#qonunchilikdagi_yangiliklar

Ўзбекистон Республикасининг “Лицензиялаш, рухсат бериш ва хабардор қилиш тартиб-таомиллари тўғрисида"ги Қонунига киритилган ўзгартиришлар (ЎРҚ-956) ижроси бўйича Вазирлар Маҳкамасининг 2024 йил 18 декабрдаги 847-сон қарори қабул қилинди.

Қарор билан халқаро курьерлик ва божхона брокерлик ташкилотларини хабардор қилиш тартибида рўйхатга олиш паспортлари тасдиқланди.

✅ Қарорга асосан Божхона брокерларига қуйидаги талаблар қўйилди:

- юридик шахс бўлиши;
- божхона тўловлари тўланишини таъминлаши (1000 БҲМ миқдорида);
- солиқ ва божхона тўловларидан қарздорлиги бўлмаслиги;
- штатида икки ва ундан ортиқ мутахассислар бўлиши;
- бир ой ичида уч маротабадан ортиқ маъмурий жавобгарликка тортилган мутахассисни ўқитиши;
- мутахассислари ҳар икки йилда малака сертификатини янгилаши зарур.

Қарор билан Халқаро курьерлик ташкилотларига қуйидаги талаблар қўйилди:

- юридик шахс бўлиши;
- божхона тўловлари тўланишини таъминлаши (1000 БҲМ миқдорида);
- солиқ ва божхона тўловларидан қарздорлиги бўлмаслиги;
- штатида икки ва ундан ортиқ мутахассислар бўлиши;
- жўнатмаларни ҳисобини юритиш ҳамда трекинг кузатиш имконини берувчи ахборот тизими мавжудлиги ва божхона тизими билан интеграцияси;
- жўнатмани тушириш, сақлаш учун 50 м2дан кам бўлмаган омбори бўлиши;
- омборда 3 ойлик сақлаш хажмига эга видеокузатув тизими бўлиши;
- жўнатмани ташиш учун махсус жиҳозланган автотранспорт бўлиши зарур.

✅ Мутахассисларни ўқитиш Божхона қўмитаси томонидан тасдиқланган дастур асосида амалга оширилади.

✅ Рўйхатга олиш “Лицензия” ААТ тизимида амалга оширилиб, унга божхона, солиқ, адлия, бандлик идоралари интеграция қилинади. Реестрдаги асосий талабларга мувофиқлиги божхона органлари томонидан текширилади.

✅ Реестрни юритиш бўйича масъул қилиб Божхона қўмитасининг Божхона назоратини ташкил этиш бошқармаси белгиланди.

Қарор расмий эълон қилинганидан 3 ой ўтиб, малака сертификатига оид талаблар эса 2025 йил 1 октябрдан кучга киради.