Nukus.uz

"Терек егиўге мениң үлесим" акциясы бойынша Нөкис қаласы ҳәкимлигиниң МҮРӘЖАТЫ

Бүгинги күнде елимизде турмысымыздың әҳмийетли мәселелеринен болған жасыл әлемди сақлаў ҳәм жасыллықты көбейтиў мәмлекетлик сиясат дәрежесине көтерилди.

Президентимиз Ш.Мирзиёев: "Жасыл мәкан" - ҳүжданымыз, келешектеги турмысымыз, перзентлеримиз алдындағы жуўапкершилигимиз" екенин айрықша атап өткен еди.
Ҳүрметли Журтбасшымыздың "Республикада жасыллық дәрежесин және де арттырыў, "Жасыл мәкан" улыўма миллий жойбарын избе-из әмелге асырыў арқалы екологиялық турақлылықты тәмийинлеў илажлары ҳаққында"ғы 2023-жыл 23-ноябрьдеги ПП-199-санлы Пәрманы ҳәм Министрлер Кабинетиниң "Жасыл мәкан" улыўма миллий жойбары шеңберинде әмелге асырылып атырған илажларды қоллап-қуўатлаў илажлары ҳаққында"ғы 2024-жыл 30-ноябрьдеги 804-санлы қарары тийкарында мәмлекетимизде кең көлемли жумыслар әмелге асырылмақта.
Быйылғы бәҳәрде "Жасыл мәкан" жойбары шеңберинде Нөкис қаласында 400 мың түп нәл егилиўи мөлшерленген. Аймақларда бағлар жаратыў, жол бойларына саяманлы тереклер егиў бойынша жумыслар баслап жиберилген.
Қаладағы "Теле орай" мәҳәллеси аймағында 2 гектар жер майданында "Мениң бағым" жойбары шеңберинде бағ шөлкемлестириў режелестирилип, онда мыңнан аслам мийўели ҳәм саяманлы тереклер егилиўи нәзерде тутылған.

Елимизде терек егип, жасыллық жаратыўды қәлеўшилер көп. Бирақ, қала аймағындағы министрликлер, уйымлар, жоқары оқыў орынлары, сондай-ақ, кәрхана, мәкеме ҳәм шөлкемлер "Терек егиўге мениң үлесим" сүрени менен өз басламасы тийкарында ҳәммеге өрнек көрсетиўи керек.
Себеби, бул басламалар арқалы ҳәр бир нәл оны еккен адам ямаса шөлкем атына тамғаланады. Ал, бул егилген нәллер жыллар өтип, қайырлы иске өз үлесин қосқан инсанларда мақтаныш оятатуғынына, әлбетте, исенемиз.
Егилген нәллерди тәрбиялаў ушын Абаданластырыў басқармасы менен жуўапкер шөлкемлер бириктирилип, оларға ўазыйпалар жүкленген.
Қаладағы барлық 71 мәҳәлле жетилиги өз аймақларын абаданластырыў ҳәм көклемзарластырыў, нәллерди егиў ҳәм тәрбиялаўға бас-қас болып, халықтың экологиялық мәдениятын арттырыўда үгит-нәсиятлаўға әҳмийет қаратылған.
Қала қурылысы кеңеси жаңа қурылыслар майданының кеминде
30 процентине терек егиў миннетлемесин қойып, нәлдиң түрлерине шекем белгилеп бермекте.
Көп қабатлы турақ жайлар аймағының әтирапларында да жасыл бағлар шөлкемлестирилиўине айрықша итибар қаратылмақта. Бул аймақларда терек ҳәм гүллер егиў, оларды тәрбиялаў, салмаларды тазалаў, көшелерди жақтыландырыў менен бирге, шығындыларды алып шығыўға қатаң қадағалаўға алынады.
Әзиз ўатанласлар, бәҳәр мәўсими келиўи менен әмелий жумыслар ўақты келди. Пайтахтымыз Нөкис қаласында терек егиў ҳәм оларды тәрбиялаў турақлы процесс есапланады. Сонлықтан да, Сиз де бул илажларға белсене қатнасып, жасыл челленджге қосылың ҳәм қайырлы иске өз үлесиңизди қосың!