JAFAR KHOLMUMINOV

Ҷаъфар Муҳаммади Тирмизӣ

ШУТУРМУРҒҲО

Тӯда-тӯда чи маст мерақсанд
Ин шутурмурғҳои саҳроӣ.
Дар пайи донаанду обу ғизо,
Банд дар фитнаҳои дунёӣ.

Дар чаро гоҳ чун шутур дар дашт,
Гоҳ чун мурғчӯҷа дар ҷеғ-ҷоғ.
Хушхироманд, лек бадмастанд
Не ба сар фикр, не ба дилҳо доғ.

Мебарад гоҳ ҳамлае гурге
Бар шутур ё ба мурғи ҳамсоя.
Бешуъурона дар пайи қутанд
Ин шутурмурғҳои бемоя.

Медарад гург синаи мурғе,
Аз шутурмурғҳо на фарёду рев.
Меканад гардани шутур бабре,
Аз шутурмурғҳо на бонгу ғирев.

Нангу номусро куҷо донанд
Ҷонвароне, ки аз пайи нафъанд?
Мекушад, медарад ба кунҷе гург...
Ҷонварон кай ба фикри ҳамнавъанд?!

Дӯст доранд рақсу ромишро,
Рақси марге вале намебинанд.
Бар сари шохае ҳазин, ларзон
Рақси барге вале намебинанд.

Ин шутурмурғҳои саҳроӣ
Ғайри айшу сафо чи медонанд?
Дар ҳарими Худой раққосанд,
Аз ҳарими Ғазо чи медонанд?!

Тошканд, 20 ноябри соли 2024

ХУШХАБАР

Дирӯз бароям хушхабаре расид, ки дар интишороти Илм-Зиё-Нур" дар шаҳри Тошканд тазкираи рӯзгор ва намунаи осори дӯстон ва шогирдони устод Ҷаъфар Муҳаммади Тирмизӣ бо номи "ЧАШМАИ ХУРШЕД:
Мактаби адабии Ҷаъфар Муҳаммади Тирмизӣ" интишор гардид.
Тазкира дар шакли як китоби зебову рангину мунаққаш, ҳовии 270 саҳифа ва ба шумори 300 нусха чоп шудааст.

Гирдоварандаи мавод ва муаллифи муқаддима шоир ва рӯзноманигори шинохтаи Ҷумҳурии Ӯзбекистон, узви Иттифоқи журналистони Тоҷикистон Олим Панҷизода ҳастанд.

Муҳаррири масъул: Рамазон Абдуллоев, номзади илмҳои филология, дотсенти Донишгоҳи давлатии Тирмиз

Тақриздиҳанда: Комилҷон Раҳимов, доктори илмҳои таърих, корманди аршади Пажӯҳишгоҳи шарқшиносии ба номи Абӯрайҳони Берунии Академияи илмҳои Ӯзбекистон

"Дар ин китоб шарҳи ҳоли мухтасар ва намунаи осори он адибони тоҷики Ӯзбекистон гирдоварӣ шудааст, ки бархе аз аз онҳо аз ҷумлаи шогирдон ва дастпарвардагони шоири зуллисонайн, олими файласуф ва тасаввуфшинос Ҷаъфар Муҳаммади Тирмизӣ (Ҷаъфар Холмӯъминов) ҳастанд ва бархе дигар аз ҷумлаи дӯстон, пайравон ё таъсирпазируфтагони мактаби адабии ӯ мебошанд.

Ҷаъфар Муҳаммади Тирмизӣ дар тӯли чиҳил соли гузашта, ки мамлӯ аз фаъолиятҳои пурсамари адабӣ ва илмии ӯ будааст, ба навқаламони зиёде дар арсаи адабиёт, хусусан, дар ҷодаи шоирӣ раҳнамоӣ намуда ва ба манзили мақсуд расонидааст. Метавон гуфт, ки талошҳо ва заҳматҳои мудовоми ӯ дар заминаи эҳё ва рушду равнақи адабиёти форсӣ-тоҷикӣ дар Ӯзбекистон самар дода ва “Мактаби адабии Ҷаъфар Муҳаммади Тирмизӣ” ном гирифтааст".

Ба назари банда нашри чунин тазкира, ки мамлуъ аз осори чандин тан аз шогирдону пайравон, таъсирпазируфтагон ва дӯстони шоири соҳибҷашн ба муносибати 55-умин солгарди таваллуд ва чиҳил сол аз фаъолиятҳои адабию илмии устод Ҷаъфар Муҳаммади Тирмизӣ дар адабиёти имрӯзи порсигӯёни кишвари дӯст ва бародари Ӯзбекистон ва ҳатто шояд дар худи Тоҷикистон низ як падидаи наву хурсандибахш ва шоёни таҳсину ташвиқ аст.

