Paxtaobod tumani hokimligi Matbuot xizmati

#Пахтаобод тумани

Пахтаобод туманидаги “Маданият-1” автоматик газ тарқатиш шохобчаси туман марказидан 18-20 км масофада жойлашганлиги сабабли табиий газ таъминотида, айниқса куз-қиш иситиш мавсумида магистрал газ қувурларида табиий газ босими пасайиши боис аҳоли хонадонларида узилишлар кузатилар эди.

Мана шу муаммоларни ечиш ва у орқали аҳолига табиий газни узлуксиз етказиб бериш мақсадида янги газ тармоғи тортилмоқда.

“Пахтаобод тумани “Бўстонобод” МФЙ ҳудудидаги “Маданият - 1“ АГТШ аҳоли тармоғидан “Навбаҳор” МФЙ ўрамидаги “А.Навоий” кўчаси бошланиш қисми, Пахтаобод маркази йўналишидаги диаметри D-273мм юқори босимли газ тармоғигача диаметри D-159 мм бўлган 3,2 км газ тармоғини қуриш ишлари бошланди. Ушбу тармоқ ички имкониятлар орқали суюлтирилган газга мослаштирилган ҳудудларидаги газ тармоқларини демонтаж қилиш орқали амалга оширилмоқда.” – дейди “Ҳудудгаз Андижон” газ таъминоти филиали бош муҳандиси Хуршидбек Қодиров.

Янги тортилаётган тармоқ натижасида туман марказидаги “Нодирабегим”, “Қўқонқишлоқ”, “Муаззинбой”, “Бобурмирзо”, “Наврўз”, “Мустақиллик”, “Юқори”, “Ҳабибий” каби 20 та маҳалла фуқаролар йиғинларидаги жами 7 727 та аҳоли хонадонларида табиий газ таъминоти янада яхшиланиши кўзда тутилган.