Homidjon Ishmatbekov

Кам гапиринг тинч бўласиз.
Камгаплик ҳеч қачон хиёнат қилмайди.
Агар эътиборсизлик қилишни ўргансангиз, ҳаёт муаммоларининг ярмини енгиб ўтган бўласиз.
Сизга аҳамиятли бўлганларга сиз ҳам аҳамият беринг, қолганларга эса салом беришингизни ўзи кифоя.
Агар бир нарсанинг давомли бўлишини хоҳласангиз, у ҳақида одамлар олдида кўп гапирманг.
Қачон одамларни сиздан беҳожат эканликларини кўрсангиз, сиз ҳам улардан беҳожат бўлинг ва тезда у ердан кетинг.

https://t.me/tuhur

Мустафо Маҳмуд (27 декабрь 1921 – 31 октябрь 2009) – мисрлик файласуф, шифокор ва ёзувчи. У кўплаб китобларнинг муаллифи бўлиб, улар илмий, диний, фалсафий, ижтимоий ва сиёсий мавзуларни ўз ичига олади. Шунингдек, ҳикоялар, драмалар ва саёҳат тўғрисидаги асарлар ёзган. Унинг услуби жозибадор, чуқур ва соддалиги билан ажралиб туради.

Мустафо Маҳмуд машҳур "Илм ва иймон" деб номланган телекўрсатувининг 400 дан ортиқ сонини олиб борган. 1979 йилда Қоҳирада "Мустафо Маҳмуд масжиди" ни барпо этган. Ушбу масжид ҳузурида кам даромадли кишилар учун тиббий ёрдам кўрсатадиган учта тиббиёт маркази фаолият юритади. Шунингдек, 16 нафар шифокордан иборат "Раҳмдиллик карвонлари" ни ташкил қилган. Масжидда тўртта астрономия расадхонаси ва геология музейи мавжуд бўлиб, уларда махсус мутахассислар ишлайди. Музей турли гранит тошлар, ҳайвонот дунёсига мансуб кўркам қўнғизлар ва денгиз ҳайвонларининг турли намуналарини ўз ичига олади.
Мустафо Маҳмуднинг шарафига (296753)чи Мустафо Маҳмуд номли астероид номланган.

Доктор Мустафо Маҳмуднинг тўлиқ асарлари 4 жилдда 40 та китобдан иборат:
1. Аллоҳ
2. Мен Аллоҳни кўрдим
3. Атеист дўстим билан суҳбат
4. Эйнштейн ва нисбийлик
5. Шубҳадан иймонга сафарим
6. Борлиқ ва йўқлик
7. Муҳаббатнинг 55 муаммоси
8. Руҳ ва тана
9. Мусофир ҳикоялари
10. Дўстлар гуруҳи
11. Ўргимчак
12. Шафоат
13. Шайтон ҳукмронлиги
14. Қайноқ нуқта
15. Исломий чап қанот ёлғонлари
16. Ислом ўрада
17. Гуноҳ ва бегуноҳлик қўшиқлари
18. Орқага саноқ бошланди
19. Ислом – у нима?
20. Сиёсий ислом ва келажакдаги жанг
21. Ҳаёт сирлари
22. Ўлим сирлари
23. Марксизм ва ислом
24. Таврот
25. Қуръон сирлари
26. Масиҳ Дажжол
27. Тобутдан чиқиш
28. Сиёсий цирк ўйинлари
29. Кичик жаҳаннам
30. Шайтон уйимизда яшайди
31. Муҳаммад (соллаллоҳу алайҳи ва саллам)
32. Муҳаббат ва ҳаёт ҳақида
33. Сирли калит
34. Тушлар
35. Имконсизлик
36. Жинни дунёми бу?
37. Қуръон – жонли мавжудот
38. Саволлар гирдоби
39. Кул остидаги олов
40. Қон ҳиди

Бу асарлар фалсафа, илм ва ҳаётнинг турли йўналишларини қамраб олади.

https://t.me/tuhur

Бир куни имом Абу Ҳанифа раҳимаҳуллоҳ хуфтон намозини масжиднинг муаззини ортидан ўқиди. Муаззин намозда "Зилзала" сурасини тиловат қилди. Намоз тугагач, одамлар масжиддан чиқиб кетишди ва фақат имом Абу Ҳанифа ва муаззин қолишди.
Муаззин айтади: Мен Абу Ҳанифага қарасам, у ўйга чўмган ҳолда ўтирган, чуқур-чуқур нафас олар эди. Мен унинг хаёлини бузмаслик учун туриб чиқиб кетдим. Масжиддан чиқатуриб фонусни қолдирдим, унинг ичида жуда озгина мой қолган эди.
Эртасига тонг пайтида масжидга қайтсам, у ҳали ҳам ўша жойида ўтирган экан. Пичирлаб шундай дер эди:
"Эй, заррача яхшилик учун яхшилик берадиган Зот! Эй, заррача ёмонлик учун ёмонлик берадиган Зот! Нўъмон қулингни дўзахдан асра ва ўз раҳматингга киргиз!"
Муаззин айтади: Мен кирсам фонус ҳали ҳам ёниб турган экан.
Абу Ҳанифа мени кўрдида: фонусни олмоқчимисан?' — деб сўради. Билсам, у ҳали ҳам хуфтон вақти деб ўйлаган экан. Шунда мен: Эй ҳазрат, тонг отди!-дедим. Шунда Абу Ҳанифа: Менда кўрганларингни бошқаларга айтмагинг!' — деди.

