MIB faoliyatidan

“Энергетика хавфсизлиги ойлиги” доирасида Мажбурий ижро бюроси директори М.Эгамбердиев раҳбарлигидаги Республика ишчи гуруҳи Қашқадарёнинг барча ҳудудларида қиш мавсумига тайёргарлик жараёнларини жойига чиққан ҳолда ўрганмоқда.

Қарши шаҳарда ўтказилган ўрганишда дастлаб, “Ойдин” МФЙда шаҳардаги барча маҳалла фуқаролар йиғини раислари ва бошқарув сервис компаниялари билан йиғилиш ўтказилиб, мавсумни беталафот ўтказиш, кўп қаватли уйларда яшовчи аҳоли вакилларининг мурожаатларини ўз вақтида ўрганиб, ижобий ҳал қилиш чораларини кўриш, энергия ресурсларидан ноқонуний фойдаланиш ва талон-торож қилишга барҳам бериш юзасидан кунлик назоратни ўрнатиш бўйича топшириқлар берилди.

М.Эгамбердиев Қарши шаҳри ва Косон туманларида аҳолига суюлтирилган газ етказиб бериш ва тарқатилиши жараёни билан танишиб, аҳоли ва тегишли соҳа ходимлари билан суҳбатлашди.

Ишчи гуруҳ Китоб туманидаги 95-умумтаълим мактабида ўқувчилар учун яратилган шароитлар ва иссиқликнинг узлуксиз таъминланиши учун кўрилаётган чоралар, мавсумда фавқулодда ҳолатлар юз берганда кўриладиган хавфсизлик чораларининг тайёргарлигини кўздан кечирди.

Ишчи гуруҳ раҳбари Қарши туманида 20 га ер майдонида гидропоника усулида барпо этилган иссиқхона фаолияти билан танишиб, ўзининг тегишли таклиф ва тавсияларини берди, масъулларга тадбиркорларни қўллаб-қувватлаш ва лойиҳаларини амалга ошириш бўйича вазифалар белгиланди.

Мажбурий ижро бюроси директори М.Эгамбердиев раҳбарлигидаги ишчи гуруҳ айни пайтда, Қашқадарё вилоятида долзарб бўлиб турган қиш мавсумига тайёргарлик кўриш, энергия ресурсларини иқтисод қилиш, қуёш панеллари ўрнатиш ва энергия ресурсларини талон-торож қилиш ҳолатларининг олдини олиш борасидаги ишлар билан танишмоқда.

Бу сафарги ўрганиш ишлари Ғузор ва Қамаши туманларида давом этди. Дастлаб, “Шўртан нефтни қайта ишлаш заводи"да қазиб чиқариш бошқармаларининг ишлаб чиқариш қуввати, мавсумни талафотсиз ўтказиш учун олиб борилаётган таъмирлаш ишлари ва энергия ресурслари ҳолати ўрганилди.

Шунингдек, тумандаги кўмир захираси омборига ва 110/35/6 кучланишга эга нимстанцияга борилиб, мавсумда истеъмолчиларга кўмир ҳамда энергия ресурсларини самарали етказиб берилишини таъминлаш учун кўрилаётган чоралар ҳақида ўрганиш ишлари олиб борилди.

М.Эгамбердиев Ғузор туманидаги "Қорақамар", "Гулшан", "Апарди" ва "Чаноқ" МФЙ.ларида аҳолининг энергия ресурслари билан таъминланганлик ҳолати, тармоқлар созлигини шахсан кўздан кечириб, аҳоли билан суҳбатлашиш жараёнида уларнинг мавсум олди муаммоларини тинглаб, масъулларга тегишли кўрсатмалар берди.

Республика ишчи гуруҳи томонидан Ғузор ва Қамаши туманларидаги бир нечта умумтаълим мактабларига ташриф буюрилиб, ўрганишда, энергия ресурсларидан исрофгарчиликка йўл қўймаган ҳолда, мақсадли фойдаланиш, ўқув хоналарини иссиқлик билан узлуксиз таъминлаш бўйича топшириқлар берилди.