Ko'pchilik yigitlar ovqat qilishni bilmayman deydi. Oilali erkaklar esa ovqat qilmasligidan maqtanib ham qo'yishadi.

Fikrimcha erkak kishi oilada ovqat qilishi kerak. Bolalari bilan rishtalarni bog'laydigan eng muhim ishlardan biri hisoblanadi. Bolalar katta bo’lganda dadamni oshini sog’indim deyishlari juda-juda muhim. Undan tashqari ovqat qilish oila ayolini hursand bo'lishiga sabab bo'ladigan muhim omillardan biri.

Erkak kishi ayolidan ko'ra shirinroq ovqat qilishi muhim. Har kuni emas, haftasiga bir marta, imkon topish qiyin bo’lsa ikki haftada bir marta. Ammo hamma kutadigan va maza qilib yeydigan qilib tayyorlashni bilishi kerak.

Bunga qanday qilib erishiladi?

Bruce Lee gapi bor ekan: "Men 10 000 xil tepish usulini mashq qilgan odamdan emas, bitta tepish usulini 10 000 marta mashq qilgan odamdan qo'rqaman".

O'zingiz va oilangiz yaxshi ko'radigan ovqatdan bittasini tanlaysiz. Aytaylik oshni hamma yaxshi ko'radi, mazza qilib yeydi.

Shuni zo'r qilinishi reseptini topasiz. Zo'r oshpazdan so'raysizmi, onadan so'raysizmi, internetdan topasizmi farqi yo'q. Muhimi topish. Shuni har hafta bir marta qaytaraverasiz. Har safar o’zingizni tanqid qilasiz, oiladan so’raysiz, bolalardan so’raysiz. Eng xolis fikr va sof tanqid bolalardan chiqadi.

Shirin ovqat qilish uchun qimmat massaliqlar bo'lishi shart emas.

Erkak kishi uchun rohat beradigan, o'ziga bo'lgan ishonchini oshiradigan holatlardan biri bu uni biror ishni ustasi bo'la olishi. O’sha ishni ustasi ekanligini boshqalardan eshitishi. Bu professional sohada ham, oiladagi munosabatlarda ham muhim. Bolalar ”ayam emas, dadam osh qilib bersin, dadam shirinroq qiladi” deyishi o’zi 1:0 😁

Bir dona ovqatni hammadan zo'r qilib tayyorlay olishga erishish oiladagi munosabatlarga anchagina ijobiy ta'siri bo'ladi.

Kuchli inson bu boshqalar qo’liga qarab qolmagan inson. Bu erkinlik degani. Erkak kishi erkin bo’lishga intilishi zarur.

Bek Olimjon
18.03.2023
Norvegiya