Islombek's Blog

"— Men bandman - chindan ham bandman. Lekin ba'zan qilayotgan ishlarim ohir-oqibat nimanidir o'zgartirarmikan deb o'ylab qolaman. Men chin yurakdan hayotimda mazmun borligiga, mening mavjudligim muhim ahamiyat kasb etishiga ishongim keladi."

Stephen Richards Covey - "Muvoffaqiyatli insonlarning 7 ko'nikmasi"

"Ustozation" yangi kontent tayyorladi.

"Qaysidir" blogda linkini koʻrdim. Link yonidagi izoh esa juda achinarli: Videoni hali koʻrmadim. "Lekin sizlar uchun manfaatli boʻladi" deb oʻylayman.

Bugun bir nechta bloglarni filtrdan oʻtkazishim kerak edi. Birinchi navbatda ushbu blogdan chiqib ketdim.

"Ustozation" videosini koʻrish davomida izohlar qismi bilan qiziqib qoldim. "Koʻrmay turib qoʻllab-quvvatladim (like, comment va h.k)" mazmunida yozilgan izohlar soni, u izohlar yigʻgan likeʼlar soni men oʻylagandan karrasiga koʻproq.

Qoʻllab-quvvatlashlari taqsinga sazovor. Lekin fanatizm...

Agar menga "Barcha narsangdan voz kechish evaziga, istalgan bir dona hissiyotingni toʻliq shaklida olishing mumkin" deb taklif berishsa, oʻylab oʻtirmasdan "ishonch"ni soʻragan boʻlardim.

Bu his menda kamayganidan beri, qolgan barcha narsaning qiymati karrasiga pasaygan.

Ishoning bu hissiyotsiz hech qachon baxtli, halovatli yashay olmaysiz.

5 yildan beri juda koʻplab mavzularni oʻzgardim, atom zarrachasidan tortib metafizik obyektlargacha.

Biror jarayon, narsa yoki hissiyotlar bilan bogʻliq barcha detallarni avvaldan bilib olsangiz, deyarli lazzat ololmaysiz. Hattoki ogʻriqlar ham ahamiyatini yoʻqotadi.

7 yildan beri menda CTTH bor. Lekin 4 yildan beri ogʻriqlar oʻrta darajaga koʻtirilganiga qaramay, deyarli umuman eʼtibor tortmay qoʻygan.

Bu amaliy tajribadan kelib chiqib, sizga berishim mumkin boʻlgan eng yaxshi tavsiyam: Barcha narsani bilishingiz shart emas. Baxtliroq boʻlasiz...

Men har doim "Chidash kerak" degan jumlaga qarshi tarafdaman. Bu jumla ishlatilayotgan o‘rin – karyera, munosabatlar yoki hayotiy qandaydir faoliyat bo‘lishidan qat'i nazar, to‘g‘ri emas.

Yerga urug‘ eksangiz, uning o‘sib chiqishi uchun "ma’lum muddat" kerak bo‘ladi. Lekin shu muddat o‘tib, urug‘ unmasa, vaziyatni tekshirish lozim. Agar urug‘ umuman unmagan bo‘lsa, yangi urug‘ ekish kerak bo'ladi. Urug‘ kech unayotgan bo‘lsa ham, bu muammodan darak. Chunki nihol bo‘lib ko‘rinishi kerak bo‘lgan vaqtda u endigina unayotgan bo‘lsa, sifatliroq urug‘ ekish kutishdan ko‘ra samaraliroqdir.

Agar biror sohaga (faoliyatga, jarayonga) 2-3 yil vaqt sarflab, hali ham natijalar ko‘rinmasa, "urug‘ ko‘milgan joyni tekshirib ko‘rish" kerak. Chunki 5-10 yildan keyin hech narsa o‘z-o‘zidan yaxshilanib ketmaydi.

Urug‘ni faqat hosiliga qiziqib ekmang. Avvalo, uning sizning ekin maydoningiz, tabiatingiz va qo‘shimcha sharoitlaringizga mos ekanligini tekshiring. Aks holda, urug‘ yeringizda nobud bo‘ladi, yeringiz esa bekordan-bekorga kuch sarflaydi. Sog‘lom nihollar unib chiqishi mumkin bo‘lgan paytda, sizning ekin maydoningizda begunoh urug‘lar chiriyotgan bo‘lishi mumkin.

Urug‘ni ayblashdan avval, uni to‘g‘ri joyga, to‘g‘ri vaqtda ekishni o‘rganing! Agar hammasi to‘g‘ri bo‘lsa, "chidash" shart bo‘lmaydi, shunchaki kutish kifoya.

Hayotda hech qachon oxirigacha chidab o‘tirmang. To‘g‘ri ishlarni amalga oshiring va kuting. Agar hammasi to‘g‘ri bo‘lsa, chidashga hojat qolmaydi. Agar chidashga majbur bo‘layotgan bo‘lsangiz – demak, biror narsa xato...

@islamaliy_blog

211 kundan beri odatiyga qaraganda ancha jiddiyroq qiyofadagi Islombek atrofdagi insonlarga ko‘rinmoqda.

Aura jihatidan baholanganda – qora va kuchli ta’sir doirasiga ega aura. Hatto 3-4 kishilik davralardagi hazilga boy kayfiyatni ham jiddiy ko‘rinishga olib kelishi mumkin bo‘lgan darajada.

Qachonlardir film va kitoblardagi shunday "dark" personajlarga havas qilardim. O‘zim bilmagan holda ularga o‘xshab qolgandekman...

Menga berilgan tavsiya, tanbeh, o‘xshatish va hokazolarining 60% dan ortig‘i aynan shu mavzu bilan bog‘liq bo‘lib qoldi – kichik yoshli o‘quvchimdan tortib, ulug‘ yoshli insonlarning fikrlarigacha. Qachonlardir dizaynlarimga beriladigan birinchi sifat "kreativ" bo'lgan bo'lsa, hozirda "minimalistik" degan sifatni berishadi.

To‘g‘ri, bunday xarakterda o‘zimni juda ham qulay his qilyapman va bu energiyada yurish menga yoqmoqda.

Lekin umumiy baholaganda, bir narsani tushundimki: ba’zan butun boshli yozuv personaj ta’siridan ko‘ra, o‘rinli vaqtdagi jilmayish ko‘proq kuchga ega ekan.

P.S: Ushbu rivoyatning haqiqiy darajasini endi tushunib yetdim:

"Birodaringning yuziga tabassum bilan boqishing ham sadaqadir."
(Imom Termiziy rivoyati)

"Katta yolgʻizliksiz jiddiy ishning iloji yoʻq."

- Pablo Picasso