https://t.me/tuhur

Бир куни кўп гуноҳлар қилиб юрган бир йигит солиҳ бир зотнинг ҳузурига келиб, ўз аҳволидан шикоят қилибди.
— Э солиҳ зот! Мен қилмаган гуноҳлар қолмади. Менга насиҳат қилиб қўйсангиз. Ҳар қанча уринсам ҳам гуноҳлардан ўзимни тия олмаяпман. Шоят панду насиҳатларингиз таъсир қилиб гуноҳ қилишдан тўхтасам, қилган гуноҳларимга тавба қилсам, — дебди.
Солиҳ киши:
— Эй ўғлим, агар Аллоҳга осийлик қилишни хоҳласанг, қилавер, аммо аввало бешта шартга риоя қилишинг керак. Агар буларни бажара олсанг, истаганча гуноҳ қил, — деди.
Йигит хурсанд бўлиб:
— Эй солиҳ зот, айтинг, уларни албатта бажараман. Тезроқ айтинг, — деди.
Солиҳ киши:
— Биринчи шарт: агар Аллоҳга осийлик қилмоқчи бўлсанг, аввало Унинг еридан чиқиб кет ва гуноҳни бошқа ерда қил, - деди.
Йигит ҳайрон бўлиб:
— Эй улуғ зот, раҳмат сизга! Аммо, қаерда гуноҳ қиламан? Аҳир Ернинг барчаси Аллоҳнинг мулки эмасми? — деди.
Солиҳ зот жавоб берди:
— Ҳа, албатта. Энди сен Аллоҳдан уялмайсанми? Унинг ерида яшаб, яна Унга осийлик қиласанми?!
Йигит:
— Иккинчи шартни айтинг, эй устоз, — деди.
Солиҳ киши:
— Агар Аллоҳга осийлик қилмоқчи бўлсанг, қилавер, аммо Унинг ризқидан емагин, - деди.
Йигит яна ҳайратланиб:
— Эй улуғ зот, сизга Аллоҳнинг раҳмати бўлсин! Аҳир ризқ берувчи Унинг ўзи бўлса, унда мен қаердан ризқланаман? — деди.
Солиҳ киши:
— Аллоҳнинг ризқидан еб туриб, яна Унга осийлик қилишдан уялмайсанми?!- деди.
Йигит:
— Учинчи шартни айтинг, — деди.
Солиҳ киши:
— Агар Аллоҳга осийлик қилмоқчи бўлсанг, У кўрмайдиган жойга бориб қил, - деди.
Йигитнинг ҳайрати яна ошди:
— Эй устоз! Бу нима деганингиз? Аҳир қаерга бормай Унинг кўз ўнгидаманку. Аллоҳ ҳатто қоронғу кечада қора тош устида юрган қора чумолининг ҳаракатини ҳам кўради-ку! Қаерга бормай, қаерга яширинмай мени кўриб, билиб турадику? — деди.
Солиҳ зот:
— Шундайлигини билар экансан, бошқаларнинг кўриб қолишидан уяласану, наҳотки Аллоҳнинг кўз ўнгида гуноҳ қилишдан уялмайсан? Наҳотки, Аллоҳ сен учун бошқалардан кўра қардсиз ва ҳурматсиз бўлса. У ҳамма нарсани билиб, кўриб турганида Унга осийлик қиласанми?! - деди.
Йигит:
— Тўртинчи шартни айтиб беринг, — деди.
Солиҳ киши деди:
— Агар Аллоҳга осийлик қилар экансан, ундай бўлса қачонки ажал фариштаси келиб, жонингни олмоқчи бўлганида унга айт: “Менга озгина муҳлат бер, гуноҳларимдан тавба қилиб олай”, дегин.
Йигит қаттиқ йиғлаб:
— Эй солиҳ зот, мен кимманки ўлим фариштасига буйруқ бера олсам, буни ҳеч ким қила олмайди? Ўлим келганда уни бир сонияга ҳам ортга суриб бўлмайди-ку! — деди.
Солиҳ киши:
— Бешинчи шарт шуки, агар Аллоҳга осийлик қилмоқчи бўлсанг, қилавер, бироқ қачонки дўзахнинг фаришталари келиб, сени дўзахга тортмоқчи бўлганларида уларнинг чангалидан қутулиб қочгин ва жаннатга кириб олгин,- деди.
Йигит дод солиб йиғлади ва баланд овозда:
— Бас, етар эй улуғ устоз! Аллоҳни номи билан қасам ичиб айтаман, бугундан бошлаб гуноҳ қилмайман, мен Аллоҳга чин дилимдан тавба қилдим, ла илаҳа иллаллоҳу Муҳаммадун расулуллоҳ- деди.

https://t.me/tuhur

Муваффақиятингиз тонгингизда

Ҳеч қачон ўйлаб кўрганмисиз, нима учун баъзи кишилар улкан ютуқларга эришади, баъзилар эса бир хил ҳолатдан чиқа олмайди? Бунинг сири бирор бир сеҳр-жоду ёки омадга боғлиқ деб ўйлайсизми? Асло, бунинг сабаби оддий ва айни пайтда ҳаммага бу имконият берилган. У ҳам бўлса - тонг!
Тонгингиз тўлиқ бир кунингизни йўналишларини аниқлаб берадиган компасдир. Агар кунингиз фаол ҳаракат ва аниқ режа билан бошланса, кун давомида олдингизда улкан имкониятлар эшиклари очилади. Бордию, тонгингиз бетартиб ва режасиз бошланса, бу кунингизнинг қолган қисмига ўзининг салбий таъсирини кўрсатиши табиийдир.
Тонг вақти шунчаки янги куннинг бошланиш вақти эмас. Балки бу вақт кунингизни ютуқлар билан ўтказасизми ёки самарасиз кетказасизми, шуларни белгилаб олиш лаҳзасидир. Қандай қилиб дейсизми?
Мутахассисларнинг таъкидлашларича, тонг вақти кун тартибини белгилаш, энергияни ошириш ва ақлни ривожлантириш учун энг яхши вақтдир. Асосийси, тонгингизни шошма-шошарлик билан ёки бетартиблик билан бошламанг. Тонг вақти бу сизнинг кичик бўлсада сармоянгиз, у сизнинг шахсий ва ижтимоий ҳаётингизда катта самара бериши мумкин.
Энг муваффақиятли инсонларнинг аксариятида тонгда бажарадиган муайян машғулотлари мавжудлигини биласизми? Тонгги машғулотларга риоя қилиш сизда қуйидаги кўникмалар ҳосил бўлишига ёрдам беради:
1.Аниқ мақсад билан уйғониш.
2.Чалкашликлардан халос бўлиш.
3.Ижобий мақсадлар сари одимлаш, кунни унумли ўтказиш учун замин яратиш.
Пайғамбаримиз алайҳиссаломдан ворид бўлган тонгда айтиладиган дуо ва зикрларнинг маъно ва мазмунларига бир эътибор беринг-а. Унда инсонни ҳотиржам қиладиган, ҳаётдан унумли фойдаланишга ундайдиган, ҳар бир ишда фақат Унинг ўзига таваккул қилишга чақирадиган маънолар бор. Демак, ҳар тонгни мана шундай ғоя ва ақида билан бошлашга одатланган кишининг кунида барака ва ривожланиш бўлади, иншааллоҳ.
Тонгни муваффақиятли бошлашнинг бешта асосий унсури бор:
1. Эрта уйғониш: бунда сиз тафаккур қилиш, ишларни режалаштириш ва сокин вақтдан баҳраманд бўлиш имконига эга бўласиз.
2. Жисмоний машқлар: намоз ўқиш ва ҳатто енгил бадантарбия машқларини бажариш ҳам қон айланишини яхшилаб, танага қувват (энергия) беради.
3. Ҳаёт (тириклик) ҳақида фикр юритиш, неъматларга шукр қилиш.
4. Кунлик режани белгилаб олиш.
5. Соғлом овқатланиш: эрта тонгда қилинган нонушта кун давомида фаол бўлиш учун зарур энергияни беради.

