Bugun Oq uyda juda achinarli va kutilmagan tomosha bo'ldi. Ukraina Prezidenti Volodimir Zelenskiy mamlakat nodir metallarini AQSh bilan birgalikda qazib olish bo'yicha bitim imzolashi kutilgan edi.
Bu xabar qayta-qayta eslatilganiga qaraganda, tomonlar allaqachon bu masalada kelishuvga erishib bo'lgan va uni namoyishkorona imzolash marosimi o'tkazilishi kerak edi, xolos. Bu bitim Rossiya bilan tinchlik muzokaralarini boshlashning birinchi qadami bo'lishi ham kutilgan edi.
Ammo bitim imzolanmadi. Tramp bilan hech qanday muzokaralar ham o'tkazilmadi. Chunki Tramp va Zelenskiy asosiy uchrashuvdan oldin jurnalistlar bilan an'anaga muvofiq o'tkaziladigan qisqa muloqot paytida janjallashib qoldi.
Bir soatga cho'zilgan bu uchrashuvning birinchi yarmi silliq kechdi. Tomonlar qizishmagan holda jurnalistlar savollariga javob berdi. Yarim soatlar o'tgach, oraga Vitse-prezident J.D. Vens qo'shilib, Zelenskiyni AQShga hurmatsizlik ko'rsatishda, shukr qilmayotganlikda aybladi. Bundan Zelenskiyning jahli chiqib, qizishib ketdi. Shundan keyin Trampniki ham tutib qoldi va keskin gaplar bilan Zelenskiyni tergab, "bizsiz hech narsa qila olmaysiz", dedi.
Bunaqa mashmasha AQSh tarixida kuzatilmagan. Oq uyda xorijiy davlat rahbari bilan bunaqa tortishuv bo'lishi kinolarda ham yuz bermagan, menimcha.
Men Zelenskiyga achindim. U Rossiyaning bosqinchi ekanini qayta-qayta uqtirishga urindi, ammo bu mezbonlarga yoqmadi.
Zelenskiyning qiyofasida horg'inlikni sezish qiyin emas edi. Axir, faol urush domida bo'lgan davlatni uch yildan beri boshqarishning o'zi bo'lmaydi. Keyin, u o'zini juda jaydari tutdi; go'yoki prezident Trampni yaxshi tanimaydigan, u bilan birinchi marta gaplashayotgan odamdek.
Oq uyga kelgan boshqa davlat rahbarlaridek, u Trampga ko'p xushomad qilmadi; har so'zida bosh irg'ab uni ma'qullab turmadi.
Qolaversa, tarjimonsiz o'zi gaplashishi ham, menimcha, uning zarariga ishladi. Zelenskiy ingliz tilida erkin gapira olmaydi; shuning uchun ba'zi fikrlari qo'pol chiqdi va mezbonlarning ensasini qotirdi. Balki ukrain tilida, tarjimon orqali gaplashganda, ehtimol, bugungi mojaro yuz bermagan bo'lardi.
Uchrashuvdan so'ng Zelenskiydan va Ukraina delegatsiyasidan Oy uyni tark etish so'ralgan; hatto tushlikka ham taklif qilishmagan.
Kremlda bugun bayram emish.
@bmamadiev
