Sultanbekdsgn - Product

Yil sarhisobi kunidamiz…

- kimlarni yoʻqotdik, kimlarnidir topdik va kimlardir oramizda yoʻq.

- kam narsa oʻrgandik, koʻp narsa oʻrganolmadik, hayot esa ayrimlarini majburlab oʻrgatdi.

- rejalaringiz nima boʻldi, qanchasi amalga oshdi? Amalga oshganlari reja qilganimizdan ortigʻi bilan a?

- nechchi marta sogʻligimiz bizga ulgʻayotganimizni eslatdi?

- sport bilan shugʻullanishni nechchi yildan buyon oʻzimizga vada beramiz? Oʻzimizga kuchimiz qachon yetarkan.

- Alloh biz kutmagan tomondan eng yaxshi tarix beryapti, sezyapsizmi?

- dasturchi boʻlishni kecha orzu qilib yurganlar bugun biror bir kodni hayolan RUN qila oladi.

- dasturchilarga algoritm va ingliz tilini bilish must have ekanligini endi tushungan middle boʻldingiz-a?

- ota-onasi borlar eng kuchli ekanini shu oʻtgan yilda yo otasini yoki onasini yoʻqotganlar bildi, siz kuchlisiz va baxtlisiz!

- sevganlar bor, sevgisini yoʻqotganlar bor. Sevgini saqlashni eng zoʻr yoʻllaridan biri xotiralar, goʻzal xotiralarni koʻpaytiring, goʻzal xotiralar sovgʻa qiling va koʻp-koʻp eslab turinglar.

- hadya berishni unutmang, eng sodda hadya shirin soʻzdir.

- 2024-yilda qilgan rejalarni unutmang, yangi 2025-yil keldi deb unutib yubormang. Bu shunchaki sanoq boshi va bugun yil sarhisob kuni xolos.

- 2023-yildagi rejalar ham orzuyingizni bir boʻlgan edi, undan avvalgi yillar ham shunda edi. Rejalaringizni yozib yuring.

P.S. Negadir bolaligimdan har yilgi ushbu kunda Allohni qudratini yanada koʻproq his qilib koʻzimga yosh keladi. Bizni suygan Allohga hamd boʻlsin. Shukur evaziga koʻp narsa berdi, men esa kam shukur qildim(((

Yaqinlarimiz sogʻ boʻlishsin, ilmimizni koʻpaytirib, rizqimizga va umrimizga baraka hamda xayr bersin. Melodiy 2025-yil kirib kelmoqda, sarhisob va tartib uchun yaxshi motiv. Atrofingizga qarang… naqadar goʻzallik. Bugun va hozir biz uchun eng goʻzalidir.

Oʻsha gap: kecha qaytmaydi, erta hech qachon kelmaydi, biz faqat bugunda yashaymiz!

Sehrli yo‘l yo‘q

Ingliz tilida "silver bullet" degan jumla bor. "Kumush o‘q" folklorda jodugar, vampirlarni o‘ldiradigan o‘q turi deb ta’riflanib, hozirgi kunda qaysidir muammoga bittada ishlaydigan yechimni anglatadi. Startapchilar odatda shu o‘qni qidiradi, loyihasidagi bir xususiyatni olib, buni o‘zining ustuvorligi deb ta’kidlaydi. Men ham shuni doim qidirardim.

Bu narsa yo‘q narsa. Ideal yechim, sehrli yo‘llar yo‘q. Uning o‘rniga bir nechta qo‘rg‘oshin o‘q izlash kerak, ya’ni qaysidir narsaga erishish uchun katta emas, kichik, odatda noqulay, qiyin muammolardan boshlash kerak.

Startapchi taqdimot qilyapti, investor unga savol beryapti, nega siz zo‘r bo‘lsangiz eng yaqin raqobatchidan 5 barobar kamroq pul topyapsiz deb. Unga javoban: chunki raqobatchimning tanishlari ko‘p, sayti eski bo‘lsa ham telefon qilib sotyapti deyapti. SAVOL: nega siz unda bunday sotmayapsiz? Nega siz yarim yildan beri sayt dizaynini yaxshilab yurib, mijozlar oqimini yo‘lga qo‘ymayapsiz? Tanish orttirmayapsiz? "Men ular kabi eskicha ishlamayman" — yohud ular qanday ishlashiga qiziqib ham ko‘rmaganman, menga hozirgi qilayotganim yoqyapti, sehrli yo‘lim shu. Sotishni ham yoqtirmayman, mana sayt qildim-ku, o‘zi tanishib chiqib men bilan bog‘lansin, odamlar bilan gaplashgani uyalaman. Eh... Mana tayyor ro‘yxat, telefon qil, mijoz bilan uchrashib, raqobatchingdan mijozlarni olib qo‘y, qo‘lingdan keladimi? Shunaqa deydigan odam topilmaydi, afsus.

Shunga bir vaqtning o‘zida bir nechta qo‘rg‘oshin o‘q bilan to‘pponchani o‘qlab, nishonga qarab otaverish kerak. Bitta kumush o‘q axtargandan ko‘ra cho‘ntagingizda bor o‘nta qo‘rg‘oshin o‘q afzalroq.

Agar bozorni yeb yubormoqchimisiz, hamma narsani qiling. Qaysidir o‘zingiz yaratgan, bozor tomonidan yaxshi tasdiqlanmagan xususiyatga aldanib qolmang.