Эртадан бошлаб кунингизни шу тарзда бошланг ва ҳаётингизда қандай ижобий ўзгаришлар бўлишини ўзингиз кузатинг.
Ҳар кунингизни тонг саҳардан бошлашга одатланинг, кунингиз баракали, ишларингиз муваффақиятли бўлади. Зеро, Пайғамбаримиз саллаллоҳу алайҳи васаллам биз умматлари ҳақига Аллоҳдан тонгимизга барака сўраб дуо қилганлар.

https://t.me/tuhur

- Нима қилдинг ўзингга?
- Ўзимни ўлдирмоқчи бўлдим, азобдан қутилиш учун.
- Ўлимдан кейин азобдан қутилишингни қаердан биласан, ўлимдан кейин сени нималар кутаётганини биласанми?
- Ҳар ҳолда бу дунёдаги аҳволимдан яхшироқ бўлади.
- Бу сени тахмининг холос, одамлар тахмин билан ўзларини ўлдирмайдилар.
- Нима қилай, энди менга нима қолди?
- Сабр қилиб, ҳукмимизни кутишинг.
- Сабр қилдим.
- Яна бир кун сабр қил.
- Эртага ҳам бугундан яхши бўлмайди.
- Қаердан биласан? Кунларни сен яратдингми? Ўзингни сен яратганмисан?
- Йўқ.
- Унда билмаган нарсанг ҳақида қандай қилиб ҳукм чиқарасан ва ўзингга тегишли бўлмаган нарсада қандай тасарруф қиласан?
- Бу менинг ҳаётим, у менга танглик қилди.
- Биласанми, сенга эртага нималар ҳозирлаб қўйилган?
- Йўқ.
- Унда бу ҳаёт сеники эмас.
- Мени яшагим келмаяпти, ўлишимга қўйиб беринглар. Мени тинч қўйинглар, раҳм қилинглар!
- Агар сени ўз ҳолингга қўйсак, биз сенга раҳм қилмаган бўламиз. Биз сени ўз хоҳишингдан қайтариш орқали раҳм қилиб турибмиз. Агар бепарво бўлсак, ҳалок бўласан.
- Ҳалок бўлсам бўлаверай, фақат ўлсам бўлди! Ҳалок бўлишни истайман!
- Ҳалок бўлиш сен ўйлагандек гўр остида тинч ухлаш эмас.
- Мен бор-йўғи ҳозирги аҳволимдан қутулишни истайман, бўлди.
- Ҳатто дўзахга ҳама?
- Бу дунёдаги азобдан бошқа яна қандай дўзах бўлиши мумкин?
- Сен ўйлайсанки, фақат ҳис қила оладиган жаннат ва дўзах бор, холосми? Ўйлайсанки, бизда фақат бу дунёдан бошқа нарса йўқми? Ўйлайсанки, Ер курраси каби кичик ва муаллақ чанг зарраси каби жойдан бошқа ҳеч нимамиз йўқми? Сенинг шубҳа ва хато фикрларингга ҳайф бўлсин!
- Мен бу ҳолатдан қаттиқ чарчадим. Барча йўллар мен учун берк. Ер ва осмон менга ёпилди. Бўғилаяпман. Дунёдан чиқиб кетмоқчиман. Чиқиб кетмоқчиман.
- Ҳеч бўлмаса бир неча дақиқа сабр қилолмайсанми? Ҳали кўрмаган эртанги туҳфамизни қабул қилишдан бош тортяпсанми?
- Мен кўрадиганимни кўриб бўлдим.
- Бу Биздан ноумидлик ва Бизга нисбатан ёмон гумон, қудратимизга шубҳа билан қараш. Энди Биз ҳам сени ҳикматимиз ва иродамизни инкор этганинг учун рад этамиз. Сен ўзингни ўзинг ўлдиришга қарор қилдинг. Бор, Биз ҳам сени ўлимингга қўйиб бердик.

Ўша кеча у ўзини катта матога осиб қўйди ва ўлди. Унинг тўртинчи бор қилган бу ҳаракатидан кейин уни қутқариш учун қилинган барча ҳаракатлар самарасиз бўлди.

Эртаси куни тонгда барча газеталарда оламшумул янгилик эълон қилинди: у азоб чекаётган касалликнинг давоси топилган эди.
Аммо у энди йўқ эди. У инъомни кута олмади. Неъмат берувчига, инъомига ношукрлик қилди ва ўз жонига зулм қилди. Кўрмаган эртасини, раҳмли зотнинг раҳматини ва тадбирини инкор этди.

У ўзининг жонини раҳм-шафқатсиз, абадий азобга олиб чиқиб кетди..

Мустафо Маҳмуд, "Қайноқ нуқта".