Аз ин рӯ аз фурсати (ба назарам муносиб) истифода бурда шахси худи устоди азизам Ҷаъфар Муҳаммади Тирмизӣ ва шогирдону дӯстон ва мухлисони ашъори шоири фарҳехта, донишвар ва нодирагуфтори шеъри муосири порсиро бо санаи муҳимми умри пурбаракат ва пурсамарашон ва минҷумла нашри китоби "Чашмаи хуршед: Мактаби адабии Ҷаъфар Муҳаммади Тирмизӣ" табрику шодбош мегӯям.

Бароям низ ҷои хушнудию ифтихор буд, ки дар ин тазкира шарҳи кӯтоҳи ҳол ва як мухаммасу 11 намунае аз ғазалҳо ва чаҳорпораҳои шогирдонаи банда низ аз ҷумлаи 24 тан аз шогирдон ва дӯстони устод Ҷаъфар Муҳаммади Тирмизӣ ҷой гирифтаанд:

Исмат Ҳалим, Ҳоҷӣ Сироҷиддин (Сироҷиддин Янгибоев), Зебо Бобозода, Наҷмиддин Рашидов, Озода Мусаллам, Зайнаб Бахшиқулова, Раҳматуллоҳ Раҳимзода Ҳусайнӣ, Розия Бадалова, Эшонқули Эшниёзи Ҳамрозод, Искандар Мирзо, Муҳаммадрӯзии Ғанизод, Саидаи Синавӣ, Рӯзиқул Тошев, Саодат Сатторӣ, Олим Панҷизода, Дилафрӯз Муқумова, Расулбеки Аҳмадзод, Ҷамшед Орифиён, Ҷамшед Чағонӣ, Баҳодур Бароти Бойсунӣ, Заррина Раҳматова, Шукруллоҳ Сироҷ, Гулираъно (Раъно Рамазонова), Зулбибӣ Искандарова.

Ҷамшед Орифиён (Тоҷикистон)
------------------------
@Jafar_Muhammad_Termizi

ҲАФТАИ ЭҶОДИИ ҶАЪФАР МУҲАММАДИ ТИРМИЗӢ ДАР ДУШАНБЕ – ПОЙТАХТИ ҶУМҲУРИИ ТОҶИКИСТОН



      Бо ибтикори Сафири Фавқулодда ва мухтори Ҷумҳурии Тоҷикистон дар Ҷумҳурии Ӯзбекистон, академик Абдуҷаббор Раҳмонзода ва бо мувофиқати Вазорати Корҳои хориҷаи Ҷумҳурии Тоҷикистон, аз санаи 23 сентябр то 28 сентябри соли 2024 дар Донишгоҳи давлатии Омӯзгории Тоҷикистон ба номи С.Айнӣ, Донишгоҳи давлатии Миллии Тоҷикистон, Институти Фарҳанг ва санъати Тоҷикистон, Иттифоқи Нависандагони Тоҷикистон ва Академияи Миллии илмҳои Тоҷикистон шабҳои эҷодӣ ва анҷуманҳои илмӣ-адабии шоири зуллисонайн, олими файласуф ва тасаввуфшинос, публитсист ва мутарҷим, узви Иттиҳодияи Нависандагони Ӯзбекистон, узви Иттифоқи Нависандагони Тоҷикистон, узви пайвастаи Академияи илмии Нақди Адабии Эрон, доктори Илмҳои фалсафа, профессори Институти ISFT (Тошканд) Ҷаъфар Муҳаммади Тирмизӣ – Ҷаъфар Холмӯъминов баргузор гардид.
   Ин ҳафтаи эҷодии шоир ва олими ӯзбекистонӣ, ки дар ростои рушду густариши пайванди дӯстӣ ва таҳкими равобити фарҳангӣ, илмӣ ва адабӣ байни ду кишвари дӯсту бародар ва ҳамсоя – Тоҷикистон ва Ӯзбекистон сурат гирифт, нахустин иқдоми ҷиддӣ дар баргузории маҳфилҳои тахассусӣ ва инфиродӣ дар марокизи илмӣ ва адабии Тоҷикистон буд.
    Ҷаъфар Холмӯъминов – Ҷаъфар Муҳаммади Тирмизӣ ҳамчунин дар баробари ҳузур дар шабнишиниҳо ва нишастҳои тахассусии илмӣ-адабии худ, дар ду ҳамойиши илмӣ – Конференсияи илмӣ-назариявӣ таҳти унвони “Гиромидошти забону фарҳанг дар осори Мавлоно” (Ба муносибати Рӯзи Мавлоно Ҷалолиддини Балхӣ) дар Академияи Миллии илмҳои Тоҷикистон ва дар ҳамойиши илмӣ-адабии “Бузургдошти Мавлоно” дар Иттифоқи Нависандагони Тоҷикистон бо суханрониҳои худ иштирок намуд. Ҳамчунин, ба муносибати “Рӯзи Мавлоно” ва “Рӯзи Забони тоҷикӣ” аз тариқи канали телевизионии “Сафина” ва шабакаҳои дигар суҳбат кард.

@Jafar_Muhammad_Termizi