Temur Khatamov

YouTube platformasiga joylangan “Men hayvonot bog‘idaman” nomli birinchi videorolik 20 yoshga to‘ldi

19 soniyalik ushbu videoda YouTube asoschilaridan biri Javed Karim fillarning xartumlari qanchalik uzunligiga hayron qolayotganini ko’rsa bo’ladi. Aynan shu e’tiborga loyiq bo‘lmagan rolik dunyodagi eng yirik videoplatformaning uzoq tarixini boshlab bergan.

Yubiley munosabati bilan YouTube videoga tort shaklidagi slayderni qo‘shgan, kanal foni esa fil suratiga almashtirilgan.

Sud Chrome brauzerini sotishga majbur qilgan taqdirda OpenAI uni sotib olmoqchi

ChatGPT ishlab chiqish bo‘limi rahbari Nik Tyorli Google’ga qarshi olib borilayotgan antimonopoliya ishi doirasidagi tinglovlar paytida bu haqda ma’lum qilgan. Joriy yilda sud Google’ni qidiruv bozorida monopolist deb topgan bo’lsa, AQSh Adliya vazirligi kompaniyani qayta tashkil etish tarafdori.

Muqobil variantlar orasida: Android operatsion tizimi, Chrome brauzeri, Google Ads kontekstli reklama xizmatini majburiy sotish hamda standart qidiruv tizimi slotini sotib olishga taqiq kiritish bor.

Tyorlining aytishicha, Chrome’ni sotib olish OpenAI’ga beqiyos imkoniyatlar eshigini ochadi. ChatGPT uchun allaqachon brauzer kengaytmasi mavjud, ammo sun’iy intellektni Chrome ichiga bevosita integratsiya qilish yanada ilg‘or mahsulot yaratishga yordam beradi.

Garchi ChatGPT Microsoft’ning Bing qidiruv tizimi bilan ishlasa-da, OpenAI hali ham Chrome’ni olish niyatida — sababi, Tyorli so‘zlariga ko‘ra, Bing kerakli sifatni bermayapti. Chrome esa kompaniyaga o‘z xizmatlarini keng targ‘ib qilishga yordam beradi.

Google ishi bo‘yicha tinglovlar uch hafta davom etadi, yakuniy qarorni esa sud avgust oyida e’lon qiladi.

Honor kompaniyasi kuchli GT Pro smartfonini taqdim etdi

Yangi GT Pro Snapdragon 8 Elite Leading Version protsessori bilan jihozlangan dunyodagi birinchi smartfon. Aslida bu chip Galaxy S25 smartfonlarida o‘rnatilayotgan Snapdragon 8 Elite protsessorining aynan o‘zi, faqat nomi boshqa — 8 Elite for Galaxy. Nomdan tashqari hech qanday farq aniqlanmagan.

Har ikkala versiya standart 8 Elite chipidan faqat ikkita yuqoriroq unumdorlikdagi yadroning tezligi bilan farq qiladi — 4,32 GHz o‘rniga 4,47 GHz.

Asosiy texnik xususiyatlari:

• Displey: 6,78" 2800x1264 LTPO AMOLED, 1–144 Hz
• Chipset: Snapdragon 8 Elite Leading Version
• Kameralar: 50 MP asosiy + 50 MP keng burchakli (122°) + 50 MP televik (3x) + 50 MP old kamera
• Xotira: 12+256, 12+512, 16+512, 16+1 TB
• Aloqa: 5G, NFC, Wi-Fi 7, Bluetooth 5.4
• Biometriya: Ekrandagi ultratovushli barmoq izi skaneri, yuzni aniqlash funksiyasi
• Namlikdan himoya: IP68/69
• Batareya va quvvatlash: 7200 mA·h, 90 Vt

Boshlang‘ich narx: 3699 yuan (≈$505).

Samsung kompaniyasi Galaxy S23 smartfonlari uchun One UI 7 (Android 15) operatsion tizimini tarqatishni boshladi

Bundan tashqari, One UI 7 - Galaxy S24 FE, Galaxy Tab S10+ va S10 Ultra, Galaxy Tab S9, S9+ va S9 Ultra, Galaxy Z Fold 5 va Flip 5 qurilmalari uchun ham tarqatila boshlangan.

Hozircha yangilanish faqat Janubiy Koreyada tarqatilmoqda, lekin Samsung boshqa davlatlarda ham yangilanishni tez orada boshlashi kutilmoqda.

Avvalroq One UI 7 - Samsung Galaxy S24, S24+ va S24 Ultra, Galaxy Z Fold 6 va Galaxy Z Flip 6 modellariga ham yetib kelishni boshlangan edi.

