Ali's Mind

#iqtibos

Kecha ajoyib bir jumlani o'qib qoldim.

Give a man a mask. And he will show you his true face. (Bir kishiga niqob bergin, ana shunda u senga asl yuzini ko'rsatadi)

So'z isbotsiz bo'lmas deganidek, isbot uchun 2020-2021-yillarga qaytamiz.

TikTok chiqib yoshlar buzilib ketdi deb aytishdi, aslida yoshlarni qanaqaligini TikTok ko'rsatib berdi.

Shunchaki yuqoridagi jumladagi niqob vazifasini TikTok bajarib berdi xolos.

P.S: Keltirilgan gapning muallifi kimligini bilmayman.

✍ @mind_alis

#fikr

Bir kitobni 1 oydan beri qidiraman, hech topa olmayotgan edim. Oxiri Qashqadaryodagi bir inson orqali zo'rg'a topdim.

Shunga bir xursand bo'lib o'yladim: Jamiyatimizda kitobxonlar ko'payib ketyaptimi yoki u kitob kam adadda chiqarilganmi? 😅

P.S: Qaysi kitobligi qiziq bo'lsa shaxsiyga yoki anonim bot ga yozing aytaman)

✍ @mind_alis

#fikr

Har narsadan ma'no izlang...

Al-Musavvir zot bu dunyodagi har bir narsani biz uchun saboq olsa bo'ladigan qilib yaratdi.

Bu uchun shunchaki atrof-muhitga e'tiborli bo'lishning o'zi yetarli.

Bunga bu dunyodagi birinchi misol:

1. Odam alayhissalomning ikki o'g'li Qobil va Hobil janjallashib, biri ikkinchisini o'ldirib qo'yadi. Keyin ikkita qush (adashmasam qarg'a edi) kelib xuddi aka-ukalardek janjallashib biri ikkinchisini o'ldirib qo'yadi va o'lgan qushni dafn qiladi. Shunda Odam alayhissalom shu voqeani ko'rib o'lgan o'g'lini ham xuddi qush dafn qilganidek, dafn qiladi;

2. Pastga tushish juda oson, tepaga chiqish esa qiyin.

Buni ilm misolida olsak bo'ladi, o'qish-o'rganib ilmda yuqorilash qiyin, hech narsa qilmay miyani bekorchi narsalarga to'ldirish juda oson;

3. Chumolilar biror «jarlik»ka duch kelishsa, hammalari birgalikda yig'ilishib, o'zlaridan ko'prik yasashar ekan va shu orqali «jarlik»dan o'tib ketishar ekan

Insonlar faqatgina birlashibgina katta kuch bo'la oladi. Yolg'iz inson katta ishlar qila olmaydi;

4. Suv kemaning ichiga kirsa kemani cho'ktiradi. Aksincha bo'lsa kema unda erkin suzadi.

Dunyoni suv, kemani inson deb tasavvur qiling.

Va hokazo...

✍ @mind_alis

#fikr

O'qisang — yozib mustahkamla.
Yozmasang — yaxshisi o'qima.

Izoh:
Oldinlari kitoblardan ba'zi iqtiboslarni telegram account'imga yozib saqlab qo'yar edim. Bu uncha ham foyda bermas edi.

Shu kunlarda o'qigan kitoblarimdan iqtiboslarni bir bloknotga yozishni boshladim.

Juda foydali usul ekan.
Kitob mazmunini miyaga muhrlab qo'yar ekan.

Sizlarga ham tavsiya qilaman.

✍️ @mind_alis

#iqtibos

Modda uchun yerning tortishish kuchi qanday ta'sir qilsa, inson tabiati uchun dangasalik ham shundaydir. Dangasalik bizning asosiy holatimizni ifodalaydi.

© Dr. Adham Bakar - Iroda tarbiyasi kitobidan.

✍ @mind_alis

#iqtibos

Yusuf Xos Hojib hazratlari aytadilarkim: «Qiz ermas bu yalnchuq, kishilik qiz oʻl» («yalnchuq» – odam demakdir, «kishilik» – odamiylik, «qiz» – «qadrli» degan maʼnoni anglatadi.

