🌙 Tahmid.Uz

#АСИР...

Набий саллоллоҳу алайҳи ва саллам куёвлари мусулмон бўлмаган ва Абул Ос урушда мусулмонлар қўлига асир тушганини билар эдилар. Қизлари Зайнаб розияллоҳу анҳонинг қалби эса Абул Осга нисбатан муҳаббат асири эди.
Зайнаб розияллоҳу анҳо ўз заковати билан эрини озод қилиш учун фидя ўлароқ онаси Хадича розияллоҳу анҳодан қолган мунчоқни юборди. Зеро бу нарса Набиййимиз саллоллоҳу алайҳи ва салламга Хадичани эслатишини билар эди. Хадича розияллоҳу анҳо эса Набиййимиз саллоллоҳу алайҳи ва салламнинг қалбларини эгаллаган эди.
Зайнаб розияллоҳу анҳо мусулмонларга гўё: "Қалбим сизларнинг қўлингизда асирликда, уни озод қилинглар!", деяётгандек эди.
Набий саллоллоҳу алайҳи ва салламнинг "уруш ва муҳаббат асири"га раҳмлари келди. Уни озод қилдилар ва мусулмонларнинг розилиги билан мунчоқни ҳам қайтариб Зайнаб розияллоҳу анҳога бериб юбордилар.

#Қалблар ҳам гоҳида инсон каби асирга тушади. Қалбингиз асирларига ошиқлар бағрикенглигини кўрсатинг.
#Меҳрла уларнинг бандини ечиб юборинг. Атрофингизда эътибордан иборат панжара қуриб олинг. Улар учун юмшоқликдан қулф ясанг.
Асир тушган қалбга таскиннинг энг яхшиси нариги қалбдаги акс-садодир...

@Tahmid_uz

#БИР ОЯТ...
( ثُمَّ أَدْبَرَ وَاسْتَكْبَرَ )

Муддассир сураси. 23-оят

Яъни, "Сўнгра юз ўгирди ва такаббурлик қилди!".

#Заифлигидан, синиқ ҳолатда гуноҳ қилиш бошқа, гуноҳга эътиборсизлик қилиб такаббурлик билан гуноҳ қилиш бошқа.
#Бир кишига гуноҳ қилмаслигини айтиб насиҳат қиласиз. У сизга: "Мени дуо қилинг. Нафсимга, шаҳватимга кучим етмаяпти. Шайтон мени васваса қилаяпти. Нафсим эса буни менга зийнатли қилиб кўрсатаяпти!", дейди.
#Яна бошқа бир кишига гуноҳ қилмаслигини айтиб ваъз қиласиз. У сизга: "Нима муаммо? Умр бир марта берилади. Истаганингни қилиб қол!", дейди.

Иккиси ўртасида фарқ катта...

#Суфён ибн Уяйна роҳимаҳуллоҳ айтади:
"Кимнинг гуноҳи шаҳватдан бўлса унга яхшиликни умид қилса бўлади. Кимнинг гуноҳи кибрдан бўлса ундан қўрқсангиз бўлади. Чунки Одам алайҳис салом шаҳвоний истаги билан гуноҳ қилди. Аллоҳ уни мағфират қилди. Иблис эса кибр қилиб гуноҳ қилди. Натижада лаънатга учради...

@Tahmid_uz

#БИР ОЯТ...

وَلَا يَجْرِمَنَّكُمْ شَنَآنُ قَوْمٍ عَلَىٰ أَلَّا تَعْدِلُوا ۚ

Моида сураси 8-оят

Яъни, "Бир қавмни ёмон кўришингиз сизни уларга нисбатан адолат қилмасликка олиб бормасин!".

#Қаттиқ ёмон кўриш ҳам ҳалок қилгувчидир.
#Қаттиқ яхши кўриш ҳам ҳалок қилгувчидир.
#Аллоҳ таоло Юсуф алайҳис саломни иккисига ҳам мубтало қилди. Қаттиқ ёмон кўриш уни қудуққа ташланишига сабаб бўлди. Қаттиқ яхши кўриш эса уни зиндонга ташланишига сабаб бўлди.

#Биз гоҳида қалб жиловимизга эгалик қила олмаймиз. Аммо яхши кўрамизми ёки ёмон кўрамизми адолатга буюрилганмиз.
#Бировни яхши кўрганингиз учун унинг ёмонликларини ҳам яхшиликка айлантирманг.
#Бировни ёмон кўрганингиз учун унинг яхшиликларини ҳам ёмонликка айлантириб юборманг.
#Одил бўлинг. Нарсаларни ўз ўрнига қўя билинг.

#Абдуллоҳ ибн Муҳаммад Варроқ айтади:
"Биз Аҳмад ибн Ҳанбалнинг олдига келдик. У биздан сўради:
- Қаердан келаяпсизлар?
Биз дедик:
- Абу Курайбнинг мажлисидан!
Имом Ахмад деди:
- Ундан эшитганларингни ёзиб олинглар. У солиҳ инсон!
Биз дедик:
- Аммо у сизни ёмонлайди-ку!
Имом Аҳмад деди:
- У солиҳ инсон, аммо менга мубтало, яъни мен билан синалган бўлган!".

