Mingbuloq.uz

Xorijda mehnat qilayotgan yoshlar bilan onlayn muloqot o'tkazildi

Mingbuloq tumani hokimi Ahrorbek Mansurov xorijda mehnat qilayotgan mingbuloqlik yoshlar bilan onlayn muloqot o'tkazdi.

Muloqot davomida yoshlar xorijdagi mehnat sharoitlari, duch kelayotgan qiyinchiliklar hamda o‘zlarining kelajak rejalariga oid fikrlarini bildirishdi. Ayniqsa, ularni ishga joylashish, huquqiy masalalar, kasb-hunar o‘rganish va kredit olish imkoniyatlari qiziqtirdi. Hokim ushbu masalalar yuzasidan tegishli tashkilotlar bilan hamkorlikda ish olib borilayotganini ta’kidladi.

Shuningdek, tadbirda xorijdagi yoshlarni qo‘llab-quvvatlash va ularning huquqlarini himoya qilish bo‘yicha davlat tomonidan amalga oshirilayotgan ishlar haqida ham ma’lumot berildi. Hokimlik vakillari tuman yoshlari uchun yaratilayotgan imkoniyatlar, jumladan, yangi ish o‘rinlari, tadbirkorlikni rivojlantirish uchun berilayotgan imtiyozlar haqida batafsil tushuntirish berishdi.

Muloqot ochiq va samimiy ruhda o‘tdi. Yoshlar o‘z muammolarini bevosita hokimga yetkazish imkoniyatiga ega bo‘ldi. Ushbu uchrashuv kelgusida ham muntazam tashkil etilishi, xorijdagi yoshlar bilan aloqa mustahkamlanishi va ularning qiziqtirgan masalalar bo‘yicha amaliy yordam ko‘rsatilishi rejalashtirilgan.

Tuman madaniyat markazida 8-mart bayrami keng nishonlandi

Bugun tuman madaniyat markazida 8-mart – Xalqaro xotin-qizlar kuni munosabati bilan bayram tadbiri bo‘lib o‘tdi. Tadbirga jamiyatda faoliyat yuritayotgan ayollar, kam ta’minlangan oilalar vakillari hamda turli sohalarda fidokorona mehnat qilayotgan 600 nafardan ziyod xotin-qizlar taklif etildi.

Bayram tadbirida tuman hokimi Ahrorbek Mansurov so‘zga chiqib, barcha ayollarni bayram bilan muborakbod etdi. U o‘z nutqida xotin-qizlarning jamiyatdagi o‘rni, ularning oilada va ishda tutgan muhim mavqei haqida to‘xtalib o‘tdi. Shuningdek, ayollarga hurmat va e’tibor ko‘rsatish, ularning huquqlarini himoya qilish hamda turmush sharoitlarini yaxshilash borasida amalga oshirilayotgan ishlar haqida ma’lumot berdi.

Bayram tadbiri davomida san’atkorlar kuy-qo‘shiqlari bilan mehmonlarga ko‘tarinki kayfiyat ulashdi.

Tadbir samimiy va quvonchli muhitda o‘tdi. Yig‘ilgan mehmonlar bayram shukuhidan bahramand bo‘lib, madaniy hordiq chiqarishdi.

Shu kabi tadbirlar ayollarga bo‘lgan hurmat va e’tibor ifodasi bo‘lib, ularning jamiyatdagi o‘rnini yanada mustahkamlashga xizmat qiladi.