Hurfikr.uz

#Диққат
#Тарқатинг
#мурожаат

Уюшма раиси Қуронбоевга

Мурожаат таҳрирсиз берилмоқда

Ассалому алайкум Маҳалла раиси канали ижодкорлари!

Мен ҳам Маҳалла раисиман мен бу мурожатим Молия вазири ва Маҳалла уюшмаси раиси К. Куронбоевга ва шу Махалла еттилиги деб юритаëтган маъсулларга!!

Мана 2-3 йилдан буëн "Маҳалла еттилиги" номи остида иш олиб борилаяпти хўп мақсад нима иш жараëнини яхшилаш.
Энди савол туғилади "еттиликга" Раҳбар деб Маҳалла раиси бириктирилди қўлида буларни бошқаришга факат иш куни табели бор  бошка ҳуқуқи йўқ иш талаб вилса уларни бошлиқлари бор уларни топширикларини бажаради Раисдан бошқа 6-лик. Мақсад раис табел кўтариб ишга келдингми йўқми деб сўровчи йўқламачими???

Бундан ташқари, Махалла раисини қўлида маблағи бўлмаса маблағ Хоким ëрдамчисини қўлида бўлса хоҳлаганига кредит ëки субсидияни берса Маҳалла раиси "Халк вакилини" таклифи ëки розилиги инобатга олинмаса бу қандай тизим? Кредитни банкни ўзи бераверади.

Яна бир савол: бу " Еттилик"ни раҳбари Маҳалла раиси бўлса нега шу еттилик ичида энг ойлик маоши кам Раисларни, сабаб нима? Кечаю кундуз дам олиш кунисиз ишлаганими? Сабаб нима?
Ҳоким ëрдамчилари 8-12 млн
Ëшлар етакчилари 6-8 млн
Проф инспект  8-12млн
Солик инспект  6-10млн
Ижтимоий ходим 8-10млн
Хотин қизлар фаоли  5-8млн
Маҳалла раиси 3.8-5млн

Маҳалла раиси 24-соат маҳаллада яшайди хоҳлаган вақти топса бўлади, бошқа "Еттилик" Ходимлар бошқа ҳудудлардан қатнаб ишлайди улар уй, машина, субсидия, нимага бу Давлатимизни Халқни пулини совураяпмиз кераксиз нарсаларга???
Ҳеч қайси ҳоким ëрдамчиси ўзи бориб бирор ишсизни Маҳалла раисисиз ишли ëки тадбиркор қилган жойи йўқ ҳатто фукароларни танимайдику бошқа ҳудуддан бдлса?
Ҳолвани Хоким ейди-Калтакни етим ейди деганими бу?

Бу масалани Молия вазиримиз Ж. Қўчкоров кўпроқ уйлаб кдрса бўларди қаердаги ССВ лиги фаррош фелшерлари штатини қисқартирмай мана кимларни штатини қисқартириш керак!!

Мана ҳамма ходимларни иш ҳақлар ойнинг 2-3 санасида тушди. Маыалла раисини ойлиги 7-санада ҳам йўқ сабаб нима?

Кечаси тинчлик осойишталик учун жавоб берса Раис,
Камбагалликдан чикариш ва ахолини банд килиш учун жавоб берса Раис,
Ëшларни назорати учун жавоб берса Раис
Оилаларни ажрими тинчлиги учун жавоб берса Раис,
Махалла Ободлиги учун жавоб берса Раис кани унда унга моддий манфаатдорлик?

Сизларда илтимос бу тизимни кайта куриб чикиш керак деб уйлайман.

Юқоридаги мурожаатни уюшмадаги окаларим ўрганиб чиқиб амалий ёрдам беради деган умиддамиз.

Маҳалла раиси

https://t.me/Hurfikruznews

ОҚДАРЁЛИК АЛЬФОНСНИ КИМ ЖАЗОЛАЙДИ?

