* * *
Koʻzlar qurol,
Nigohingiz oʻq,
Qoʻying, menga bunday qaramang.
Yuragimning boʻsh xonasi yoʻq,
Ijaraga boʻlsa, soʻramang!
Ayang meni, bagʻrim satpora,
Koʻnglim yarim, sira toʻlmagan
Chegalangan, shoʻrlik, koʻp bora,
Deyarli sogʻ yeri qolmagan.
Surunkali dardlar yopishgan,
Yuqimliman, nariroq yuring.
Gʻamlar izlab makon topishgan,
Mana yurak,
Koʻrgancha, koʻring!
Kulbam gʻarib, boʻlmalari tor,
Bir ziyorat qiling, yetarli.
Eng oxirgi bir mehmonim bor,
Oʻzi bilan olib ketarli!
Hozircha shu,
Xayir!
Sogʻ boring!
Menga bunday mayus qaramang.
Yolgʻizlikka yaratgan meni,
Sababini undan soʻramang!
Koʻzlar qurol,
Nigohingiz oʻq,
Qoʻying, menga bunday qaramang.
Yuragimning boʻsh xonasi yoʻq,
Ijaraga boʻlsa, soʻramang!
Malika Tavfiq
