TABORAK SURASI
عَنْ أَبِي هُرَيْرَةَ عَنْ النَّبِيِّ صَلَّى اللَّهُ عَلَيْهِ وَسَلَّمَ قَالَ : ( إِنَّ سُورَةً مِنْ الْقُرْآنِ ثَلَاثُونَ آيَةً شَفَعَتْ لِرَجُلٍ حَتَّى غُفِرَ لَهُ وَهِيَ سُورَةُ تَبَارَكَ الَّذِي بِيَدِهِ الْمُلْكُ ) روى أبو داود والترمذي.
Abu Hurayra roziyallohu anhudan rivoyat qilinadi:
«Nabiy sollallohu alayhi vasallam:
«Allohning Kitobida bir sura bor. Uning oyatlari o‘ttizta. U sohibini to mag‘firat qilingunicha shafoat qiladi. «Tabarokallazi biyadihil Mulk», dedilar».
Abu Dovud va Termiziy rivoyat qilganlar.
«Mulk» surasi uchta asosiy maqsadni o‘z ichiga qamrab olgan:
1. Allohning buyukligi, U Zotning mahluqotlarni tiriltirish va o‘ldirishga qodirligi.
2. Allohni yagonaligiga dalil va hujjatlar sobit qilish.
3. Qiyomatga va o‘lgandan so‘ng qayta tirilishga ishonmaydigan kimsalarni oqibati nima bo‘lishi.
Mulk surasi makiy suralardan bo‘lib, 30-oyatdan iborat.
Uni ismlari bir qancha bo‘lib, ba’zisi Payg‘ambarimiz sollallohu alayhi vasallamdan va ba’zisi sahobai kiromlardan vorid bo‘lgan.
Imom Termiziy rivoyat qilgan hadisda Payg‘ambarimiz sollallohu alayhi vasallam "Taborakallazi biyadihil Mulk" deb aytdilar.
Mushafda va tafsir kitoblarida "Mulk" ismi bilan mashhurdir.
Mulk surasi xalqimiz orasida “Taborak” nomi bilan ham ma’lum-mashxurdir.
Anas ibn molik roziyallohu anhudan rivoyat qilingan hadisda Payg‘ambarimiz sollallohu alayhi vasallam bu surani "Munjiya" (najot beruvchi) deb ismladilar.
Ibn Mas’ud roziyallohu anhudan rivoyat qilgan hadisda biz uni payg‘ambarimiz zamonida "Monia" (man qiluvchi) deb ismlardik deganlar.
Yana "Voqia (saqlovchi), Mannaa (o‘ta man qiluvchi), deb ham yuritiladi chunki u bandalarni do‘zah azobidan saqlaydi.
“Mulk” surasining fazilatlari haqida bir qancha hadislar rivoyat qilingan.
Jobir roziyallohu anhudan rivoyat qilinadi:
«Nabiy sollallohu alayhi vasallam «Alif, Laam, Miym. Tanziyl…» va «Tabarokallazi biyadihil Mulk»ni qiroat qilmasdan uxlamas edilar».
Termiziy rivoyat qilgan.
Imom Nasaiy keltirgan rivoyatda esa:
«Kim «Taborakallazii biyadihil mulk»ni har kecha qiroat qilsa, Alloh azza va jalla uning sababidan uni qabr azobidan man qiladi. Rasululloh sollallohu alayhi vasallamning davrlarida uni «Man qiluvchi» deb nomlar edik», deyilgan.
Payg‘ambarimiz sollallohu alayhi vasallam:
«Mulk» surasi har bir mo‘minning qalbida bo‘lishini xohlardim», deganlar.
Har bir musulmon kishiga bu surada kelgan buyuriqlarga amal qilishi undagi qaytariqlardan qaytishi undagi qissa va ibrat, nasihatlardan nasihatlanishi lozim bo‘ladi. Bu surani qalbimizda bo‘lishligi uchun uni yodlab, doimo o‘qib yurishimiz maqsadga muvofiq bo‘ladi.
Allohim Sen yetti qavat osmonni tafovut va kamchilikchiliksiz bekamu ko‘st qilib yaratding, va yerni bizlarga bo‘ysindirib qo‘yding, sen rizq beruvchi zotsan, o‘lim va hayotni bizlarni qaysi birimiz amalda yaxshiroq ekanligimizni sinash uchun yaratding, sen o‘ta mag‘firatli zotsan seni borliginga va birliginga iymon keltirdik, bizlarni taqvo ahlidan, shukr qiluvchi shokirlardan qilgin, osmon usti yer osti ofatlaridan, qabr azobidan o‘zing saqlagin, bizlarni jannat ahlidan qilgin, do‘zah ahlidan qilib qo‘ymagin.
Abdussomad Habibulloh o’g’li tayyorladi
Shayx Alijon qori rasmiy
sahifalari👇
Telegram|
Facebook|
Youtube|
Instagram
