Nigora Hasanova blogi

-Eng qiyin narsa nima?
-O'zni anglash.
-Eng oson narsa-chi?
-O'zgalarga maslahat berish.
-Kimni baxtli sanash mumkin?
-Jismonan sog'lom, ruhiy xotirjam hamda iste'dodini o'stira olgan kishini.
-Baxtsizlikka dosh berishning eng oson yo'li nima?
-G'animlarning sendan-da yomon ahvolga tushib qolganiga guvoh bo'lish.

@nigorahasanovasblog

Men uchun 2024- yilda o'zbek tiliga o'girilgan TOP 5 ta asar

2 - “Shaxsiy xona”

Albatta, Virjiniya Vulf va uning ana shu asari. Bu-har bir ayol va uning rivojlanishi, ma'naviy yuksalishini istagan har bir erkak mutolaa qilishi kerak bo'lgan asar. Nega o'qilishi kerak? Birinchidan Vulf juda ko'p ayollar shaxsiy fikri va o'zligini erkin ifoda etolmasligi sabablarini ijtimoiy hatto tarixiy faktlar bilan o'rgangan ekan. Yozuvchining fikricha, har bir ayolda iste'dod bor, ammo sharoit va imkoniyat yetishmaydi. Agar ularda mablag', imkoniyat va erkinlik bo'lsa, o'zlarini to'la namoyon etishlari mumkin. Asar hayotda o'z o'rni, qadrini topishni istagan ayollar uchun yozilgan. Muvaffaqiyat yo'llari ko'rsatilgan.

Meni o’ziga tortgan tomoni esa asarni o’zbekchaga o’girgan tarjimon Nodirabegim Ibrohimovada ham bir nimalar o’zgardi. Bu ijodlarida ham sezildi😉 Nima o’zgarish bo’lganini intervyuda so’rab olaman)
@nigorahasanovasblog

Men uchun 2024- yilda o'zbek tiliga o'girilgan TOP 5 ta asar

1-Ishg’ol qilingan uy

Tarjima sohasida maqtanadigan va maqtaladigan yangiliklardan biri Xulio Kortasarning asarlari o'zbek tiliga o'girilgani bo'ldi. Yangi lotin amerikasi romanining asoschilaridan biri Kortasarning asarlarini yuzlab millat kitobxonlari o'qishadi , muallifni yaxshi tanishadi. Zero, u jahon adabiyotida muhim, kerakli, mashhur va katta yozuvchi. Lekin o'zbek kitobxonlariga shu vaqtga qadar yaxshi tanitilmagandi. Asosan ispan tilidan tajribali tarjimon Sharifjon Ahmad yozuvchining 17 ta hikoyasini tarjima qildi va ular bir kitob holiga keltirilib chop etildi. So'zboshi o'rnida keltirilgan adabiyotshunos Nazar Eshonqulning ma'lumotlari sizga Xulio Kortasar ijodi va uning olami bilan yaqindan tanishishga yordam beradi. U “...jahon adabiyotida o'ziga xos maktab yarata olgan ijodkorlarning asarlarini tarjima qilish badiiy voqeylik..” deydi. Bunday asarlar tarjimasi adabiy didning, saviyaning, umuman adabiyotga bo'lgan qarashlarning o'zgarishiga turtki beradi. Xullas, sotuvdagi kitoblar orasida dizayni , sifati va ajoyib muqovasi bilan ajralib turgan ushbu asarga ko'zingiz tushsa albatta xarid qiling. Hatto sizga Kortasar og'irlik qilsa ham, yuqorida aytganimdek did, saviya tarbiyalanadi, haqiqiy adabiyotni yaqindan tanib olasiz.

Keyingi post TOP 5 talikka kiritilgan yana bir yangi tarjima asar haqida

@nigorahasanovasblog

Aql bilan mansabga erishish mumkin. Mansab bilan aqlga erishib bo‘lmaydi. Dunyoda mukammal narsa yo‘q. Hatto Muhabbat deb atalmish oliy tuyg‘uda ham adolatsizlik bor. Kim qattiqroq sevsa, o‘sha ko‘proq iztirob chekadi. Insonning bahosi bu dunyoda o‘zi olgani bilan emas, o‘zidan qolgani bilan belgilanadi.

