⚡️
Ustoz xotirasi yod etildiKuni kecha Buxoroda jurnalistika fidoyilaridan biri, uzoq yillar O‘zbekiston Jurnalistlar uyushmasi Buxoro viloyat bo‘limiga rahbarlik qilgan Baxtiyor Asadov xotirasiga bag‘ishlangan "Mudom qalbimizda yashaysiz, ustoz" nomli xotira tadbiri bo‘lib o‘tdi. Ushbu anjuman O‘zbekiston Jurnalistlar uyushmasi Buxoro viloyat bo‘limi tashabbusi bilan Abu Ali ibn Sino nomidagi viloyat kutubxonasida tashkil etildi.
Xotira kechasi Uyushmaning viloyat bo‘limi raisi v.b Shamshod Ochilovning kirish so‘zi bilan boshlandi. U fidoyi jurnalist, talabchan rahbar, samimiy inson Baxtiyor Asadovning hayot yo‘li va ijodiy merosiga to‘xtalar ekan, ustozning mashaqqatli, lekin sermazmun faoliyatini ehtirom bilan esga oldi.
Baxtiyor Asadov o‘z mehnat faoliyatini 1980-yilda “Yosh leninchi” (hozirgi “Yoshlar ovozi”) gazetasida musahhih sifatida boshlagan. Yillar davomida turli nashrlar va televideniyeda faoliyat yuritib, o‘zining tajribasi, mahorati bilan el e’tiborini qozondi. Uning jurnalistikaga bag‘ishlangan umri yosh avlod uchun ibrat namunasi bo‘lib qoldi.
Ustoz tomonidan asos solingan “Buxoro sporti” gazetasi viloyatda ilk xususiy nashrlardan biri sifatida tarixda qoldi. Uning mahorati va o‘ziga xos yozish uslubi minglab mushtariylarning qalbidan joy oldi.
Jurnalistning “Gilamlarda qolgan armonim”, “Sobir polvonning orzulari”, “Omad senga yo‘ldosh bo‘lsin, Erkin polvon!”, “Buxoro sporti”ni Moskvada ham o‘qishadi” kabi maqolalari uning ijodiy salohiyatining yorqin isbotidir.
Baxtiyor Asadov hayotlik chog‘ida “Buxoro sporti” gazetasini nafaqat nashr sifatida, balki yosh ijodkorlarning mahorat maktabiga aylantirdi. Uning tashabbusi bilan tashkil etilgan “Yosh jurnalistlar maktabi” ko‘plab yosh qalam ahlining kamol topishida muhim rol o‘ynadi. Uning saboqlari shogirdlari qalbida hamon yashab kelmoqda.
Ustozning fidokorona mehnati e’tirofsiz qolmadi. U 2016-yilda "Mustaqillikning 25 yilligi", 2022-yilda "O‘zbekiston futboli rivojiga qo‘shgan hissasi uchun", shuningdek, "O‘zbekiston Konstitutsiyasining 30 yilligi" esdalik ko‘krak nishonlari bilan taqdirlandi.
Baxtiyor Asadov nafaqat matbuotda, balki o‘z oilasida ham jurnalistlar sulolasining asoschisi bo‘ldi. Uning turmush o‘rtog‘i Orzugul Mo‘minova uzoq yillar matbuot sohasida faoliyat yuritib, nafaqaga chiqqan. O‘g‘li Feruz Asadov “Yoshlar” telekanalining Buxoro viloyati bo‘yicha muxbiri bo‘lib ishlagan, Yo‘lchibek Asadov “Ishonch” gazetasida faoliyat yuritmoqda, Suxrob Asadov faoliyati matbaa sohasi bilan bog‘liq, qizi Zuhro Asadova otasi ishini davom ettirib, “Buxoro sporti” gazetasiga muharrirlik qilmoqda. Oilaning kelini Muattar Asadova Buxoro viloyati teleradiokompaniyasida katta muharrir, yana bir kelini Nodirabegim Ibrohimova yozuvchi va tarjimon.
Tadbir davomida jurnalistning do‘stlari, hamkasblari va shogirdlari so‘zga chiqib, uning insoniy fazilatlari, ustozlik mehri va jurnalistikaga qo‘shgan beqiyos hissasiga to‘xtaldilar. Jurnalistlar Baxtiyor Asadovni nafaqat talabchan muharrir va tajribali jurnalist, balki insoniy fazilatlari bilan ham yodga oldilar.
— Qalbi go‘zal, beg‘ubor bir insonni yodga olib o‘tiribmiz. Baxtiyor akam serqirra ijodkor edilar.Televideniye ham matbuot yo‘nalishida ham, rahbarlik yo‘nalishida ham faoliyat yuritib, viloyatdagi turli yoshga mansub jurnalist hamkasblarimizni boshini qo‘shib, yaxshiliklarga, yaxshi tashabbuslarga da’vat etib yashadilar. Baxtiyor akam "Buxoronoma" gazetasida o‘z o‘rniga ega edilar. Ikki sohada ham mahoratli bo‘lgan ekanlar, - deydi "Buxoronoma" va "Buxarskiy vestnik" gazetalari bosh muharriri Shodmon Sulaymonov.
Tadbir yakunida oila a’zolaridan Muattar Asadova va Zuhro Asadovalar so‘zga chiqib, Baxtiyor Asadovning xotirasini yod etib, ehtirom ko‘rsatgan barchaga minnatdorlik bildirdilar.
Buxoro.uz |
Facebook |
Instagram |
YouTube
