NIYET.UZ | Рәсмий канал

#рамазан

Рамазан сөзлиги

Рамазан – Рамазан арабша «ар-ромад» деген сөзден алынған болып «қуяш жүдә ысып, қайнап кетиўин» аӊлатады. «Рамазан» деп аталыўына себеп, бул айда гуналар күйдириледи. Оларды жандырып, күл қылатуғын нәрсе салиҳ әмеллер.

Ораза – қарақалпақ тилине «ораза» деп аўдарма қылынатуғын «соўм», «сиям» сөзи сөзликте нәпси қәлеўлеринен өзин тыйыўды билдиреди. Шәрият терминологиясындағы мәниси болса «нийет етип, таӊ атқаннан күн батқанға шекем нәпсиниӊ еӊ үлкен қәлеўлери қатарына кириўши жеп-ишиў ҳәм жынысый қатнаста болыў сыяқлы зәрүрликлерден тыйылыў».

Тараўиҳ – сөзликте «дем алыў, рәҳәтлениў» мәнилерин аӊлатады. Шәрият терминологиясында болса «рамазан айы кешелеринде қуптан намазынан кейин, ўитр намазынан алдын оқылатуғын бекитилген сүннет намазы».

Хатм – тамамлаў. Тараўиҳ намазларында Қураны кәриймди бир айда еӊ кеминде бир мәрте оқыў.

Тасбиҳ – Аллаҳ тааланы ҳәр түрли Өзине ылайық болмаған сыпатлардан пәклеп яд етиў.

Тараўиҳ тасбиҳи – тараўиҳ намазларында ҳәр төрт рәкаатта дем алыў ушын отырғанда айтылатуғын тасбиҳ.

Итикаф – сөзликте «қандайда бир нәрсени услап турыў, турып қалыў» деген мәнилерди билдиреди. Шәриятта болса «мешиттиӊ ишинен шықпай, Аллаҳ таалаға жақын болыў нийетинде бир неше күн ибадатты лазым табыў» мәнисин аӊлатады.

Қадр түни – Аллаҳ таала Қураны кәриймде “мыӊ айдан жақсырақ кеше ” деп тәрийплеген, оныӊ пазыйлети ҳаққында өз алдына «Қадр» сүресин назыл қылған түн. Көпшилик уламалар қадр түни рамазан айыныӊ ақырғы он күнлигиниӊ тақ түнлеринен излеў кереклигин айтады.

Фитр садақасы – инсан өзин пәклеў, оразада жол қойған базы кемшиликлер орнын толықтырыў, кәмбағал ҳәм мүтәжлерге жәрдем болыўы ушын белгиленген қаржылай ибадат. Бирлемши итияжларынан артықша табысқа ийе болғанлардыӊ фитр садақасын бериўлери ўәжиб болады.

Шайхи фәний – Рамазаннан басқа ўақытларда да, өмириниӊ ақырына шекем ораза туталмайтуғын инсанлар. Мысалы жүдә кексейген ҳәм кеселликке шалынғанлар.

Фидя – сөзликте «орнына» деген мәнини аңлатады. Қандайда бир үзирли себеп пенен ораза тутыўға жағдайы жетпейтуғынлар ҳәр рамазанныӊ ҳәр бир күни ушын бир мискинди бир күнлик тағам менен тойдырады.

Каффарат – үзирсиз, қастан оразаны бузған адам жаза сыпатында еки ай үзликсиз ораза тутады. Буған шыдамы жетпесе, 60 мискинди азанда ҳәм кешқурын аўқатлантырады.

✨✨✨✨✨✨✨✨✨✨

Биз бенен социаллық тармақларда бирге болың!

👉Telegram| Instagram| Facebook| YouTube

#күн_ҳәдиси

КИМДЕ-КИМ ОРАЗА ТУТҚАННАН КЕЙИН БИЛИП ТУРЫП ЖЕП-ИШСЕ.

     Бул ҳаққында Әбиў Ҳурайра разыяллаҳу анҳудан рәўият қылынады:     
     «Нәбий саллаллаҳу алайҳи ўа саллам: «Ким Рамазаннан бир күнди Аллаҳ берген руқсатсыз аўзы ашық ҳалда өткерип, заманның ҳәммесин ораза тутып өткерсе де оның қазасын орынлай алмайды», деди».
     Бул ҳәдистеги Аллаҳ берген руқсат булар - қартайғанлар, сапардағылар, наўқас адамлар, емизиўли ҳәм жүкли ҳаяллар, ҳайыз ҳәм нифас болған ҳаяллар. Демек, булардан басқа ҳеш ким Рамазанды оразасыз өткериўи мүмкин емес.

✨✨✨✨✨✨✨✨✨✨

Биз бенен социаллық тармақларда бирге болың!

👉Telegram| Instagram| Facebook| YouTube