Уақыт деген кері ақпайтын бұл өзі
Бұрқ-сарқ етіп таудан құйған тас бұлақ.
Қызық-ақ тым, қатал-ақ тым мінезі,
Асықпасаң бара жатыр басқылап.

Әкелердің әр тайдырып жүзінен,
Аға болып өтіп жатыр арынды.
Іні болып қуалайды ізіңнен,
Сенен тіпті әлдеқайда дарынды.

Қарап тұрсаң сен шыққан тау олардан
Әлдеқайда, әлдеқайда аласа.
Өтіп жатыр қыз боп жаны толы арман,
Сүйгеніңнен әлдеқайда тамаша...

©️ Төлеген Айбергенов. Мен саған ғашық едім: Өлеңдер