https://t.me/tuhur

Ҳақиқатан ҳайратланарли ҳаётий қисса

Бир қиз қуйидагиларни ҳикоя қилади:
"Бир йигит менга уйланиш учун совчи бўлиб келди ва унинг менга уйланиши учун қўйган ягона шарти онасига ғамхўрлик қилишим эди. У мендан бундан ортиқ ҳеч нима талаб қилмаслигини, фақат ишга кетган вақтида ўн йилдан бери ўринга михланиб қолган онасини парвариш қилиб турса шунинг ўзи кифоя эканлигини айтди.
У яна қўшимча қилиб:
— Бу сенинг зиммангдаги мажбурият эмас, балки инсонпарварлик асосида ва менга итоат қилган ҳолда қиладиган ишларинг бўлади- деди.
Мен кўп ўйладим ва ҳатто иккиландим. Ахир, бу одамга хотин эмас, хизматчи керак эканда дедим.
Ниҳоят отам билан маслаҳатлашдим. У менинг фикрларимни эшитиб кўриб, шундай деди:
— Қизим, бу сенинг ҳаётинг, менинг унга аралашишга ҳаққим йўқ. Аммо менинг маслаҳатимни сўраганинг учун айтаман: "Яхшилик қилиш инсонни ҳар қандай ёмонликдан сақлайди" деган гап бор. Онасига бундай ғамхўрлик қиладиган одам сенга ҳам ҳеч қачон ёмонлик қилмайди. Агар у сени яхши кўрса, сени иззат-икром қилади, ёқтирмаса ҳам ҳурматни сақлайди. Агар унинг онасига ғамхўрлик қилишга қодир бўлсанг, рози бўл. Аммо бу ишда шайтон қалбингга ёмонлик солиши мумкинлигини ҳис қилсанг, “йўқ” де.
Мен рози бўлдим ва биз турмуш қурдик. Тўйдан кейинги биринчи кечамизда у мени онасининг хонасига олиб кирди. Хонага кириб ҳайратга тушдим! Онасининг хонаси жаннатдай покиза ва чиройли эди. Унинг уйини бошқа жойлар билан солиштирганда, бу хона алоҳида меҳр билан безатилганди.
У онасининг ёнига борди ва елкасини енгилгина қоқиб:
— Онажон, мен сизга ваъда қилган совғани олиб келдим. Менинг хотинимни кўришни хоҳлайсизми? — деди.
Онаси кўзларини очиб, аввал ўғлига, кейин эса менга нигоҳ ташлади. Онажонимнинг қарашлари оғриққа тўла, аммо юзларида ҳузнли табассум бор эди. Ўша лаҳзани сўз билан ифода этишнинг иложи йўқ. Онаси шундай деди:
— Қизим, туйингиз муборак бўлсин. Сизга меҳрибон фарзанд беришини ва ўғлимга муносиб жуфт бўлишингизни Аллоҳдан сўрайман.
Онаси шу гапларни айтиб кўзларидан ёш тўкканда, у:
— Онажон, йиғламанг, деб кўз ёшларини оҳиста артиб қўйди.
Мен эса онажонининг қўли ва пешонасини ўпиб:
— Омин, онажон, — дедим.

Шундан кейин бу уйдаги кунларим барча нарсадан ҳайрон қолиш билан ўтди. У онасига ўз қўли билан ғамхўрлик қиларди: юз-қўлларини ювиш, сочларини ювиб- тараш ҳам унинг одатий ишларидан эди. Онажониси қийналиб қолмаслиги учун махсус юмшоқ тароқ олиб келганида, унинг ўз онасига бўлган меҳрига янада ҳайратландим.
У онасининг саломатлигига ҳеч қачон эътиборсизлик қилмасди. Ҳар кеча камида уч марта уйғониб онасин у ёнбошидан, бу ёнбошига айлантириб, ёнбошларида яралар пайдо бўлмаслигига ишонч ҳосил қиларди.
Мен бу инсоннинг онасига бўлган муҳаббатини яхши кўриб қолдим. Мендан талаб қилинган ягона вазифа — онажонига овқат бериб, дори-дармонларини ичириб туриш эди.

Мен ўғил кўрганимда, боламни онажонисининг қучоғига қўйдим ва: дуо қилинг, набирангиз ҳам ўғлингиздек ота-онасига меҳрли бўлишини истайман, дедим.
Онажоним шундай жавоб берди:
— Қизим, менинг ўғлим Аллоҳнинг менга берган неъмати. Сен ҳам доим Аллоҳдан унинг тарбиясида ёрдам сўраб дуо қил.
Эримнинг ҳаёти тўла-тўкис яхшилик, барака ва онасига бўлган беқиёс меҳр эди. Бир кун ҳам унга норозилик билдирганини кўрмадим.

Ёшлар учун ибрат олишга арзийдиган бу одам — шайх доктор Муҳаммад Ратиб Набулсий эди.

https://t.me/tuhur

Аёл қадри

Эр ўз аёлидан сўради:
«Эркак уйланганда нима йўқотади ва нима топади?»
Аёли табассум билан жавоб берди:
«Эркак ўз ёлғизлигини, кичик қарорларни мустақил қабул қилиш эркинлигини ва янги масъулиятлари ҳақида ўйламасдан ҳаракат қилиш қобилиятини йўқотади. Бунга жавобан эса, ҳаётидаги шерикни, фарзандларининг онасини ва ҳаётда илиқлик уфуриб турган уйни топади».
Эр кулиб сўради: «Унда бахт-саодатчи?»
Аёли табассум билан жавоб берди: «Бахт-саодат, азизим, бу ўзимиз яратадиган нарса. Агар никоҳ биз учун мажбуриятларни, хурсандликни ва муваффақиятни бўлишишни англатса, биз бахтли бўламиз. Аммо агар биз унга йўқотиш сифатида қарасак, доимо норозилик ҳиссини туямиз».

Эр унинг сўзларини мулоҳаза қилиб, яна сўради: «Сен мени кўпроқ севасанми ёки болаларингни?»
Аёли иккиланмай жавоб берди: «Болаларимни.»
Эр ажабланиб сўради: «Нега?»
Аёли жавоб берди: «Чунки улар менинг бир бўлагим, қоним ва жоним.»
Эр кулиб: «Унда мен-чи?»
Аёли кулиб жавоб берди: «Сиз эса бу турмушимдаги шериксан, баъзан мени хурсанд қиласиз, баъзан эса асабимни бузасиз!»
Бу суҳбатдан сўнг эр ўйланиб қолди: «Ростдан ҳам эр-хотин муносабати қурбонликлар устида қуриладими ва бу қурбонликлар қадрланадими?»

Жамиятимизда аёл оиланинг асосий тиргакларидан бири ҳисобланади. У кечалари уйқусиз қоладиган она, овқат тайёрлайдиган, болаларини ўқитадиган, тарбиялайдиган, уйни тозалайдиган, ғамхўрлик қиладиган ва қўллаб-қувватлайдиган аёлдир. У ҳаётнинг барча оғирликларини жимгина ўз елкасида кўтаради ва чарчоққа қарамай, табассум қилиб яшайди.

Шунга қарамай, бордию оила аъзоларидан бири муваффақиятсизликка учраса, бармоқлар дарҳол аёлга қаратилади:
— Боланинг ўқиши орқага қолса, «Она қаерда?» дейишади.
— Боланинг хулқи ёмон бўлса, «Она уни тарбияламабди!» дейишади.
— Эрнинг ҳаётидан қониқмаганлигида, «Хотин етарли эътибор бермабди!» дейишади.
— Уй тартибсиз бўлса, «Она ўз вазифасини бажармабди!» дейишади.

