Nasihat.uz

ГУНОҲКОРДАН НАФРАТЛАНМАНГ

Шу нарсани ёдда тутиш лозимки, фисқу фужур ва гуноҳлардан нафрат қилмаслик ҳам гуноҳдир. Гуноҳлардан нафрат қилиш ва уларни ёмон деб билиш иймон ва исломнинг тақозоси.
Лекин гуноҳларга мубтало шахснинг ўзига нисбатан қалбда хақорат бўлмаслиги лозим. Балки унга раҳм қилиш керак. Бир одам бемор бўлса ва муолажа учун шифокор олдига борса, энди унга қараб: “сен нега касал бўлдинг?” дея ундан норози бўлиш шифокорнинг иши эмас. Балки, “бу бечора дардга мубтало бўлибди”, деб касалга раҳм қилади ва муолажани бошлайди ҳамда “Аллоҳим! Унинг дардини кетказ!” дея ҳаққига дуо қилади. Гуноҳкор, фосиқ ва фожир одам билан ҳам худди шундай муомала қилиниши лозим. Уларнинг фисқу фужурига ғазаб ва нафрат бўлсин. Лекин унинг ўзига нисбатан эмас. Балки, “Бу менинг Аллоҳимнинг яратган бандаси” деган эътибор билан унга муҳаббат қилсин ва Аллоҳ таоло уни тўғри йўлга бошласин дея дуоларида илтижо этсин.

“Насиҳатлар гулдастаси”дан.
@mehrob_uz

Ҳаж ибодати ва умра зиёратига тенг амал борми?

❓ Савол: Ҳаж ва умра зиёратига тенг амал бор деб ўқидим. У икки ракат зуҳо намози экан. Шу тўғрими? Ўқилиш тартибини қандай.

📩 Жавоб: Сиз ўқиган ривоят мана бу : “Ким бомдодни жамоат билан ўқиса, сўнгра қуёш чиққунча Аллоҳни зикр қилиб ўтирса, кейин икки ракат намоз ўқиса, унинг учун ҳаж ва умранинг ажридек бўлур. Тўлиқ, тўлиқ, тўлиқ”, дейилган.
Демак, сиз бомдодни жамоат билан ўқийсиз, кейин то қуёш чиқиб намоз ўқиш мумкин бўладиган вақт бўлгунча, яъни қуёш чиққанидан 15 дақиқа ўтгунча зикр, истиғфор, тиловати Қуръон, салавот ва дуода бўлиб ўтирасиз ва икки ракат намоз ўқийсиз. Ана шу тартибда ўқисангиз, ваъда қилинган ўша улкан ажрга эга бўласиз. Аммо шуни ҳам таъкидлаш керакки, бу билан зиммага фарз бўлган ҳаж соқит бўлмайди. Валлоҳу аълам.

“Фатволар тўплами”дан.
@mehrob_uz

Ҳеч нарса зарар қила олмайди

Абдураҳмон ибн Абу Зинод отасидан, отаси Абон ибн Усмондан нақл қилади: Усмон ибн Аффон розияллоҳу анҳудан эшитдим: Расулуллоҳ соллаллоҳу алайҳи васаллам дедилар: «Ким ҳар куни тонгда ва ҳар кеча шомда «Бисмиллаҳиллазий лаа язуру маъасмиҳи шай‘ун-фил-арди ва лаа фис-самааи ваҳувас-самииъул-ъалийм», деб уч маротаба айтса, ҳеч нарса унга зиён етказмайди».
Абонга касаллик етганди. Уни эшитаётган киши тикилиб қолди.
Нима учун қараб қолдинг? Ҳадис худди сенга айтиб берганимдек. Бироқ мен (дард етган) куни ушбу дуони ўқимаган эдим, мана, Аллоҳнинг қадари устимда жорий бўлди, – деди Абон.

Ҳадисдаги дуонинг таржимаси: “Унинг исмини айтганда Ер ва осмонда ҳеч нарса зарар қила олмайдиган Аллоҳнинг исми билан бошлайман. У Аллоҳ эшитувчи ва билувчидир”.

@mehrob_uz

Жаҳрий ва махфий намозлар, махфийлик даражаси

❓Савол: Намоздаги махфийлик ёки овоз чиқариб ўқиш тўғрисида: беш вақт намозда фарз намозлари энг ками ўзи эшитадиган даражада ўқиладими?

📩Жавоб: Қироат намознинг рукнларидан бўлиб, қайси намозларда қироат жаҳрий қилинади ва қайси намозларда махфий қилинади ҳамда уларнинг даражаси қай йўсинда буни билиб олишимиз керак.
“Мухтасарул виқоя” китобида бу мавзуда бундай дейилади:
“Имом жума ва икки ҳайит намозларида, шунингдек, бомдод намозида, шом ва хуфтон намозларининг аввалги икки ракатида овоз чиқариб қироат қилади. Намозни вақтида адо қилса ҳам, қазо қилса ҳам. Бошқаларида овоз чиқариб қироат қилмайди”.
Яъни имом пешин ва аср намозларида, шом намозининг учинчи ракатида ва хуфтон намозининг кейинги икки ракатида овозини чиқармай қироат қилади.
“Ёлғиз намоз ўқувчи намозни вақтида адо этса, жаҳрий ёки махфий ўқишда ихтиёрли. Ёлғиз ўқувчи қазо намозини ўқиса, махфий қироат қилиши вожибдир (“Захира” ва “Қозихон” китобларида ёлғиз намози ўқувчи қазо намозини ўқиганда ҳам жаҳрий ва махфий ўқишда ихтиёрли бўлиши саҳиҳ кўрилган).
“Овоз чиқариб қироат қилишнинг энг паст даражаси ўзидан бошқага эшиттиришдир. Махфий ўқишнинг энг паст даражаси ўзи эшитадиган даражада бўлишидир”.
Ўзидан бошқа эшитмайдиган даражадаги қироатни “овоз чиқариб қироат қилиш” деб бўлмайди. Демак, овоз чиқариш лозим бўлган қироатда ақалли ўзига энг яқин турган киши эшитиши лозим экан.
Махфий қироат намозхоннинг ўзи эшитадиган даражада бўлмаса, қироат дуруст бўлмайди. Валлоҳу аълам.

“Фатволар тўплами”дан.
@mehrob_uz

Энг яхши амаллар

Абдуллоҳ ибн Масъуд розияллоҳу анҳу Расулуллоҳ соллаллоҳу алайҳи васалламдан: «Аллоҳ таолога энг суюкли амал қайси?» деб сўради. Расулуллоҳ соллаллоҳу алайҳи васаллам: «Вақтида ўқилган намоз», дедилар. Ибн Масъуд: «Ундан кейингиси-чи?» деди. Пайғамбар алайҳиссалом: «Ота-онага яхшилик қилиш», дедилар.

@mehrob_uz