Hozir Toshkentdan Vodiy tomonga yo‘l olarkanman, men uchun eng sevimli maskan biror bir shahar emas, o‘ziga xos hayoti bor DOVON ekanini o‘yladim.
Men bu Dovon yo‘llaridan goh uyg‘oq, goh yarimuyg‘oq, ba’zan xursand, ba’zan xafa, shoshilgan och, bemalolxo‘ja to‘q, yo isib ketib, yo sovuqqotib, goh o‘zimizning mashinada, ba’zan taksida, qiy-chuv bolalar bilan, jimjitlikda bolalarsiz -umuman har xil holatda o‘tganman.
Har safar aynan DOVONda ruhiyatim o‘zgaradi. Ming-ming yillardan beri oyog‘i yerda, boshi bulutga yastangan mana shu ulkan tog‘lar Yaratgani oldida judayam kichkina zarra ekaningni o‘ylab qolasan kishi. Mashinaning oynasidan qo‘lingni chiqarasan-da, tog‘ning iforini, shiddatini, shamolini barmoqlaring orasida tutib qolging kelaveradi. Sen bu yerlarga kelib-ketaverasan, bir nimalardan xunobing chiqib, bir nimalarni o‘ylab-o‘ylamasdan, o‘xshatib-o‘xshatolmay, aytib-aytolmay yugurib yashayverasan. Tog‘lar esa turaveradi. Ular Buyuk Musavvirning Sabr degan suvratiga o‘xshaydi.
Keng DOVON
Shaharlarda Dovondagi kenglikni his qilmaysiz. Shaharlar- qanoti qayrilgan qush, qo‘lingni ikki tomonga cho‘zsang, ikki devorga tegadi. Shaharlar qattiqqo‘l matematika ustoziga o‘xshaydi. O‘tadigan darsi: faqat hisob-kitob.
DOVON tog‘lari-adabiyot (balki abadiyat) fanidan kiradigan, biror ta’sirli she’rni o‘qisa, ko‘zi yoshlanib ketadigan ustozga o‘xshaydi. DOVON Ustozga o‘xshaydi.
-Qayerga yetib kelding, deb so‘rashadi bizni kutayotganlar.
-Perevaldaman, dovondan tushvosam, uyog‘i bir pasda, -deydi o‘rtog‘im.
DOVONni qish-qirovli yo jaziramada bosib o‘tish osonmas. Agar uloving nosoz bo‘lsa, yarim yo‘lda qolish mumkin.
DOVON hayotga o‘xshaydi
Hayot dovonlarida ham irodang nosoz bo‘lsa, yarim yo‘lda o‘smay qolib ketasan.
Yolg‘onchi DOVON
U seni ikki yuzi qip-qizil qiz timsolida "echki sutili pereval quruti" deb aldab, qo‘lingga bir xalta un qo‘shilgan dumaloq bir nimalar bilan aldab qo‘yadi. Xuddi hayot yaltiroq gap-so‘zlari va amallari bilan aldagani kabi.
Burgutli DOVON
Bunda hali erkni yo‘qotmagan qushlar ikki quloch qanotlari yozib, balandlarda uchadi. Uning brend-haykali oldida hamma rasmga tushadi. Erkinlik ramzi oldida.
Shafqatsiz DOVON
Tibbiy punktgacha, kasalxonagacha yetib borolmaganlar, ulovini boshqarayotib, tunlarda ko‘zi ketib qolgan azizlarning oxirgi manzili bo‘lgan DOVON...
Mehrli DOVON
Vodiy DOVONida mashinangiz bexos to‘xtab qolsa, ballonini berib turadiganlar har 5 daqiqada to‘xtab, hol so‘raydi.
Antennasiz DOVON
Chiroqlarsiz DOVON
Hojatxonalarsiz DOVON
Har qadamda radarli DOVON...
Ammo, baribir, ne qilsa ham birov bilmas sirlarim, o‘ylarim, hissiyotlarim, sevimligim, sabrligim DOVONI.
@kitob_ombori