Аммо ҳақиқат шуки, аёл отилади улкан рол ўйнайди. У ҳақиқий мактаб, ҳатто ундан ҳам устундир. У — жароҳатни даволовчи шифокор, қадриятларни сингдирувчи мураббий, маслаҳат берувчи маслаҳатчи ва каттаю кичикка ғамхўрлик қилувчи меҳрибон инсон.
У ҳаёт ҳикматини сақлайдиган кутубхона, меҳр-муҳаббатни беғараз бахш этадиган юрак, оиланинг суянчиғи бўлган қўллаб-қувватловчи устундир.
Шунинг учун, каттаю кичик масъулиятларни зиммасига олган, ўз тинчлиги ва бахт-саодатидан бошқалар учун воз кечадиган, барча қийинчиликларга қарамай атрофидаги инсонларга хурсандлик улашадиган аёлга чуқур ҳурмат билан эътибор қаратмоқ лозим.

Эй аёл, табассум қил ва ўзинг билан фахрлан. Чунки сен авлодларни тарбияловчи, дунёдаги куч ва муҳаббат манбаисан.

https://t.me/tuhur

Ҳаётда асқотадиган 50та зарур қоида

1. Ҳеч қачон бирор киши билан ўтирган ҳолда қўл бериб сўрашманг.

2. Музокарада ҳеч қачон биринчи бўлиб таклифни берманг.

3. Агар сизга сир айтилган бўлса, уни сақлай билинг.

4. Агар бировнинг машинасини миниб туриш учун олган бўлсангиз, қайтараётганингизда бакини ёқилғига тўлдириб қўйишни унутманг.

5. Бирон ишни қилсангиз иштиёқ билан қилинг, бўлмаса умуман у ишга қўл урманг.

6. Қўл бериб кўришганда маҳкам тутинг ва суҳбатдошингизнинг кўзига қаранг.

7. Якка ҳолда сафарга чиқиб кўринг.

8. Қайғуга ботган пайтингизда сизга хурсандчилик бағишлаган одамни ҳечам йўқотманг.

9. Ҳаётингизни узайтирмоқчи бўлсангиз, маслаҳат олишдан тортинманг.

10. Ўқиш ёки ишхонада янги келган одам билан бирга овқатланинг.

11. Ғазабда хат ёзсангиз тугатгандан сўнг, ўқиб чиқинг, ўчиринг ва қайта ёзинг.

12. Овқатланиш вақтида иш, сиёсат ёки дин ҳақида гаплашманг.

13. Мақсадларингизни ёзиб қўйинг ва уларга эришинг.

14. Ўз фикрингизни ҳимоя қилинг, лекин ўзгаларга ҳурматли ва бағрикенг бўлинг.

15. Яқинларингизга қўнғироқ қилинг ва уларни зиёрат қилинг.

16. Ҳеч нарсадан афсусланманг, ҳаммасидан сабоқ олинг.

17. Обрў ва вафо сизнинг шахсингизда бўлиши керак.

18. Қарзга пул берманг, агар қайтарилмаслигини билсангиз.

19. Бирон нарсага ишонинг.

20. Эрталаб уйқудан уйғонганда ётоғингизни йиғинг.

21. Ҳаммомда ювинаётганда қўшиқ айтманг.

22. Ўсимлик парвариш қилинг ёки боғ яратинг.

23. Имконият пайдо бўлганда осмонни кузатинг.

24. Қобилиятларингизни аниқлаб, улардан фойдаланинг.

25. Қилаётган ишингизни сева билинг, ёки уни тарк этинг.

26. Ёрдам керак бўлганда ёрдам сўрашдан тортинманг.

27. Кимгадир кичик бўлса ҳам бир қадриятни ўргатинг.

28. Сизга ёрдам кўрсатган одамга миннатдорчилик билдиринг.

29. Қўшниларингизга меҳрибон бўлинг.

30. Бирон кишининг бир кунини саодатли қилинг — шунда сизга ҳам хурсандлик бағишлайди.

31. Ўз нафсингиз билан беллашинг.

32. Йилда ҳеч бўлмаганда бир марта соғлигингизни тиббий муолажа қилдиринг.

33. Соғлигингизга эътиборли бўлинг.

34. Ҳар доим табассум билан салом беринг.

35. Тез ўйланг, лекин секин сўзланг.

36. Оғзингиз овқатга тўла ҳолда гапирманг.

37. Оёқ кийимингизни тоза тутинг, тирноқларингизни олинг ва ҳар доим кўринишингизни озода сақланг.

38. Ўзингиз билмайдиган масалаларда фикр билдирманг.

39. Ҳеч қачон ҳеч кимга ёмон муомала қилманг.

40. Ҳаётда гўёки умрингизни охирги кунидек яшанг.

41. Хотиржам бўлиш имконини берадиган фурсатни ҳеч қачон қўлдан берманг.

42. Ҳар қандай кишининг меҳнатини тан олинг.

43. Камтар бўлинг.

44. Ўз илдизларингизни ҳеч қачон унутманг.

45. Имкон туғилганда саёҳатга чиқинг.

46. Қўрқувдан воз кечинг.

47. Ғойибона сизни ҳимоя қилган одамни йўқотманг.

48. Ҳеч қачон таслим бўлмасдан ўз муваффақиятингизни қидиринг.

49. Адолатли бўлинг; сизнинг ёрдамингизга муҳтож бўлганларни ҳимоя қилинг.

50. Ялғизлик онларидан завқланишни ўрганинг.

https://t.me/tuhur

Агар муваффақиятга эришмоқчи бўлсангиз:
1. Мансаб ҳақида ўйламанг, асосий мақсадингиз орқага қайтмаслик бўлсин.

Агар муваффақиятга эришмоқчи бўлсангиз:
2. Вақтни беҳуда сарфламанг, вақт жуда қадрли, умрингиз эса, чекланган. (Тартибли бўлинг): намозингиз, уйқингиз, эрталаб туришингиз, ишингиз, овқатланишингиз, учрашувларингиз ва машғулотларингизни режалаштиринг.

Агар муваффақиятга эришмоқчи бўлсангиз:
3. Мўъжиза кутиб ўтирманг, имкониятлар ўз-ўзидан юзага келмайди. Имкониятларни сиз яратасиз.

Агар муваффақиятга эришмоқчи бўлсангиз:
4. Машғулотлар оғирлигидан ёки овқатнинг таъмидан ёш болалардек шикоят қилманг. Ўзингиздан сабрли ва мослашувчанлик қобилиятига эга шахсият яратинг. Ҳар қандай қийинчиликларга мослашинг ва уларни енгиб ўтинг.

