Soliyev | Live

Gabriel Garsiya Markes o‘zining eng mashhur asari — «Yolg‘izlikning yuz yili» romani ustida ishlashni boshlaganida, uning hayoti qiyinchiliklar va yetishmovchiliklar bilan to‘la edi. Ushbu buyuk asariga o‘zini bag‘ishlash uchun u radikal qaror qabul qildi: uy-ro‘zg‘or ishlari va safarlar uchun foydalanishga yaroqli bo‘lgan yagona mashinasini sotdi va bir yarim yil davomida o‘z ishxonasiga qamalib oldi. Bu davrda Markes hatto eng yaqinlari bilan ham deyarli barcha aloqalarni to‘xtatdi, o‘zi yaratgan Makondo olamiga cho‘mgan holda, Buendia oilasi taqdirlarini belgiladi. Bu kunlar nafaqat yolg‘izlik va ijodiy tanholik kunlari edi — bu shubhalar va tuganmas qiyinchiliklar bilan to‘lgan og‘ir davr edi.

Har oy ijara haqi qarzlari ortib bordi. Sakkiz oy davomida uy egasi uning eshigini taqillatib, to‘lovni talab qildi, ammo Markes va uning oilasi hatto minimal to‘lovni qila olmas edi. Havoda qashshoqlik hidi anqirdi, biroq bu bilan birga mehnatning qiymatiga bo‘lgan mustahkam ishonch ham bor edi. Bu Nobel mukofoti bo‘lg‘usi laureatining hayotidagi eng qorong‘u, ammo hal qiluvchi pallalardan biri edi.

Roman nihoyat yakunlanganda, yangi, go‘yoki yengib bo‘lmaydigan to‘siq paydo bo‘ldi — Markesda qo‘lyozmani nashriyotga yuborish uchun 160 peso yetishmas edi. Bu mablag‘ ularning hayotidagi o‘zgarishlarga nisbatan juda kichik tuyulgan bo‘lsa-da, moliyaviy qiyinchiliklardan charchagan oila uchun yengib bo‘lmas devor edi. Oila kassasidan bor yo‘g‘i 80 peso yig‘ildi. Shu paytda Markesning jasur ayoli sahnaga chiqdi. U hurmatga sazovor qat’iyat bilan: «Faqat roman yomon bo‘lmasa bo‘ldi!» dedi va har kuni foydalanadigan ikki narsa - mikser va soch quritgichni garovga qo‘ydi. Bu nafaqat muhabbat ramzi, balki Markesning iste’dodiga, ular bergan qurbonliklar izsiz ketmasligiga mutlaq ishonch ramzi ham edi.

«Yolg‘izlikning yuz yili» nafaqat yaxshi roman, balki mukammal asar sifatida tan olindi va Garsia Markes eng mashhur kolumbiyalik yozuvchiga aylandi. Uning ijodi ta’siri Lotin Amerikasidan tashqariga yoyildi. New York Times gazetasi bu asarni Injilga qiyosladi va uni har bir inson o‘qishi shart deb ta’kidladi.

Markesning hayotining bu davri o‘z qiyinchiliklarimiz haqida ham o‘ylashga majbur qiladi. Shunday misollarni eslaganda, haqiqiy yutuqlar osonlik bilan emas, balki qo‘rquvlar, muvaffaqiyatsizliklar va mujodalada tug‘ilishini tushunasiz. Va aynan shunday asarlar sizga kuch ato etadi.

Buyuk yutuqlar buyuk sa’y-harakatlarni talab qiladi. Va Gabo tarixiga nazar tashlaganda, biz boshdan kechirayotgan barcha azoblarning o‘ziga yarasha ahamiyati borligini tushunamiz. Ular biz uchun buyuk narsaga erishish yo‘lining bir qismidir. Markesning o‘zi aytganidek: “Nimaiki boshingdan o‘tgan bo‘lsa bekorga emas”.

Muallif: Madi Raimov

"Odam suzishni cho'kayotganda o‘rganadi", degan gapni o‘qib qoldim.

Sal boshqacharoq aytganda cho'kayotgan odam suzishni o'rganishga majbur bo'ladi.