Hikmatning mazmuni: «Odamning oʻzi qadrli emas, odamiyligi qadrlidir».) Ana shu qadrga yetishmoqlik yoʻllarini izlab koʻraylik.

© Tohir Malik - Odamiylik mulki

✍ @mind_alis

#fikr

Xo'p, samimiylik bizga nima beradi?

- Yuzlarimizga sunnat bo'lmish tabassumni qaytaradi;
- Insonlar orasida o'zaro ishonchni, go'zal muomalani, hurmatni paydo qiladi;
- Ota-ona va bola o'rtasidagi aloqani mustahkamlaydi va hokazo.

Tarixdan ma'lumki ota-bobolarimiz necha asrlar davomida butun dunyoni boshqardi va ularga madaniyat bo'yicha, ilm bo'yicha uztoz bo'lib keldi.

Nega shunday buyuklikni qo'ldan boy berdik?
O'zi bizga shunday jazolab, urib tarbiyalash qayerdan kelib qoldi?
Nega Yevropaliklar yoki boshqa rivojlangan davlatdagilar farzandini urib tarbiyalamaydi?
Nega ularda samimiylik o'zgacha?

Aholimizning asosiy qismi musulmon.

Islom bizni farzandni urib tarbiyalashga targ'ib qiladimi?

Balki Islom ta'limotlaridan uzoqlashganimiz uchun ham dunyoni qo'ldan boy bergandirmiz?

Meni ham yoshlikda dadam ba'zida kaltaklardi. O'shanda dadam yoshligida bo'lgan voqealarni aytib berardi: «Sen hali ham bizni davrdagi bolalardek kaltak yemayapsan, bir qo'shnimizni uyida 4 ta o'g'il bor edi, hammasi otasini oldida qaltirab turar edi. Otasi shunaqa urardiki, ko'rib, og'rig'ini o'zimda his qilardim, unisini ko'tarib yerga otadi, bunisini ko'tarib devorga uradi va hokazo»

Buni aytishim qanchalik to'g'ri bilmadim, lekin o'zimiz samimiy bo'la olmaganimizdan keyin kelajak avlodni ham shunday tarbiyalamaylik degan maqsadda yozdim.

O'zligimni yo'qotganman, «sohta niqob»imni haligacha yechishga kuchim yetmadi. Kelajakda farzandlarim ham shunday bo'lishini istamayman, sizlarga ham bunday tarbiya usulidan umuman foydalanmaslikni tavsiya qilaman.

«Sohta niqob»imni faqat yaqinlarim oldida yechishga kuchim yetadi, shunda ham asl o'zligimni topa olmadim va bilmadim qachon topaman...

P.S: Oxirigacha o'qiganingiz uchun rahmat. Vaqtingizga rozi bo'ling)

✍ @mind_alis

#fikr

Nega bizda samimiylik yo'q?

Avvalo bir ogohlantirish (inglizchasiga aytganda «disclaimer») berib o'tib ketsam: Maqsadim ota-onalarni ayblash emas, albatta har birimiz ota-onamizni yaxshi ko'ramiz, ular uchun borimizni beramiz. Fikrlarimdan maqsad shunchaki tafakkur qilish va bundan keyingi qadamlarni rejalashtirib, tartiblash olish.

Mening fikrimcha yoshlikda berilgan tarbiya sabab samimiylik yo'q.

Nima uchun?

Yoshlikdan bola urib yoki jazolanib tarbiya qilinadi, u bola «ota-onamga yoqishim shart ekan» degan fikrda o'zligini yo'qotib, yuziga «sohta niqob» kiyishni boshlaydi. Shunday qilib ulg'ayganicha o'sha «sohta niqob»da yuradi. O'zligini unutgan, haqiqiy yuzini topa olmay qolgan bir insonga aylanadi. O'sha «sohta niqob» bilan aksar holatda umrini oxirigacha yuradi.

Buni tushunib yetgan va irodali inson bo'lsa «sohta niqob»ini yechishga kuch topa oladi. Bo'lmasa yuraveradi.

