Сенларга ачинаман
Мен ўқитувчиман.
Таълимнинг қозонида қовурилаётганимга анча бўлди. Шундай кунлар бўлдики ўқитувчиликдан кетишга қарор ҳам қилганман. Сабаби ишнинг оғирлиги ёки маошнинг камлиги эмас, касбига нолойиқ, ўқитувчиликка номуносиб инсонларнинг соҳада ишлаши ва уларнинг сони кўпайиб кетганлиги эди.
Аслида мен ҳам фаришта эмасман. Айбларим талайгина. Лекин ён атрофимда "педагог" дипломини дастаклаб мактабни тирикчилик манбаига айлантириб олган минглаб саводсиз, қалбида на меҳр, на севги, на одамийликдан зарра бўлмаган "робот"ларни кўриб ачиниб кетаман. Дарди фақат пул, бойлик бўлган бу каслар мурғак болажонларда яхшилик уруғларини ундириш эмас, ўзлари каби манқурт, нафс бандалари қилиб тарбиялашаётгани фожеа.
Тўғри, моддийлик аҳамиятга эга. Мен буни инкор этмайман. Лекин илм бериш, Устозлик шарафи бойликка хирс қўйишдан устун.
Кўча кўйда, интернетда ўзимдан уялиб кетаман. Чунки аксарият "ўқитувчи"лар саводсиз. Уч тўрт жумлани тўғри ёза олишмайди. Фамилиясини тўғри ёза олмайдиган "педагог"лар борлигини айтсам ер у осмон ёнади.
Шу "ўқитувчи"лар умрларини нолиш, инграш, ёмонлаш билан ўтказишяпти. "Таълим жарга қулади, мактаблар тугади, у порахўр, бу бузуқ, маошлар кам, отпускной тушмади..."
Иғво, миш-миш, ва ҳоказо гаплар.
Эй нолиётган банда!
Сенда виждон борми?
Ризқ Аллоҳдан эканига иймон келтирганмисан?!
Хатолар, камчиликлар бор. Мен инкор этмайман. Педагогларнинг захматли ишлари учун бу маошлар оз.
Лекин сен ҳақ экансан, минғирлайвермасдан қонуний асосда судга арз қил. Бурчингни ва ҳуқуқингни билар экансан мардларча кураш. Кучинг, билиминг, сабринг етмадими - секингина четга чиқ. Халқнинг боласини алдашдан, 20 соат дарс олиб ҳаромдан бола боқишдан қутиласан.
Бахтли яшаш учун сен орзу қилган 4 хонали уй, машина, кумуш идишлар, чет элга саёҳат шарт эмас.
Оддий, беташвиш оилангда нонни сувга тегизиб, самимий яшаш бахт.
P.S. Кўп ва хўп ёзмоқчи, ичимдаги дардларимни тўкиб солмокчи эдим. Лекин аёлим уйғониб қолди. У бу каби ёзишимга қарши. Мени эҳтиёт қилади. Унинг айтишича менинг ёзганларим "робот"ларга таъсир қилмас экан. Ношукрлик, жохиллик кўзларини қамаштириб қўйган экан.
Майли, таъсир қилмас. Лекин виждонимга нимадир дедимку.
Мен таълимни, чин Устозларни хеч қачон танқид қилмайман.
Мени айримлар ёмон кўришади. Юзимга ҳам айтишади - бу ҳақиқатчилинг кимга керак? Ёки нимадир ўзгаришига ишонасанми? Овора бўлма...
Мен барибир ёзаман, ёзавераман!
Умидим бор!!!
https://t.me/qishloqlikmuallim
