлари жамоаси 3-ўрин, Мўғол маҳалласи ёшлари 2-ўрин ва Ўрамас маҳалла ёшлар жамоаси 1-ўринга лойиқ кўрилди. Бу билан энг кучли ва шижоатли жамоа, деб топилган Ўрамас ёшлари вилоят босқичига йўлланмани қўлга киритишди.

Ғолиб ва совриндор ёшлар ташкилотчиларнинг диплом ва совғалари билан тақдирланишди.

@Urgutsadosigazetasi