Агар муваффақиятга эришмоқчи бўлсангиз:
5. Йиқилгандан кейин қайтадан туришни давом эттиринг. Сиз ўйлаганингиздан кўра кучлироқсиз. Озуқа, уйқу, машғулотлар, ёрқин табассум, ғажиб ташлайдиган тишларингизни намоён қиладиган кулишингиз, ўзингизга ишонч ва ҳечан букилмайдиган қадлингиз – буларнинг барчаси сизда мавжуд. Сиз – муваффақият учун яратилган қаҳрамонсиз.
6. Одамлар билан ҳаддан ташқари кўп аралашишдан эҳтиёт бўлинг. Бу ижтимоий зеҳнингизни ошириши, одамлар билан мулоқот қилиш малакасини пайдо қилиши мумкин, аммо ақлингиз янгича ғоялар яратишга қодир бўлмай қолади. Шунинг учун одамлар билан аралашинг, аммо меъёрда.
7. Бирор кишини ўзингизга ўрнак қилишдан эҳтиёт бўлинг. Бу сизнинг ақлингизни тўлиқ бузиб ташлайди. Фақат ўзингизни ўзингизга ўрнак қилинг. Сиз табиатан ақлсиз қилиб яратилган эмассиз, балки ақлингизни бировга тақлид қилишга йўналтиришингиз – уни зое кетказиш демакдир.
8. Чуқур муносабатлардан узоқ бўлинг. Ҳеч кимни ҳаётингизда асосий ўринга қўйманг. Хоҳлаганингизча яқин бўлинг, аммо бир куни уларсиз қолишингиз мумкинлигини доим эсда тутинг.
9. Бошқалар сиздан ким бўлишингизни хоҳлаётган бўлса, ўшандай бўлишдан сақланинг. Ҳеч нарсани ўзгартирманг, ўзингизни ва ҳаётингизни ўзингиз яхши кўрадиган тарзда яшанг.

https://t.me/tuhur

Меҳрибон инсоннинг белгиси:

У сокин ва босиқ, бағрикенг, ҳалим, сабр-тоқат, хотиржамлик билан иш юритади. У ҳар қандай ҳаракатдан аввал ўзини ўнглаб, дунёвий насибалар учун шошқалоқлик қилмайди, шахсий манфаатга берилмайди, ғараздан узоқ бўлади, нафсини назорат қилади. У чуқур ўйлайди, сукутни яхши кўради, холи қолишдан ҳузурланади ва ёлғизликдан қўрқмайди.

Дарҳақиқат, меҳрибон инсоннинг ичида уни ҳузурлантирадиган нур бўлади. Чунки у доимо Ҳақ билан мулоқотда, халқ билан бўлган муносабатларга эса доимо очиқдир.

https://t.me/tuhur

"Устоз" استاذ сўзи қаердан келиб чиққан?

Манбаларга кўра, бу сўз араб тилига ўзлаштирилган, аслида ажамдан кириб келган сўздир. Чунки араб тилида (с) س ва (з) ذ ҳарфлари бир сўзда учрамайди.

Бу сўз форс тилидан келиб чиққан бўлиб, "моҳир", "маҳорати юқори" ёки "ўқитувчи" маъноларини англатади. Форс тилида "усто" деб айтилади. Кейинчалик "болалар мураббийи" ёки "подшоҳларнинг фарзандларини тарбияловчи"га нисбатан ишлатила бошлаган.
Тилшунос олимларнинг фикрига кўра, бу сўз араб шеъриятида, хусусан, жоҳилият давридаги шеърларда умуман учрамайди.
Маълумотларга кўра, бу сўз "бирор соҳада моҳир бўлган инсон"ни англатади. Баъзи манбаларга кўра, ушбу унвонга лойиқ бўлиш учун шахс 18 ёки 12 фанни эгаллаган бўлиши керак. Уларнинг орасида: сарф, наҳв, баён илми, бадиъий адабиёт, мантиқ, калом, усулул фиқҳ, тафсир ва ҳадис фанлари бор.
Тарихий маълумотларга кўра, биринчи бўлиб "устоз" унвони Кофур Ихшидийга берилган. Кейинчалик бу атама кенг халқ орасида болалар тарбиячиси ёки бирор ишда юксак даражага эришган кишилар учун ишлатила бошлаган. Масалан, "фалон соҳанинг устаси" яъни ўша соҳада жуда моҳир деган маънони англатади.

Бугунги кунга келиб, "устоз" сўзи тилимизда кенг қўлланилиши билан бирга, айни пайтда мактаб ўқитувчилари, олийгоҳ ўқитувчилари қатори кўп соҳаларда фаолият олиб бораётган мураббий ҳамда соҳа мутахассиларига нисбатан қўлланиши одатий ҳолга айланди.

https://t.me/tuhur

Ҳар бир қизга уни гўзал, жозибадор ва маҳлиё деб мақташлари ёқади.
Аммо савол туғилади: гўзаллик нима?
Гўзаллик — бу упа, рўмолча, крем, лаб бўёғи ва кўз бўёғими?
Ёки сочнинг ранги, узунлиги, турмача шакли, кўкракнинг ўлчами, белнинг айланаси, оёқларнинг чиройли шакли, юзнинг ўткир чизмаларими?
Гўзаллик — фақат кийим, парик, сумка, туфли ёки кўзойнакми?
Аёллар шундай деб ўйлашади.
Аёллар доимо ўз ташқи кўриниши, ўлчамлари, кўз ва лаблар атрофига чизилган нақшлари ҳақида ўйлайди.
Улар гўзалликни юзда чизиш мумкин, деб ўйлашади. Турли пардозлар ва аксессуарлар орқали гўзаллик яратиш мумкин, деб ишонишади. Аммо улар унутмасинларки, бунинг ҳаммаси фақат сиртқи бўёқ.

Бу бўёқ бир ювинишда ёки терлаган пайтда ювилиб кетиши мумкин. Ҳатто бу сунъий гўзаллик эркакларни ҳайратга солиши мумкин, аммо у доимий бўлмайди.
Ҳатто аёлнинг тенгсиз жисмоний ўлчамлари ҳам туғруқдан кейин ўзгариши мумкин.
Ташқи гўзаллик доимо йўқ бўлиб кетади. У фақат битта "қопқон" ролини ўйнайди. Чирой аёлга эркакни ўзига жалб этиш учун берилган вақтинчалик ҳадиядир.
Шунинг учун, аёлнинг гўзаллиги ҳақида ҳукм чиқаришдан аввал унинг ички хусусиятлари, руҳий дунёсига назар солинг. Гўзаллик — бу одоб-ахлоқ, поклик ва меҳрибонлик.
Гўзаллик — бу меҳр-шафқат, муҳаббат, оналик туйғуларига бой қалб.
Инсонийликнинг юксак даражаси — ўз тилини, қўлини, қалбини ва ҳатто тасаввурларини пок сақлай олиш. Буларнинг ҳар бири гўзалликнинг алоҳида бир кўриниши.
Шунингдек, яхши хулқ-атвор, сабр-тоқат, кечиримлилик ва оддийлик — гўзалликнинг ажралмас қисмларидир. Нозик, сезгир руҳ, очиқ ва ростгўй табиат ҳам гўзалликнинг белгиларидир.
Энди тасаввур қилинг, ташқи жиҳатдан гўзал бўлган аёл ёмон хулқли, маккор, ёлғончи ва дунёвий қизиқишларга тўла бўлса, унинг юзининг гўзаллиги қандай аҳамиятга эга?
Қандай қийматга эга, агар жозибали лаблардан фақат заҳарли сўзлар чиқса? Ёки чиройли оёқлар қўпол ҳаракатлар учун ишлатилса? Ёки ясанган сочлар остида ақл бўлмаса?