O‘tkir Hoshimov

@nigorahasanovasblog

“Ishg'ol qilingan uy”ni o'qidim.

Bir o'tirishda o'qishlik hikoya ekan. Ammo Kortasar olib kirib ketgan mavhum va sirli muhitdan osongina chiqib ketolmaysiz.👣👣

Tasvir, bayon usuli, ruhiyati juda g'alati va sirli. Yoshlari qirqqa borib qolgan aka-singil bir uyda yashaydi. Ikkisi ham oila qurishni hayoliga keltirmaydi. Singil tinimsiz to'qiydi. Ular kun bo'yi uy-ro'zg'or yumushlari bilan o'zlarini ovutib o'tiraveradi. Juda g'alati va mubham muhit…

Xo'p, davom etamiz. Ular istiqomat qiladigan uyni esa katta, muhtasham deb ham tasavvur qilish mumkin , qorong'u, nursiz, g'amgin katalakdek g'arib uy deb ham tasavvur qilaversiz. Bir qarashda hikoyada aka-singilning yashash tarzi, turmushi, ular istiqomat qiladigan uy tasvirlangandek.

Hikoyaning asosida nima bor deb bir pas o'ylab o'tirdim. Voqealar shunday boryaptiki, uy asta-sekinlik bilan ishg'ol qilinyapti. Qizig’i bu kattagina uyni kimlar zabt etayotgani , nega, qanday .. Faqat g’alati ovozlar eshitilaveradi xolos, tushunmaysiz. Yozuvchi nega bu kuchlarga, ularning kimligiga to'xtalmagan, bunga meni aqlim yetmadi.Balki , siyosiy qarashlar bordir.. 🕸️

Qaysi uyda noma'lum ovozlar eshitilsa akasi o'sha xonani qulflab qo'yaveradi va u xonadan umidini uzaveradi. Borib-borib bu shovqin butun uyni egallaydi. Nega aka-singil kurashmaydi, nega noma'lum ovozlarga taslim bo'ladi, nega oxir-oqibat uyni butunlay tark etib ketadi hamma xulosa kitobxonga qoldirilgan.

O'ta sirli , yoqimsiz shu bilan birga yoqimli ajoyib sayr bo'ldi menga. Hikoya shunday ajoyibki , men bu mistika deb ham o'yladim. 🎩
Ya’ni, aslida ular tirik emas degan xulosaga ham bordim. Aytdimku, juda sirli bir nima. Nima bo'lsa? 👀

Kortasar boshimni aylantirib yubordi)) Zerikarli dunyoingizdan chiqib, bir o'qib ko'rsangiz bo'larkan. Ochig'i maza qildim

@nigorahasanovasblog

Keling yangi qalblarga, sehrli olamlarga sayohat qilamiz.

Kitob o'qiydigan insonlarning olami boshqacha bo'ladi. Ularni kuzatish sizga juda yoqadi ishoning.

Bahonada yashashning yangicha tarzi va yoqimli onlarini boshlab olasiz. Ular sizga yordam berishadi.

Unutasiz va sizga yoqimsiz bo'lgan har qanday nazoratlardan xoli, o'z sayohatingizni boshlaysiz. Mana ular:
havola

-Eng go'zal narsa nima?
-Odam. Chunki u Allohning mahsulidir.
-Eng tez narsa nima?
-Aql. U hamma narsani ortda qoldiradi.
-Hammadan donoroq narsa-chi?
-Vaqt. Chunki vaqtgina hamma narsani oydinlashtiradi.
-Hamma uchun umumiy narsa nima?
-Umid. Chunki u hech vaqosi yo'qlarda ham mavjuddir.
-Eng kuchli narsa nima?
-Zaruriyat. Chunki u hamma narsaning ustidan hukmronlik qiladi.

@nigorahasanovasblog

Odam fikrining oldiga to'siq qo'ymasligi kerak. Bu to'siq erinchoqlik yoki qo'rquvdan kelib chiqadi. O’qigan, bilimdon odam esa qo'rqmaydi.

