Biz xohlayotgan hayotimizga – o’zimiz xohlamagan ishlarni doimiy tarzda qilish orqali erishamiz
Hamma orzu qiladi. Kimdir muvaffaqiyatli bo‘lishni, kimdir boylik orttirishni, kimdir esa mashhur inson bo‘lishni xohlaydi.
Lekin ba’zilar ularning ro’yobga chiqishi uchun faqatgina orzu qilish bilan “shug’ullanib”, harakat qilmasdan, qulay vaqt kelishini kutadi.
Ular buni “sabr qilish” deb ataydi:)
Boshqa turdagi odamlar esa yoqimsiz, zerikarli, og‘ir bo‘lsa ham, qilish kerak bo‘lgan ishlarni qilishadi.
Ba’zan shu qilayotgan ishlari qilayotgan odatlari ham samara bermaydi, muvaffaqiyatsizlikka uchrashadi, ammo, shunday yoqimsiz holatlarga qaramasdan, oxir-oqibat ular yana harakatni davom ettirish orqali o’z maqsadlariga erishishadi.
Pulni tejash yoqimli emas, chunki nafsimiz bizni bunga qarshi harakatlarni qilishga undaydi, lekin moliyaviy mustaqillikka erishish aynan shuning ortida.
Ertalab barvaqt turish qiyin, shirin uyqudan uyg’ongandan keyin o’zimiz uchun yoqimsiz ishlarni qilish undan ham qiyin, lekin orzular erta uyg‘onganlarni va doimiy harakat qilganlarni sevadi.
Kitob o‘qish ba’zan zerikarli, shunday bo’lishiga qaramay qunt bilan o’qib-izlanganlargina o’zlariga bilim yuqtira oladilar.
Mashg‘ulotlar charchatadi, tanangizni og’ritadi, lekin kuchli bo‘lish uchun aynan shunday vaqtinchalik og’riqlarga chidash kerak.
Mag’lubiyatga uchrash qiyin, alamli va juda katta stress olib keladigan holat. O’sha paytning o’zida taslim bo’lib, shu ishni qilishni to’xtatish o’rniga, ushbu holatdan xulosalar chiqarib, yana o’rnimizdan turib, har doimgidanda kuchli bo’lib qaytib, yo’limizda davom etishimiz - bizni irodali va kuchli xarakterli bo’lishimizga yordam beradi.
Orzuyimizdagi hayotni - yoqimsiz ko‘ringan harakatlarni qayta-qayta qilish orqali yaratamiz.
Oson yo‘l yo‘q.
Faqat ikkita tanlov bor:
Hozir qulaylikni tanlash va kelajakda afsuslanish yoki hozir qiyinchilikni tanlash va kelajakda o’zimiz xohlagan narsalarga ega bo’lish
Tanlov o’zingizda…
17.02.2025
Liverpool, Angliya
Jasurbek Nematullaev
