Uchqo‘rg‘on tuman hokimligi | Rasmiy kanal

Қулупнайчилик – даромадли ва экспортбоп соҳа

Барно Мирзамова Учқўрғон туманида қишлоқ хўжалиги соҳасида амалга оширилаётган ишлар билан танишиш жараёнида Навоий маҳалласидаги “Жавлонбек Райхона” хусусий корхонаси томонидан 2 гектар майдонда гидропоника усулида ташкил этилган қулупнай плантациясида бўлди.

Мазкур плантацияда ҳозирги кунда 30 нафар фуқаро доимий иш билан таъминланган. Гидропоника усулида етиштирилган қулупнайлар маҳаллий ва хорижий бозорларга етказиб берилмоқда. Бу эса аҳолини иш билан таъминлашдан ташқари, ҳудуднинг экспорт салоҳиятини ҳам оширишга хизмат қилаётганини кўрсатади.

Барно Мирзамова лойиҳанинг аҳамиятини инобатга олиб, келгусида шунга ўхшаш ташаббусларни янада кенгайтириш, янги иш ўринларини яратиш ва қишлоқ хўжалиги соҳасини ривожлантиришга қаратилган аниқ чора-тадбирларни амалга ошириш зарурлигини таъкидлади.

Учёғоч маҳалласининг лимон хўжалиги: Бекмуродовлар тажрибаси

Учқўрғон туманидаги Учёғоч маҳалласидан ўрин олган Бекмуродовлар хонадони 20 йилдан буён лимон етиштириш билан шуғулланиб келади. Уларнинг томорқаси 30 сотих майдонни эгаллаган бўлиб, бу ерда нафис ва сифатли лимонлар парвариш қилинади. Бундан ташқари, 6,5 гектарлик лимон плантациясида ҳам иш қизғин давом этмоқда.

Мазкур хўжаликни уста деҳқон Носиржон Бекмуродов бошқармоқда. Унинг раҳбарлигида хўжалик кластер шаклида фаолият юритиб, янги имкониятлар яратиш ва тадбиркорликни кенгайтириш йўлида изланишлар олиб бормоқда.

Айни пайтда, Бекмуродовлар хонадонида 80 тонна лимон захира сифатида сақланмоқда. Ушбу маҳсулотларни ёз ойларида бозорга чиқариш режалаштирилган.

Носиржон Бекмуродов хўжалигини янада кенгайтириш мақсадида янги лойиҳалар устида иш олиб бормоқда. Ўзбекистон фермер, деҳқон хўжаликлари ва томорқа ер эгалари кенгаши бўлим бошлиғи Барнохон Мирзамова ташриф буюриб, тадбиркорнинг режалари билан танишди ва амалга ошириладиган ишлар юзасидан тегишли тавсиялар берди.

Учёғоч маҳалласининг бу хўжалиги нафақат лимончилик соҳасидаги илғор тажрибаларни намоён этмоқда, балки тадбиркорлик ва агротехнологияларни янада ривожлантиришга катта ҳисса қўшмоқда.

Замонавий агротехнологиялар орқали янги имкониятлар. Учқўрғон тажрибаси

Учқўрғон тумани Қумтўғон маҳалласида яшаётган тадбиркор Абдуллох Наимов Германиянинг замонавий технологияларидан фойдаланиб, совуққа ва касалликларга чидамли пиёз етиштиришни йўлга қўйди. У ўзининг инновацион ёндашувлари билан қишлоқ хўжалиги соҳасида янги имкониятлар яратди ва 3 нафар оила аъзосини иш билан таъминлашга муваффақ бўлди.

Наимов пиёзнинг махсус навларини етиштиришда эътиборсиз қолган иссиқхоналардан фойдаланиб, уларни модернизация қилди ва янги агротехник ютуқларни амалиётга татбиқ этди. Унинг маҳсулотлари маҳаллий бозорда сотиш билан бир қаторда хорижга экспорт қилиш имкониятини ҳам кўриб чиқмоқда.

Шунингдек, тадбиркор янги иш ўринлари яратишни ва фермерларга замонавий агротехнологияларни ўргатишни ўзининг асосий мақсадларидан бири сифатида белгилаган.

Ўзбекистон фермер, деҳқон хўжаликлари ва томорқа ер эгалари кенгаши бўлим бошлиғи Барнохон Мирзамова Наимовнинг фаолияти билан танишиб, унинг олдида турган муаммоларни ўрганди. Фаолиятни кенгайтириш бўйича тегишли тавсиялар бериб, янги ташаббусларга ҳамкорликда ёрдам беришга тайёр эканлигини билдирди.

Бу ташаббус нафақат қишлоқ хўжалигининг ривожига ҳисса қўшади, балки янги иш ўринлари яратиш ва инновацион ёндашувларни кенг жорий этишда намуна бўлади.

Учқўрғонда Ички ишлар идоралари ходимлари куни кенг нишонланди

Учқўрғон туманида “Ўзбекистон Республикаси ички ишлар идоралари ходимлари куни” муносабати билан байрамона тадбир бўлиб ўтди. Бек тантаналар саройида ташкил этилган мазкур тадбирда туман ҳокими, сектор раҳбарлари, нуронийлар, ички ишлар ходимлари ҳамда кенг жамоатчилик вакиллари иштирок этишди.

Тадбир давомида нутқ сўзлаганлар ички ишлар идоралари ходимларининг халқимиз тинчлиги ва фаровон ҳаётини таъминлашдаги беқиёс ҳиссасини эътироф этиб, уларни байрам билан қутлашди. Хусусан, жиноятчиликка қарши кураш, ҳуқуқбузарликларнинг олдини олиш ва жамоат тартибини сақлашдаги фаолиятлари алоҳида таъкидланди.

Шунингдек, байрам тадбири доирасида бир қатор фаол ходимлар фахрий ёрлиқ ва эсдалик совғалари билан тақдирланди. Туман маданият маркази ходимлари ва эл ардоғидаги санъаткорларнинг куй-қўшиқлари эса тадбирга янада шукуҳ ва кўтаринкилик бахш этди.

Тадбирда иштирок этган барча меҳмонлар байрамона кайфиятда бўлиб, ички ишлар ходимларининг масъулиятли хизматлари учун чуқур миннатдорлик билдиришди.