Mish-mishlarga ko‘ra: iPhone 17 Pro Sky Blue rangda chiqarilishi mumkin

Insayder Majin Buning xabar berishicha, iPhone 17 Pro va Pro Max modellari Sky Blue rangda taqdim etilishi mumkin. Bungacha xuddi shu rangdagi MacBook Air M4 chiqarilgandi.

Mazkur rangdagi smartfon prototipi sinov vaqtida kuchli taassurot qoldirgan va boshqa rang variantlari orasida favorit deb hisoblanmoqda.

Insayderning fikricha, bunday qaror Apple qurilmalari o‘rtasida uslubiy uyg‘unlik yaratib, ekotizimni yanada yaxlitroq ko‘rsatadi.

Oxirgisi: Vivo yangi Watch 5 aqlli soatlarini taqdim etdi

Yangi model yugurish uchun sun’iy intellekt asosidagi murabbiy funksiyasiga ega — u harakat texnikasini tahlil qiladi va real vaqt rejimida foydali tavsiyalar beradi. Soat og‘irligi atigi 32 gramm bo‘lib, Vivo’ning o‘z tizimi — BlueOS’da ishlaydi.

• Displey: 1,43 dyuymli AMOLED
• Korpus: alyuminiy yoki zanglamaydigan po‘lat, silikon yoki charm tasma
• Sensorlar: organizm holatini monitoring qilish, yurak urish tezligi, qon bosimi, uyqu sifati va shovqin darajasini kuzatish
• Aloqa: Bluetooth 5.4, GPS, NFC, Galileo, GLONASS
• Treninglar: sun’iy intellektli murabbiy, 100 dan ortiq mashg‘ulot turlari
• Avtonomlik: faol rejimda 11 kungacha, oddiy rejimda 22 kungacha ishlaydi
• Suvga chidamlilik: 5ATM

Narxi - 799 yuandan (≈$110) boshlanadi.

Vivo ikki yangi planshetni taqdim etdi — flagman darajadagi Pad5 Pro va byudjet toifasidagi Pad SE

Vivo Pad5 Pro — Dimensity 9400 protsessori bilan chiqqan ilk planshet bo‘ldi. Geekbench testida u bir yadroli sinovda 2721 ball, ko‘p yadroli sinovda esa 8480 ball to‘pladi.

Texnik xususiyatlari:

• Displey: Pad5 Pro - 13" 3096×2064 IPS, 144 Hz / Pad SE - 12,2" 2464×1600 IPS, 90 Hz
• Chipset: Pad5 Pro - MediaTek Dimensity 9400 / Pad SE - Snapdragon 4 Gen 2
• Kameralar: Pad5 Pro - 13 MP asosiy + 8 MP old kamera / Pad SE - 5 MP asosiy + 5 MP old kamera
• Xotira variantlari: Pad5 Pro - 8+128 GB, 16+512 GB / Pad SE - 6+128 GB, 8+256 GB
• Aloqa: Pad5 Pro - Wi-Fi 7, Bluetooth 5.4 / Pad SE - Wi-Fi 5, Bluetooth 4.2
• Biometriya: Yon tomonda joylashgan barmoq izi skaneri
• Ovoz: Pad5 Pro - 8 ta dinamik / Pad SE - 4 ta dinamik
• Batareya va zaryadlash: Pad5 Pro - 12050 mA·h, 66 Vt / Pad SE - 8500 mA·h, 15 Vt

Narxlar: Pad5 Pro - 2900 yuandan (≈$400) boshlanadi / Pad SE - 999 yuandan (≈$135) boshlanadi.

X200 seriyasidan yana bir yangilik — Vivo X200s

Bu model o'tgan kuzda chiqarilgan Vivo X200 smartfonining yangilangan versiyasidir. Undagi protsessor biroz tezlashgan, ultra-keng burchakli obyektiv sensori yangilangan, xotiraning yangi varianti qo‘shilgan va boshqa kichik o‘zgarishlar kiritilgan.

Texnik xususiyatlari:

• Displey: 6,67" 2800x1260 LTPO AMOLED, 1–120 Hz
• Chipset: Dimensity 9400+
• Kameralar: 50 MP (IMX921) + 50 MP ultra-keng burchakli + 50 MP televik + 32 MP old kamera
• Xotira variantlari: 12+256, 12+512, 16+256, 16+512, 16+1 TB
• Aloqa: 5G, NFC, Wi-Fi 7, Bluetooth 5.4
• Biometriya: ekran osti barmoq izi skaneri, yuz skaneri
• Namlikdan himoya: IP68/69
• Batareya va zaryadlash: 6200 mA·h, 90 Vt simli, 40 Vt simsız

Boshlang‘ich narxi: 4199 yuan (≈$575).