Jazolash kerak, kerak emas demayapman. Lekin bu oxirgi chora bo'lishi kerak. Boshqa hech qanday chora qolmagandagina qo'llanishi kerak.

Davomi...👇

✍ @mind_alis

#fikr

Yolg'on.

- Oilalarni barbod qiladi;
- Do'stlarni orasida jarlik paydo qiladi;
- Muhabbat devorlarini darz ketishiga sabab bo'ladi;
- Kun kelib aniq (99% holatda) oshkor bo'ladi va uyaltiradi;
- Ko'plab yaqinlardan ayrilishga sabab bo'ladi;
- Ko'plab ishongan qalblarni sindiradi;
- Butun dunyoga ishonmay qo'yishlikka olib keladi.

Va hokazo cheksiz oqibatlar...

Xullas yolg'on gapirmang, har qanday holatda ham! O'sha zahoti yolg'on gapirmasangiz yomon bo'lish ehtimoli bordir, lekin u oshkor bo'lsa bir necha marta yomonroq bo'ladi!

P.S: Albatta ruxsat berilgan holatlardan tashqari)

✍ @mind_alis

#iqtibos

Manqurt o'zining kim ekanini, qaysi urug'-aymoqdan ekanini, ismini, bolalik kezlarini, ota-onasining kimligini butunlay yoddan chiqargan bo'lib, o'zining odamligini ham unutib yuboradi. O'zining insoniy qadr-qimmatini idrok etolmagan manqurt xo'jalik ishlari nuqtai nazaridan bir qancha afzalliklarga ega edi. U notavon va zabonsiz bir maxluq bo'lgani uchun ham mutlaqo itoatkor va beozor. Qochaman-qo'yaman degan xayol uning tushiga ham kirmaydi. Quldor uchun eng dahshatli narsa - qullarning isyoni. Har bir qul siymosida isyonkorlik ruhi yashiringan. Yolg'iz manqurtgina bundan mustasno, isyon ko'tarish, bo'yin tovlash unga butunlay yot. Bunday tushunchalar unga begona. Unga soqchi qo'yishga, ayniqsa, buzuq niyatli kishi sifatida undan gumonsirashga hojat yo'q. Manqurt xuddi it kabi faqat o'z egasini taniydi. Boshqalar bilan ishi yo'q. Uning fikri-zikri qorin to'yg'azishda, shundan boshqa tashvishi yo'q. Ammo o'ziga topshirilgan ishni o'ylamay-netmay, o'lar-tirilariga qaramay, muqarrar bajo keltiradi...

© Chingiz Aytmatov - Asrga tatigulik kun.

✍ @mind_alis

#iqtibos

«Meni vahimachi deb o'ylashardi. Yo'q! G'ofil emasdim, shu xolos!»

© Sulton Abdulhamid II

✍ @mind_alis

#fikr

Mantiqni ishlatib o'ylab ko'ring.

Yana bir yilga qariyapsiz, yana bir yilga yaqinlashyapsiz (o'limga), yana bir yilni yo'qotyapsiz. Shuni nishonlash mantiqqa to'g'ri keladigan ishmi?

O'lgan paytingizda ham nishonlash kerak emasmi agar bu ish to'g'ri bo'lsa?

Vaqt o'tishini nishonlash to'g'ri bo'lsa, har kun, har soat, har daqiqa o'tganini nishonlash kerak emasmi?

P.S: Mabodo aqllilik qilyapti deb o'ylaydiganlar bo'lsa, eslatib o'tmoqchiman.

Bu kanal birinchi navbatda o'zim uchun ochilgan va bu yerda yoziladigan har qanday fikr, tanqid va boshqalar o'zim uchun.

Maqsad o'zimni nazorat qilib borish, ma'lum muddat o'tishi bilan fikrlarim yoki dunyoqarashim o'zgarganini sezish.

Hech kimni fikrimga qo'shilishga majburlamayman, bu shunchaki shaxsiy fikrlar.

✍ @mind_alis