O'rganmoqchi, amalga oshirmoqchi bo'lgan ishlarimizda ham o'zimizni cho'kayotgandek his qilishimiz kerakmikan deb o'ylab qoldim.

Ana shunda natijaga tezroq erishish va uni uddalash ehtimoli doimgidan yuqoriroq bo'ladi.

Axir it sizni tishlashini bilsangiz, tezroq yugurasiz.

Odatda 1 daqiqada 500 metrga yugursangiz, it quvlagan vaqt 1 daqiqada 1 km ni bosib o'tishingiz mumkin.

Demak, 500 metr sizning haqiqiy tezligingiz emas. Xohlasangiz 1 km ga erisha olasiz.

Lekin buning uchun sizni quvlaydigan itni kutish yoki suzishni o'rganish uchun cho'kish shartmikan?)

O‘zingizdagi qaysi xislatni yo‘q bo‘lishini xohlaysiz?

Va qaysi xislat bor bo‘lishini xohlardingiz?

Masalan, men dangasaligim yo‘q bo‘lishini va intizomli bo‘lishni xohlardim.

@soliyev

Odob-axloq bu atrofingdagilarga ozor bermaslikdir!

Ko‘pchilik davrasida, hatto birgina hamrohingiz bo‘lsa ham baland ovozda gaplashish, musiqa qo‘yish va qisqa aytganda ularni chalg‘itish odobsizlik.

Do'konga, uyga, ofisga kirganda eshikni qattiq yopish odobsizlik. Yopilganda tabiiy qattiq ovoz chiqadigan bo'lsa ham avaylab, "sizlab" yopish mumkin.

Ovqatlanishdan oldin taomni hidlab yoki bir aylantirib ko'rib, chetga surib qo'yish odobsizlik. Siz bunday qilgan ovqatni boshqalar qanday yeydi? Chapillatish va hokazo axloqsizliklarga to'xtalib o'tirmadim.

Ko'p gapirish – odobsizlik. Ha, shunday. Keraksiz, boshni qotiradigan gaplar bilan suhbatdoshni bezdirish ham odobsizlik. U shunchaki axloqli bo'lgani uchungina sizni jim tinglayotgan bo'lishi mumkin. "Xafa bo'lib qolmasin", "boshqa kimgayam gapirardi" deb ko'nglingizni qoldirmaslik uchun bemaza gaplaringizni tinglab o'tirishiga majburlamang.

Kimdir sizga yozsa "sharpa" rejimini yoqib olib uni asabiylashtirish, o'qib turib javob bermaslik ham odobsizlik. O'sha odam yoqmasa bloklang, aks holda hurmatsizlik qilmasdan yozganiga javob bering. Telegramdan yozganlarini o'qimay turib, guruhda faol bo'lsangiz yoki o'zingiz instagramdan unga video jo'natganingizda hammasini tushunib oladi va hurmatingiz to'kiladi.

Hojatxona, yuvinish, kiyinish, muomala odobini yozib o'tirmadim.

To'g'ri, farosatsiz odam birgina shu postni o'qib axloqli bo'lib qolmaydi. Hatto 10 marta takrorlasangiz ham oldingidek kaltafahm bo'lib qolaveradi.

Lekin o'zi o'zgarishni istasa, farosatga ega bo'lishi mumkin. Shuning uchun o'zingiz bilan kelishib oling: befarosatligingiz sizga yoqadimi yoki odamga o'xshab yashashni istaysizmi?

@soliyev

O‘zbekistonda Telegram messenjeri faoliyatida uzilishlar kuzatilmoqda. Yoki oddiyroq aytganda telegram ishlamayapti degan xabarlarga ko'zingiz tushgan bo'lsa kerak.

Ha, uzilish bo'ldi. Lekin meni qiziqtirgan tomoni yuqoridagi kabi xabarlar ostida "Yaqinlaringizga yuborib, ogohlantirib qo'ying" deb yozishgani.

Telegrami ishlamasa, men yuborgan xabarni qanday ochadi?) Odatdagidek ko'rinadigan, lekin qiziq ishlar ko'p.