Asliddin Sabriddinov | Blog 🇺🇿🇵🇸

Uchdan keyin kech

Yaqindagina "Sony" korporatsiyasi asoschilaridan biri Masaru Ibukaning "Uchdan keyin kech" nomli kitobini o'qib tugatdim, ammo bu kitob na "Sony", na biznes va na shaxsiy rivojlanish haqida. Bu kitob bolalarni 3 yoshgacha tarbiya qilish haqida.
Men bu kitobni o'qish jarayonida eng muhim 4 xulosani oldim:

1. Bolalar biz tasavvur qilganimizdan ko'ra juda katta energiyaga ega. Men butun kitobni 2 ta gapga sig'dirib bera olganimda, muallif kitob yozishni o'ziga ep ko'rmagan bo'lardi, nazarimda. U minglab bolalarni yillar davomida kuzatgan va bo'lajak ota-onalar uchun juda kerakli xulosalarni taqdim etgan.

2. Bola tarbiya qilish haqida kitob o'qish uchun ota-ona bo'lishni kutish shart emas. Shunchaki butun biologiya tirik mavjudotlarning hammasi o'zidan nasl qoldirish uchun yashashini ko'rsatadi. Yangi avlodlar yangi xususiyatlar bilan tug'iladi. Har bir qimirlagan jon o'zidan shunday iz qoldirishga urinar ekan, nega endi biz ham o'z kelajagimizni farzandlarimiz bilan tasavvur qila olmaymiz? Ota-onalikka tayyorgarlik bu ayb yoki uyatli ish emas, bu o'z kelajagimiz uchun kiritgan eng katta investitsiyadir.

3. Kitob o'qiganlarning hammasi kitobxon emas. Biz ovqatni uning hidiga, ta'miga, ko'rinishiga va yana ba'zi bir shaxsiy xohishlarimizga ko'ra saralaganimiz kabi kitob saralashni o'rganishimiz shart, chunki umrimiz barcha kitoblarni o'qib chiqishga yetmaydi, eng yaxshisini o'zimizga ravo ko'rishimiz kerak. Ajratishni bilmasak, biladiganlardan so'rashimiz zarur, bu muammo emas.

4. Kitob o'qimaslikka keltirgan deyarli barcha sabablarimiz yolg'on. Ushbu postni o'qigan kunimning ertasigayoq shaxsan o'zimda sinab ko'rishga ahd qildim. 2 hafta ichida shahardan Parkentga 4-5 marotaba qatnashga to'g'ri keldi, tabiiyki, avvallari men yo'lda faqat uxlardim, ana shu 4-5 martada esa hech bir qiyinchiliksiz yuqoridagi kitobni tugatdim. Ha, endi men uni "yo'lchiboy" kitob deb atay olaman, chunki boshqa paytda men uni ochib qarashga ham ulgurmagandim. Bundan tashqari men shunchaki kundalik yumushlar (ovqat qilish, kir yuvish) bahonasida Iqbol Mirzoning "Bonu" romanini audio shaklda tinglab tugatdim. Hikoya-qissalardan farqli ravishda, bu men tugatgan eng katta audio kitob bo'ldi.
Kitob o'qishdan to'xtab qolishimiz mumkin emas. Xohish bo'lsa, imkon topiladi ekan, mening qo'limdan kelgan ish boshqalarnikidan ham kelishiga ishonaman.

💐@marjonas_planet