Оқдарёлик Шалтоқ (исм-шарифлар ўзгартирилган) тўйсиз, ФҲДЁдан ўтмасдан ўзига ўхшаган қизга уйланди. Битта фарзандли бўлгач, ажрашиб кетди. Чунки оталик масъулиятини ҳис қилмади. Иккинчи маротаба Ўктамойга уйланди. Ўктамойни онаси қаттиқ турганлиги сабабли ноилож ФҲДЁдан ўтишди, тўй қилишди. Содда Ўктамойга эри Шалтоқ маъруза ўқишни бошлади: “Одамлар куёви учун нималар қилмайди? Отангга айт, пул берсин. Яшаш шароитимизни яхшилаймиз!” Ўктамойга эрининг ҳар битта гапи “қонун”дек эди. Шунинг учун отасиникига бориб, бироз пул олиб қайтди. Эр “Иш йўқ” деган баҳона билан ҳеч қаерда ишламади. Аёлини яна отасиникига юбориб, Туркияга ишга бориши учун пул олиб келишини тайинлади. Ўктамой мардикор отасиникига бориб, йиғлаб, сиқтаб яна пул олиб қайтди. Шалтоқ Туркияга кетди. Ўктамой туғруқхонага тушди. Қайнона келинни туғруқхонага ташладию қочди. Чунки у чиқим қилгиси келмади. Ноилож Ўктамой ҳамширанинг телефонидан йиғлаб ўз онасига қўнғироқ қилди. Онаизор ҳаллослаб етиб келди. Қизини туғриқхонадан ўз уйига олиб кетди. Чунки қайнона “Мен чақалоққа қарашни билмайман. Ўз уйингизга олиб кетинг!” деди. Икки ойдан сўнг қайнона қудасига телефон қилиб ”Уйда ишлар кўпайди. Келинимни таксига ўтқизиб юборинг!” деган буйруқни берди. Ноилож онаизор қизи ва неварасини таксига ўтқизиб юборди. Уч ойдан сўнг қайнона “Неварангиз касалманд. Ўзингиз даволатинг!” дея Ўктамой ва қизини онасиникига кеткизворди. Шундан сўнг умуман хабар ҳам олишмади. Она-бола шифохонада ётиб, даволанишди. Шалтоқ аёлига қўнғироқ қилиб “Тезда шифохонадан чиқ! Ёлғондан ётма! Онамга ёрдам бер! Пахта даласига чиқ!” дея ўшқирарди. “Қизим касал” деган гапига эр “Бола думалаб-думалаб катта бўлади. Баҳона қилма!” дея уни сўкди. Ўктамой дардини ичига ютди. Қайнона шифохонага уларни кўргани келмади ҳам. Шифохонадан яна улар ота уйига қайтди. Эр ҳар куни унга қўнғироқ қилиб, руҳий босим ўтказди. Қийналиб қолган Ўктамойга эридан алимент ундириш учун судга ариза ёзиб бериб, топширдим. Боласига нафақа пули чиқариб бердим. МИБга ариза ёздим.  Қайнона алимент тўлашни ўз бўйнига олди. Ойига атига 200 минг сўмдан алимент тўлади. Эр Туркиядан депорт бўлиб ҳеч вақосиз келди. Ўктамойни ярим кечаси келиб, алдаб, авраб уйига олиб кетди. Эртаси куниёқ унга “Алиментдан воз кечиш” ҳақдаги тилхатини ёздириб олди.  Ўктамой ҳомиладор бўлди. Аммо эр ҳомилани аборт қилдирди. Эгизак экан ҳомиласи. Шалтоқ ўз болаларини қотили бўлди. Қайнонага ишламайдиган ўғил ва келин керак эмасди. Шунинг учун уйидан чиқариб юборди. Улар бир молхонадан паноҳ топишди. Молхонада Ўктамой ишлар, Шалтоқ қизига қараб ўтирарди. Шалтоқ ўзини касалмандликка солиб аёлини алдаб иш қилмасди. Қаровсиз қолган битта мол ўлди. Молхона эгаси уларни ҳайдади. Кейин Шалтоқ аёлини авраб, отасидан пул олдириб ишлагани Туркияга опасини ёнига юборди. Ўзи эса аёли юборган пулларни еб-ичиб юрди. Бир йилдан сўнг Ўктамой Туркиядан қайтди. Иккинчи боласини туғди. Шалтоқ уни авраб 40 миллион сўм кредит олишга ундади. Лақма аёл эрига ишониб банкдан 40 миллион пул кредит олди. Шалтоқ бу пулларни ҳам еб-ичиб юборди. Аёл эса иккита боласини ўз онасига ташлаб кредитни ёпиш учун ишга чиқиб кетди. Альфонс эр бўлса парвойи палак. Қиш ойида иш топиш ҳам муаммо. Энди Ўктамой кредитини қандай тўлайди? Альфонс эркакларни ер қандай кўтариб тураркан-а?
Оқдарёлик альфонсни ким жазолайди?

