Tanzila Narbaeva

Buxoroga tashrifimiz doirasida Buxoro davlat universitetida «Ilm-fan sohasidagi ayollar va qizlar xalqaro kuni» munosabati bilan o‘tkazilgan forumda ishtirok etdik.

Forum doirasida oliy ta’lim muassasalarida mehnat qilayotgan, ta’lim olayotgan olima ayollar va talaba qizlarning ilmiy hamda innovatsion ishlanmalari ko‘rgazmasi bilan ham yaqindan tanishdik.

Shubhasiz, buxorolik olimalarimizning aholi salomatligini saqlash, ijtimoiy-iqtisodiy sohalarni rivojlantirishga oid loyihalari alohida e’tirofga loyiqdir.

Ushbu kun xotin-qizlarning ilm-fanga qo‘shgan hissasiga e’tibor qaratish va ilmiy sohalarda gender xilma-xillikning ahamiyatini kuchaytirish borasidagi kelgusi vazifalarni belgilab olish uchun yaxshi imkoniyatdir.

Mamlakatimizda 2030-yilgacha gender tenglikka erishish Strategiyasida ham ayollarni ilm-fan sohasida qo‘llab-quvvatlash, ularning intellektual va ijodiy salohiyatini oshirish asosiy yo‘nalishlar sifatida belgilangan.

Ilmiy faoliyatdagi opa-singillarimizga dadil g‘oyalar, ilmiy yangiliklar va kashfiyotlar yaratishlarida yanada ulkan yutuqlar tilab qolaman!

@tanzilanarbaeva

🇺🇿🇺🇿🇺🇿 Buxoro viloyatini ijtimoiy-iqtisodiy rivojlantirishga qaratilgan ishlar bilan tanishish maqsadida ushbu hududga tashrif buyurdik.

Dastlab viloyatning Peshku tumanidagi fermer xo‘jaliklari, "Bir mahalla — bir mahsulot" tamoyiliga asosan bajarilayotgan ishlarni ko‘zdan kechirdik.

Hamyurtlarimiz bilan samimiy muloqotlarimiz davomida ular o‘z tomorqalarida hosil yetishtirib, issiqxonalardan yaxshigina daromad olayotganiga guvoh bo‘ldik.

Tashrif davomida "Gʻijduvon tajribasi" asosida aholi, ayniqsa yoshlar va xotin-qizlarning mehnat qilishi uchun tashkil etilgan korxonalar faoliyati, ularda yaratilgan sharoitlar bilan tanishdik. Tadbirkorlar bilan qator uchrashuvlar o‘tkazdik.

Kambag‘allikni qisqartirishga qaratilgan islohotlarni amalga oshirishda “mahalla yettiligi”, tadbirkorlar, mahalliy ijro hokimiyati organlari va mahalliy Kengash deputatlarining hamkorligi hamda vazifalari yuzasidan zarur tavsiyalar berildi.

#senat #mahalliykengash #buxoro

@tanzilanarbaeva

Tailandda o‘tkazilayotgan veloshosse bo‘yicha Osiyo chempionati bizning sportchilarimiz uchun muvaffaqiyatli boshlandi. Barchamiz katta qiziqish bilan sportchilarimizning ishtirokini kuzatib bormoqdamiz.

Osiyo chempionatining ilk kunidayoq velosportchilarimiz jamoaviy va yakkalik dasturlarida oltin medalni qo‘lga kiritishdi. Ularning muvaffaqiyati qalbimizga cheksiz g‘urur, shodlik va iftixor tuyg‘usini bag‘ishladi!

Bugun esa veloshosse bo‘yicha Osiyo chempionati doirasida ayollar o‘rtasidagi individual vaqt poygasida Yanina Kuskova va Samira Ismoilova oltin medalga sazovor bo‘ldi. Asal Rizayeva esa bronza medalini qo‘lga kiritdi. Milliy terma jamoamiz ayni vaqtda medallar jamg‘arish reytingida 1- o‘rinni egallab turibdi.

Bundan tashqari, qit’a birinchiligida qatnashgan paravelosportchilarimiz 12 ta oltin, 9 ta kumush va 5 ta bronza, jami 26 ta medalga sazovor bo‘lishdi va umumjamoa hisobida 1-o‘rinni egallashdi.

Mana shunday yuksak yutuqlarga erishib, xalqaro sport maydonlarida yurtimiz nomini munosib himoya qilayotgan barcha sportchilarimiz bilan faxrlanamiz!

Oldinda sizlarni yanada katta marralar kutib turibdi! Ushbu g‘alabalar esa yangi yutuqlar uchun ilhom va katta kuch bag‘ishlasin! 🇺🇿

@tanzilanarbaeva

🇺🇿🇺🇿🇺🇿 Bugun Senat qoshidagi Yoshlar parlamentining birinchi yig‘ilishi bo‘lib o‘tdi.

Mahalliy kengashlarning 30 yoshgacha bo‘lgan deputatlari va faol yoshlardan tashkil topgan mazkur platforma ular uchun parlament yuqori palatasi faoliyatida ishtirok etish imkoniyatini beradi, kelgusi faoliyatlari uchun foydali zamin yaratadi.

Yoshlarimizning parlament hayotidagi ishtiroki biz uchun ham nihoyatda muhim. Qonunlarni ko‘rib chiqishda yoshlar manfaatlari e’tiborga olinganligini o‘rganish, joylardagi nazorat-tahlil tadbirlariga Yoshlar parlamenti a’zolarini jalb qilish orqali ularning takliflarini ko‘rib chiqish amaliyotini joriy qilishimiz zarur.

Qiziqarli o‘tgan muloqotimizda mamlakatimiz kelajagi bo‘lgan yoshlar uchun yaratilayotgan imkoniyatlar va sharoitlardan barcha farzandlarimizni bahramand etish yuzasidan yaqin hamkorlikda ishlashga kelishib oldik.

Yoshlar parlamenti a’zolarini ularga bildirilgan yuksak ishonch bilan samimiy qutlab, oldindagi faoliyatlarida katta muvaffaqiyatlar tilayman!

@tanzilanarbaeva