Агар бир аёл ҳақиқий гўзалликка эга бўлса, уни фақат ташқи кўриниш билан эмас, балки унинг шахсияти, маънавияти ва руҳий олами билан баҳолаш керак.
Шунинг учун аёлга ҳукм чиқаришда фақат кўзлар билан қараманг, балки ақлингиз билан кузатинг. Чунки ташқи кўриниш қўпол хато қилиши ёки хаёлнинг қурбонига айлантириши мумкин.
Биринчи қарашдаги гўзал кўриниш чалғитувчи бўлиши мумкин. Бундай пайтда ҳислар тўлқини ва ҳаяжон ботқоғи остида кўриш қобилияти йўқолади. Шунда ҳатто маймунсимон юзлар фариштасимон бўлиб кўриниши мумкин.

Аёл — бу китоб. Уни аввало ақлингиз билан ўқинг, ташқи муқовасига қарамасдан, ичида нима ёзилганини тушуниб олинг.
Ҳиссиётлар ўрнига танқидий фикрлаш усули билан яқинлашинг. Акс ҳолда, гўзал кўриниш билан ниқобланган асл ҳақиқатни кеч англашингиз мумкин.
Аёллар бунга йўл қўймаслик учун ақл билан ҳаракат қиладилар ва сизни аввало ошиққа айлантириб, ақлингизни йўқотишингизга ҳаракат қиладилар.
Шундай қилиб, кўпгина эркаклар ҳақиқатни жуда кеч англайдилар. Ҳақиқатни англаганлар эса фалсафий йўналишга бурилиб, "гўзаллик" ҳақида ўйлай бошлайдилар ва гўзалликнинг ўзига ошиқ бўлиб кетадилар.
Аммо ҳатто бундай фалсафий инсон ҳам аёлнинг ақлли ҳаракатларидан четда қолмаслиги мумкин. Чунки аёллар ҳар доим ўзлари билан бирга "алоҳида қўшимча китоб" олиб юришади...

Доктор Мустафа Маҳмуднинг "Шайтон ҳукм суради" асаридан "Тузоққа тушиш" парчаси

https://t.me/tuhur

Ривоятга кўра, Зулқарнайн онасининг ягона фарзанди бўлган ва маълумки, у ер юзи бўйлаб шарқдан ғарбгача сайр қилган, ерларни фатҳ этган ва даъват билан шуғулланган.

У Бобилга етганида оғир касалликка чалинган ва ўзининг умри тугаётганини ҳис қилади. Ўша пайтда унинг хаёлига фақат онаси келар, унинг ўлими туфайли оғир қайғуга ботишини ўйлар эди.

У онасига катта бир қўчқор билан хат ёзиб юборди. У хатда шундай деб ёзди:

"Онажон, бу дунёда ҳаёт абадий эмас, ажал муддатлари ёзиб қўйилган. Агар сизга менинг ўлимим ҳақида хабар етса, ушбу қўчқорни сўйинг, уни пиширинг ва овқат тайёрланг. Кейин барча одамларни овқатланишга чақиринг, фақат яқин кишисини йўқотмаганлардан бошқаларни чақирманг".

Онасига унинг ўлими ҳақидаги хабар келгач, васиятни бажаришга киришди. Қўчқорни сўйди, уни пиширди ва у айтган одамларни чақирди. Бироқ, унинг чақириғига биноан ҳеч ким овқатланишга келмади.

Сабаби нима?

Жавоби ўзингизга аён...

https://t.me/tuhur

Ким ўз биродарини ўлдирса, у биродарини ёмон кўрганидан эмас, балки ўзини ёмон кўрганидан ўлдиради...
Чунки бировни ўлдириш учун қўл фақат қачонки ичкаридан нафсда зўриқиш пайдо бўлгандагина кўтарилади.
Қотил бошқаларга уруш эълон қилмайди, фақат қачонки унинг ичида нафси ўзига қарши уруш бошласа, алангаси кучайиб, чанги кўтарилсагина эълон қилади. Шунда унинг кўзлари кўр, қалблари гунг бўлиб қолади.
Жиноятчи, у - ҳар доим ичидан қон кетиб турган инсон.

Аммо ўз нафси билан тинч яшайдиган одам ҳар доим ҳамма билан ҳам тинчликда яшайди. У бировдан нафратлана олмайди ва ҳеч қачон бировга қурол кўтариш унинг ҳаёлига ҳам келмайди. У эҳтимол кулгу улашиши ёки қўшиқ куйлаши мумкин, аммо ҳеч қачон ўқ отиш ҳақида ўйламайди.
Чунки ўзгаларга нисбатан нафрат ўзига нисбатан нафрат туғилгандагина пайдо бўлади.

Доктор Мустафо Маҳмуднинг "Шайтон ҳукмронлиги" китобидан.

https://t.me/tuhur

Ягона Хожа

"Суннатда шундай хабар бор, Набий соллаллоҳу алайҳи васаллам рукуъдан бошларини кўтарганларидан сўнг шундай дер эдилар:
'Аллоҳумма, Роббана лакалҳамд, милъас самавати ва милъаларзи, ва милъа мабайнаҳума, ва милъа ма шиъта мин шайъин баъд. Аҳлуссанаи валмажди. Аҳаққу ма қолалабду – ва куллуна лака абдун. Ла маниъа лима аътойта ва ла муътия лима манаъта. Ва ла янфаъу залжадди минкалжадд.'

Шунингдек, Набий соллаллоҳу алайҳи васаллам намоз тугаганидан сўнг қуйидаги калималарни айтишни яхши кўрар эдилар:
'Ла илаҳа иллаллоҳу ваҳдаҳу ла шарика лаҳу. Лаҳул-мулку ва лаҳул-ҳамду ва ҳува ъала кулли шайъин қадир. Аллоҳумма ла маниъа лима аътайта, вала муътия лима манаъта, вала янфаъу зал-жадди минкал-жадду.'