@Tahmid_uz

#БИР ОЯТ...

وَقَدِمْنَا إِلَىٰ مَا عَمِلُوا مِنْ عَمَلٍ فَجَعَلْنَاهُ هَبَاءً مَّنثُورًا

Фурқон сураси 23-оят

Яъни, "Ва Биз уларнинг қилган амалига келиб, уларни тўзон каби сочиб юборурмиз!".

#Ибнул Жавзий роҳимаҳуллоҳнинг "Баҳруд думуъ" китобида келади:
"Саъид ибн Жубайр айтди:
"Қиёмат куни бандага номаи-аъмоли келтирилади. Банда номаи-аъмолида ўқиган намозини ҳам, тутган рўзасини ҳам кўрмайди. Сўнгра дейди: "Эй Роббим! Бу бошқанинг китоби. Менинг кўп яхши ишларим бор эди. Бу китобда йўқ-ку!".
Унга шундай дейилади:
"Роббинг адашмайди ҳам, унутмайди ҳам. Сен одамларни ғийбат қилганинг учун амалларинг бошқаларга ўтиб кетди!".

#Аллоҳга бошқалар учун ибодат қилишдан эҳтиёт бўлинг.
Эрта қиёматда яхшиликларингиз сиз қалбини синдирган кишиларга, сиз молини ноҳақдан еганларга, сиз обрўсини тўккан кишиларга, ўртага одам қўйиб сиз мансабидан айирган ва унинг ўрнига ўтириб олган кишиларга ўтиб кетиши мумкин...

@Tahmid_uz

НАЙСОН ЁМҒИРИ ҲАҚИДА ҲАДИС БОРМИ?
#ҳадис

#Телеграм ижтимоий тармоғида Расулуллоҳ соллаллоҳу алайҳи васаллам: “Жаброил алайҳиссалом менга ўргатди. Сизларга уни айтиб бераман, ким найсон (апрель) ойида ёмғир ёққанда сувидан олиб, 70 мартадан фотиҳа, оятал курси, фалақ, нас, кафирун, сураларини ўқиб дам солиб ичса эркак ва аёл бепушт бўлса фарзанд кўради, фалаж бўлмайди, танадаги бор касалликлар тузалади, мазмунли хабар тарқалди. Ҳақиқатан ҳам шу маънодаги ҳадис борми?

💬 ЖАВОБ: Бисмиллаҳир Роҳманир Роҳим. Мазкур ривоятни ҳадис деб айтиш катта гуноҳ ҳамда Расулуллоҳ соллаллоҳу алайҳи васалламга нисбатан ёлғон тўқиш ҳисобланади. Бирорта ҳам эътиборли ва ишончли ҳадис китобларида бундай мазмундаги ҳадис келган эмас. Айрим уламолар уни ҳадис тўқиш билан шуғулланадиганларнинг тўқимаси эканлигини таъкидлаб ўтишган. Шунинг учун ҳар қандай маълумотларни, хусусан, динга оид маълумотларни тўғри ёки нотўғрилигини аниқламасдан туриб тарқатишдан жуда ҳам эҳтиёт бўлиш лозим. Бундай ишлар ёлғонга хизмат қилиш ва бошқаларни алдаш ҳисобланади.
Қолаверса, бу ёлғон оддий ёлғонлар каби шунчаки ҳаром бўлиб қолмай, жаҳаннам билан таҳдид қилинган гуноҳлар сирасига киритилгани ҳақида Пайғамбаримиз соллаллоҳу алайҳи васаллам бундай деганлар:
عَنْ سَعِيدِ بْنِ زَيْدٍ رَضِيَ اللَّه عَنْهُ قَالَ: سَمِعْتُ رَسُولَ اللَّهِ صلى الله عليه وسلم يَقُولُ: "إِنَّ كَذِبًا عَلَيَّ لَيْسَ كَكَذِبٍ عَلَى أَحَدٍ ، مَنْ كَذَبَ عَلَيَّ مُتَعَمِّدًا فَلْيَتَبَوَّأْ مَقْعَدَهُ مِنَ النَّارِ" (رَوَاهُ الإِمَامُ البُخَارِيُّ)
“Менинг номимдан (айтилган) уйдирилган ёлғон сўз бошқа бир киши номидан уйдирилган ёлғон каби эмасдир. Кимки менинг номимдан қасддан ёлғон сўз тўқиса, жаҳаннамдаги жойига тайёргарлик кўрсин!” (Имом Бухорий ривояти).
Ўрни келганда шуни ҳам таъкидлаш керакки, шу мавсумда, яъни, апрель ойида ёғадиган ёмғирнинг фойдалари тиббий жиҳатдан исботланган бўлса, соҳа мутахассисларининг кўрсатмаси бўйича истеъмол қилиш хато ёки гуноҳ ҳисобланмайди. Валлоҳу аълам.