SAFAR

Ёдингизда бўлса, бундан бир ой олдин Исландиянинг 4 кунлик иш ҳафтасига ўтиши бутун дунёда шов-шув бўлганди. Исландиядаги ўрта мактаб ўқитувчиси Мария Хьялмисдоттир бу ислоҳотнинг амалдаги натижалари ҳақида ёзибди.

Маълумки, Исландия 2019 йилдан буён иш ҳафтасини 36 соатгача қисқартириш бўйича муваффақиятли ислоҳотларни амалга ошириб келаётган эди. Бунинг натижаси ўлароқ, 90%га яқин исландиялик ҳозирда камроқ ишлаш имкониятига эга. Бу камроқ стрессга чалиниш, ишдан қониқиш ҳиссининг ортиши ва шахсий ҳаёт учун кўпроқ вақт ажратишга ёрдам берди.

Айниқса, бу ўзгариш аёлларнинг оила ва ишни уйғунликда олиб боришида енгиллик туғдиргани катта ютуқ сифатида эътироқ этилмоқда. Эркаклар ўз навбатида фарзандлари ҳаётида фаолроқ иштирок этиш имкониятига эга бўлди. Энди одамлар оила билан ўтказиш ёки шифокорга бориш, дўкондан маҳсулотлар харид қилиш ва спорт билан шуғулланиш каби зарурий ишлар ўртасида танловни амалга ошириши шарт эмас.

Бу тажриба Германия, Португалия ва Буюк Британия каби давлатларни ҳам пилот лойиҳаларни ишга туширишга ундади, Бельгия эса қонунчилик томонидан барча ҳохловчилар учун тўрт кунлик иш ҳафтасини жорий қилган илк ЕИ мамлакатига айланди.

Исландия тажрибаси шуни кўрсатдики, иш вақтининг қисқариши иш унумдорлиги ва хизмат кўрсатишга зарар етказмади. Аксинча, қаҳва учун узоқроқ муддатли танаффуслардан воз кечиш эвазига улар аввалгидек қолди ёки ундан ҳам яхшиланди.

Иш ҳафтасининг қисқариши Рейкьявик аҳолиси жума кунлари доимий дуч келадиган пробкалардан ҳам қутулишга ёрдам берибди.

Хуллас, қисқа иш ҳафтасининг турган битгани фойда экан. Бу хабарни кимга юборишни биласиз😁

@safarblog

Олимлар «чиройли» қаришга нималар ёрдам беришини аниқлади

International Social Work нашрида эълон қилинган янги тадқиқот оилавий ҳолат ва муносабатлар тарихи муваффақиятли қаришга таъсир кўрсатишини исботлади.

Тадқиқот 7 000 нафарга яқин кекса канадаликни қамраб олди ва қизиқ гендер фарқларни ажратиб кўрсатди.

🔹 Уйланган иштирокчилар ҳеч қачон оила қурмаганларга нисбатан кўркамроқ қаригани маълум бўлди.

🔹 Ҳеч қачон турмуш қурмаган аёллар ажрашган ёки беваликни бошидан кечирган аёлларга нисбатан чиройлироқ қарилик аломатларини намоён этди. Бунда турмуш қурган аёлларнинг қариш борасида ёлғиз аёллардан устун жиҳати йўқлиги аниқланди.

Ҳар икки жинс учун кўркам қариш омиллари сифатида қуйидагилар белгиланди:
- Ижтимоий алоқаларни қўллаб-қувватлаш
- Мунтазам жисмоний фаоллик
- Чекишдан воз кечиш

Тадқиқотчилар муваффақиятли қариш тушунчасига комплекс ёндашилгани ва бунда нафақат жисмоний, балки руҳий ва ижтимоий ҳолат ҳам ҳисобга олинганини таъкидлади.

Бўйдоқларнинг 2025 йилда уйланмаслиги учун сабаб қолмади, менимча😁

@safarblog

Муваффақиятли бўлиш пойгаси

Бугун кўпчиликнинг эътибори ҳаётда ўз ўрнини топиш ва шахсий ривож мавзуларига қаратилган. Инстаграмдаги муваффақиятли блогерлар, миямиздаги «блок»ларни олиб ташлаш орқали «орзуларимизга эриштирадиган» мотиваторлар, осон пул топиш йўлларини ўргатадиган коучлар ҳар куни ўзларининг муаллифлик курслари, марафону вебинарларини таклиф қилади. Ўхшатиш қўполу, ижтимоий тармоқда кўрганини қиладиган одам бошқаларни кузатиб, илҳомланадиган куколдни эслатади.

Нима учун доимий ривожланиш пойгаси хавфли?
1️⃣ Иш унумдорлиги культи мувозанатни бузади
Одам ҳамма нарсани манфаат призмаси орқали кўра бошлайди. Ҳатто оилавий байрамлар ҳам «мувафаққиятли омад»ни намойиш қилиш инструментига айланади.

2️⃣ Ўсиш ўрнига хафсаласизлик
Сурункали чарчоқ ва «бошқа чидолмайман» ҳолати одатий ҳолга айланади. Уйғунлик ва ривожланиш ўрнига мотивацияни йўқотиш, эмоционал кризис ва депрессия.

3️⃣ Ўзини актуаллаштириш ғоясини нотўғри талқин қилиш
Абрахам Маслоу шахсий ривожланишла шахснинг бетакрор салоҳияти намоёнини кўрган. Бугун унинг ғоялари нотўғри талқин қилиниб, инсоннинг қадри у эришган ютуқлар билангина ўлчанадиган самарадорлик учун тинимсиз пойгага айланди.

🛑 Шахсий ривожланиш одамнинг ички хоҳишларини қондириш ва иқтидорини бзага чиқариш йўли эмас, жамият хаспўшлаётган идеалларга мос бўлиш мажбурияти кўринишини олди.

Сиз қандай фикрдасиз? Агар сиз ҳам қалб касбингизни топиш ёки даромадингизни ×10га ошириш бўйича курсларда қатнашган бўлсангиз, натижалари билан изоҳларда бўлишинг.

@safarblog

Тармоқларда бир гуруҳ тадбиркорлар Uzum Nasiya орқали маблағларини олишда муаммолар юзага келаётгани ҳақида хабарлар тарқалганди. Бугун Uzum Nasiya вакиллари берган расмий баёнотда кўп масалага ойдинлик киритилибди. Унга кўра, Ўзбекистон қонунчилиги ва платформа қоидаларини бузганлар масаласи бўйича ҳам аниқ гап айтилган.

Унга кўра, қоидабузарликлар тасдиқланмаган ҳолатларда тадбиркорларга пул маблағлари тўлиқ қийматда қайтариб берилади ва платформадаги аккаунтдан фойдаланиш ҳуқуқи тикланади; Платформа қоидалари бир неча маротаба бузилган ҳолатларда Uzum Nasiya пул маблағларини қайтариб беради, лекин сотувчининг аккаунтини блокдан чиқармаслик ҳуқуқини ўзида сақлаб қолади; Платформа қоидалари ва Ўзбекистон Республикаси қонунчилиги мунтазам равишда бузилган ҳолатларда пул маблағлари ва аккаунтлар блокдан чиқарилмайди;

Маблағлар тез орада сотувчиларнинг ҳисобига ўтказиб берилади.

@safarblog