@nigorahasanovasblog

Buvimni ziyorat qilib keldim. Avvalgi safar borganimda ancha tetik edilar. Oradan hech qancha vaqt o’tmadi, ammo bugun kulib turgan ko’zlarida boshqa narsa ko’rdim. Juda ma’noli , juda sirli bir narsa.

Buvim juda chiroyli ayol bo’lganlar, kulsalar ko’kimtir ko’zlari yonib ketadi. Ohanrabolari bordek. Oq bilak xonimni ta’blari ham nozik , o’zlari ajoyib quvnoq ayol edilar. Bo’ylari baland, havasi ketadi ko’rgan odamni rosti. Rahmatli buvam yaxshi ko’rib qolgan ekanlar. 3 qiz va 1 o’g’ilni katta qilib, to’ylarini birga ko’rishgan. Men kichkina qiz edim, avval tog’am rahmatli bo’ldilar, ketlaridan ayriliqqa chidolmay buvam. Shunday go’zal ayol qaddi bukildi. Og’il va er sog’inchida qo’shiqlar aytardilar kechalari. Oradan ancha yillar o’tib ketdi, ammo ayolning bardoshini qarang, sog’inch o’rtab yuborsa ham yig’lab turib kula oladi.
Bugun ham har doimgidek, qo’llarida buvamni kulib turgan suratlari. Avval bizga ko’rsatmas edilar, bugun esa suratni lablariga bosib to’yib-to’yib o’pdilar, o’zim o’rgilay deb qo’yadilar suratga qarab. Shunday chiroyli, ko’rkam erimni berib o’tiribmana, deb qo’yadilar alamdan , ko’zlari esa hali ham chiroyli , yoshlarini onam artadilar . Flora dadangni sog’inib ketdim deydilar onamni yelkalariga boshlarini qo’yib. Necha yildirki ularning sog’inchida yashaydilar. Bardosh desa bir nimadan quruq qolgandek yugurib boradi-da bu ayol zoti. Men bir buvimga, bir qo’llaridagi suratga qarab qo’yaman. Ichim g’alati bo’lib ketdi . Havasim keldi. Baxtli yashadilar ammo yakunida sinov keldi, lekin chiroyli sabr qilyaptilar. O’sha baxtli onlardan mana shu 4-5 ta surat qoldi va uni ustidagi chirib ketgan cellofan. Buvi boshqa paket beray, yangi paketga solib qo’ying bu suratlarni, deyman aslida shu eski sellofan paket ham buvim uchun naqadar qadrli ekanini bilsam ham. Yana ham ishonch hosil qilgim keldi sadoqat va muhabbatlariga.
“Yo’q, tegma!” dedilar , ko’zlari esa havotirdan kattarib ketdi.
Buvim men uchun sadoqat namunasilar. Ular e’zozlayotgan eski suratlar biz uchun bir parcha qog’oz xolos. Ular uchun esa naqadar qadrli. Hamma narsalariga aylanib bo’libdi bu suratlar. Shularni kuchi bilan uyg’onib, bag’irlariga bosib yana uyquga ketar ekanlar.

Vaqt buvimdan asta-sekin hamma narsani tortib olyapti. Bugungi bizdagi bu chiroy, bu salomatlik, tetiklikning oxiri ko’rinib qolganda biz ham shunday kulib turishga kuch topa olarmikinmiz? Bugungi bizda bor hamma- hamma narsa, barcha ne’matlar bilan qarilik soya solganda baribir xayrlashamiz. Hammasi g’animat) Kuzatib o’tirib allanechuk bo’lib ketdim. Vaqtning beshafqatligini.. Nima uchun yashayapmiz, nimaga buncha chiranamiz, nemalarga siqilamiz, arzimas narsalarga ko’z yosh to’kamiz. Ehh, umrimizni shunday o’tkazib yuboryapmiz-ku. Odamlar 4-5 ta eski suratlar bilan ham baxtli…

@nigorahasanovasblog