Нега Расулуллоҳ алайҳиссалом бандаларга берувчи ҳам, ман қилувчи ҳам фақат Аллоҳ эканлигини бунчалар таъкидламасалар? Ҳеч бир инсон, қанчалик қудратга эга бўлмасин, бу ишларга аралашолмаслиги аниқку? Нега бу таъкидни ҳар кунги фарз бўлган беш вақт намоз билан боғлаяптилар?

Жавоб шундай бўлдики, инсон кўпинча қийинчиликка дуч келади, ёлғизлик ва ожизликни ҳис қилади. Шу ҳолатда унинг қалби қудрат ва мансаб соҳибларига мойил бўлади, улардан унинг қийинчилигини енгиллатишларини кутади. Бу туйғу нотўғри ва бутунлай мағлубиятдир, чунки ишлар ҳеч қачон Аллоҳнинг илкидан ташқарида бўлмайди. Ҳеч бир банда бошқа бир банданинг тақдирига ҳукм юритолмайди. Инсон учун энг тўғри йўл фақатгина Аллоҳга боғланиш ва Унга таваккул қилишдир.

Аллоҳ Қуръонда шундай дейди:
'Золимларга мойил бўлманг, акс ҳолда сизларни олов қўраси қаплайди. Сизлар учун Аллоҳдан бошқа ҳимоячи йўқ ва ёрдам ҳам ололмайсизлар.' (Ҳуд: 113)

Дунё бандалари ўртасидаги муносабатлар аксар ҳолда заифлар ва қудратлилар ўртасидаги манфаатларга асосланади. Баъзида ижтимоий анъаналар ва жамият қоидалари заифларнинг буюкларга, қудратлиларга боғланишига сабаб бўлади. Бу муносабатлар ҳақиқатга қарши чиқиб, пайғамбарларга душман бўлишга ҳам олиб келади. Аммо қиёмат кунида ҳамма бирдек Аллоҳнинг ҳузурида жавоб беради:
'Ҳаммалари Аллоҳ ҳузурига келадилар. Заифлар мутакаббирларга шундай дейдилар: "Биз сизларга итоат қилгандик. Энди сизлар бизга Аллоҳнинг азобидан бирор нарсани енгиллатасизларми?" Улар айтадилар: "Агар Аллоҳ бизни ҳидоят қилганида, биз сизларни ҳам ҳидоят қилган бўлардик. Эндиликда бизга сабр қилиш ҳам, нолиш қилиш ҳам барибир. Қочишнинг иложи йўқ."' (Иброҳим: 21)

Мен Мутанаббийнинг ўз хожаси Сайфуддавлага қандай ҳаддан ташқари ишониб, уни мақтаганидан ҳайратландим:
'Мен орзу қилган нарсаларда сенга суянаман,
Ва қўрққан нарсаларимда сендан паноҳ излайман.
Сен синдирган суякни инсонлар тиклай олмайди,
Сен тузатган суякни инсонлар синдира олмайди.'

Аммо Мутанаббийнинг ўз хожасига бўлган бу ишончи қиёмат кунигача давом этмади. Бир неча йил ўтиб, у уни инкор қилди ва Мисрга бошқа хожа қидириб кетди. У кетар экан шундай деган эди:
'Кофурни қасд қилганлар борки ундан ўзгасига боқмайди,
Зеро денгизни қасд қилган одам кичик дарёларга боқмайди.'

Инсон учун — ягона Хожа бўлиши ва Ундан бошқага боғланмаслик нақадар яхшидир."

Муҳаммад Ғаззолий - Аччиқ ҳақиқат

https://t.me/tuhur

Ҳаёт тарзингизни ҳеч кимга ошкор қилманг.
Сизга ҳасад қилиши мумкин, кимки уйингизга кўп марта кириб, унда нималар борлигини билган бўлса.
Ҳеч ким сизни уйингизни ўмара олмайди, фақат уйингизга кириб, ундаги маълумотга эга бўлган кишигина ўғрилай олади.
Ҳеч ким сизнинг режаларингизни барбод қила олмайди, фақат сиз унга сирларингизни ошкор қилган кимсагина барбод қила олади.
Сирингиз асирингиз, уни ошкор қилдингизми, бас сиз ўзингиз унинг асирига айланасиз.
Кимдир СИЗГА ҳасад қилиб ножўя маслаҳат бериш орқали ҳам сизни режангизни барбод қилишга ҳаракат қилиши мумкин.
Ҳеч ким оилангизга фитна қила олмайди, фақат уйингизга кўп кириб юрган одамгина бу ишни қила олади.
Нуқсонларингизни ҳам фақат яқин таниш одамларингизгина билишади.
Ҳар кимнинг энг яқин кишиси бор. Лекин ҳар қандай ҳолатда ҳам сирингизни сақланг. Ўзингиз сақлашга қодир бўлмаган нарсани, бошқалар сақлашини кутманг.

Мен бу ерда одамлар билан алоқани узиш керак демоқчи эмасман. Йўқ, балки ҳамма нарсада чегараларни белгилаб олиш кераклигини айтмоқчиман ва бу чегаралардан ўтмаслик керак. Ҳаётингизни ҳеч кимга ошкор қилманг, чунки одамлар қачон ўзгаради, билмайсиз.
Бир вақтлар қалбингизга ва руҳингизга энг яқин бўлган одамлар кейинчалик сиз энг кўп қўрқадиган одамларга айланиб қолишлари мумкин. Чунки сиз уларга қачонлардир ўзингизни, сирларингизни ва нуқсонларингизни ишониб топширгансиз.

Сирингиз сизнинг асирингиз бўлсин. Уйингиз сирли бўлсин ва оилангиз билан аралашиш учун ҳеч кимга рухсат берманг, қанчалик яқин қариндош бўлмасин. Уйингиз сирларини ҳеч кимга айтманг. Агар муваффақиятингизга ишончингиз комил бўлса, ҳеч кимдан маслаҳат сўраманг.

Хурсандчилик қалбингизга кирганида эга бўлган нарсаларингизни тарқатиб юборманг, ғазаб пайтида эса ўзингизнинг эга бўлган нарсаларингиздан воз кечиб юборманг. Ғазаб пайтида тилингизни тийинг, қувонч пайтида эса сахийлигингизни назорат қилинг. Узоқни ўйланг ва яқиндагига ўралашиб қолманг.

Шунчаки маслаҳат.

https://t.me/tuhur