𝗟𝗲𝗴𝗮𝗹 𝗣𝘂𝗹𝘀𝗲

Erkakcha suhbatimizdan "erkaklar"ning dili og‘ribdi

Bir loyiha doirasida bitta menejerdan moliyaviy vakolatni olib, faqat ijodiy yo‘nalishni qoldirmoqchi bo‘lishgan. Moliyaviy masalalarni esa, xalq orasida ochiq tanlov o‘tkazib, professional iqtisodchi/moliyachi insonga bermoqchi bo‘lishgan. Ammo haligi menejer "mendan moliyaviy ishlarni olib qo‘ymanglar, hamma vakolat menda qolsin" deb mansab talashishni boshlagan.

O‘sha menejerdan moliyaviy vakolatni olib qo‘ymaslik maqsadadi, bir guruh insonlar turmush o‘rtog‘im sha’niga turli tuhmatlar tarqatishni boshladi. Hatto telefon qilib, "biz seni ishxonadagi ovozlaringni yashirincha yozib olganmiz, agar bizni aytganimizni qilmasang, internetda sharmanda qilamiz" deb shantaj ham qilishdi. O‘z navbatida "qo‘rqadigan joyim yo‘q, o‘zimga to‘g‘riman, aytgan gaplarim noto‘g‘ri emas, bemalol bilganinglarni qilaveringlar" degan javobni eshitishdi.

Xullas, 3 kun oldin bir yig‘ilishdan so‘ng o‘shanaqa tuhmat gaplardan birini tarqatgan erkakka avval aytgan gapi noto‘g‘riligini isbotlab berdim, miq etmasdan eshitdi. Shundan so‘ng o‘sha erkakka shunday mazmunda gap aytdim:

"Istalgancha tanqid bo‘lsa, e’tiroz bo‘lsa aytaveringlar, muhokama qilaveringlar, hech qanaqa qarshiligim yo‘q. Lekin 4 ta narsaga rozi emasman. Ya’ni agar biror kishi turmush o‘rtog‘imga tuhmat qilsa (1), haqorat qilsa (2), tahdid qilsa (3) va shantaj qilsa (4), albatta javobini beradi, bunga jim qarab turmayman!!!"

Bu suhbatga ko‘pchilik guvoh, aynan 4 ta narsa (tuhmat, haqorat, tahdid va shantaj) uchun javobini so‘rashimni aytdim. Chunki Jinoyat kodeksida tuhmat, haqorat, tahdid va shantaj uchun javobgarlik belgilangan. Bu mening emas, qonunning talabi.

Haligi erkak "xo‘p" dedi, boshqa hech qanday javob qaytarmadi. Oradan uzog‘i yarim soat o‘tdi. Bir tanish ayol kishi "siz nega bosim qilyapsiz?" deb menga yozib qoldi. Haligi erkak tezda shikoyat qilib, o‘sha ayolga gapimni yetkazibdi, shekilli )))

Va endi boshqa joylarda ham "voy-dooood, bizga Xushnud tahdid qildi, qo‘rqib ketdik, shu zolimning dastidan dod" deb maqolalar tarqatishyapti. Va ishonaman, hali yana ko‘p joylarda chiqadi. Men haqimda nimadir bironta negativ chiqishini kutib turganlar ancha.

Ha, azizlar, shunaqasi ham bo‘lib turadi bu hayotda. Shunday insonlar borki, o‘zlari tinimsiz tuhmat qiladi va yakunda sizni tuhmatchilikda ayblaydi. O‘zlari tinimsiz bosim qiladi va yakunda sizni bosim qilishda ayblaydi. O‘zlari tinimsiz shantaj qiladi va yakunda sizni shantaj qilganlikda ayblaydi. Jamoatchilik oldida o‘zlarini jabrdiyda, bechora va beozor qushcha qilib ko‘rsatishga urinishadi. Ular shunaqa ommaviy janjallar uyushtirib huzur qilishadi.

Men esa uyalaman. Hozir ham ko‘pchilik oldida bu gaplarni yozganimdan xijolat bo‘lyapman. Bu yuzma-yuz hal qilsa bo‘ladigan o‘ta mayda masala edi aslida. Lekin afsuski, oramizda ko‘rishganda miq etmay, internetda botirlar ko‘p.

So‘zim so‘ngida yana va yana qaytaraman, bu gapni aytishdan qo‘rqmayman:

❗️Agar biron kimsa turmush o‘rtog‘im sha’niga tuhmat qilsa, haqorat qilsa, tahdid qilsa va shantaj qilsa, u kim bo‘lishidan qat’i nazar, javobini so‘rab olaman. Allohga qasamki, toki tirik ekanman, tomirimda qonim oqib, yuragim urib turar ekan, jufti halolimni pastkash insonlarning tuhmati, haqorati, tahdidi va shantajidan himoya qilaman.

Agar oramizda buni bosim deb qabul qiladiganlar bo‘lsa, demak, ular aynan o‘shanaqa ishlarni qilgan pastkash insonlar bo‘ladi. Chunki o‘ziga to‘g‘ri inson, bu gapni bosim deb qabul qilmaydi.

Xullas, shunaqa gaplar. Uzr, boshingizni og‘ritgan bo‘lsam.


🔘 @xushnudbekuz