Хонбиби ҲИММАТ қизи, Hurfikr.uz сайти мухбири

https://t.me/Hurfikruznews

АҚШга қайтарилган 7 та вертолёт бўйича "Толибон" Мудофаа вазирлиги баёнот берди:

"Ислом Амирлиги бу масаладан хавотирда, чунки бу вертолётлар Афғонистонга тегишли бўлиб, аввалги маъмурият амалдорлари қочиб кетганидан кейин Ўзбекистонга кўчирилган, шунинг учун уларни Афғонистонга қайтариш керак.

Бу вертолётларнинг ҳар қандай сабабга кўра АҚШга ўтказилиши биз учун қабул қилиниши мумкин эмас, чунки Афғонистон халқи ўз ҳуқуқларини ҳимоя қилиш ва сўроқ қилиш ҳуқуқига эга, қўшни давлатлар қатори афғонларнинг ҳам ҳуқуқлари ҳурмат қилиниши керак.

Биз АҚШдан ушбу вертолётларни Афғонистонга қайтаришда тўсиқларни кучайтирмасликни, аксинча уларни афғонларга қайтаришни талаб қиламиз".

https://t.me/Hurfikruznews

Анора Содиқ ва ахборот майдонида фаол бошқа одамга "Зарафшон" ёки бирор зал-у кошона керак эмас. Тегишли органларнинг барчасидан рухсат олиниб, АОКА билан келишилиб, уларнинг фотиҳаси билан ўтказилиши керак бўлган медиа тадбирнинг охирги дақиқада жойсиз қолиб кетиши Реал Ўзбекистон, яъни ҳукумат пропагандасини қилмайдиган ҳар қандай томондан қўрқишга асосланган ҳаракат.
150 журналист, блогер ва активистлар таклиф қилинган эркин тадбирга Тошкентда саҳна бериш учун юрак керак, ирода керак, ақл керак. Аслида бундай тадбирларнинг ўтиши, уларни ўтказишга иштиёқ ва ғайрат борлиги Ўзбекистонда ҳамон эркинлик нафаси уриб турганидан далолат эмасми? Буни режим тушунмаслиги ва қадрламаслигига бугунги ҳолат яна бир мисол. Ўзбекистонда медиа эркинлик қанчалик деб тез-тез сўрашади. Мана сизга информацион сиёсатнинг бир акси.
Аслида мамлакат бўйлаб фаол ишлаётган, Ўзбекистон аҳолиси вақтида зарур ахборотни олиши учун тер тўкаётган одамлар Ўзбекистонни чиндан эъзозлайдиган, ҳатто амалдаги сиёсат иш бериши керак деб ундаб келаётган, бу жиҳатдан тизимга ёрдамлашаётган инсонлардир.
Uzdiplomat.uz йиллик танловининг ғолиблари билан бир танишиб чиқинг. Мустақил мутахассислар у ерда бармоқ билан саноқли. Аксарияти - давлат органлари, уларнинг хизматидаги ва расмий пропагандани қилиб юрган шахслар. Танлов натижаларини ҳукумат аллақачон синчиклаб ўрганиб чиққан, президент ва ислоҳотлар талабига жавоб бериши таъминланган.
Бундай тадбирларни тўхтатиш мумкин эмаслигини раҳбарият англаши керак. Англамагани учун ҳам у ҳар доимгидек олабўжи сифатида намоён. Ёш, ҳали пишиб етилмаган, тинимсиз кузатувдаги, миттигина, молиявий жиҳатдан оёққа туриб улгурмаган медиа ташкилот ўтказаётган бўлса-да, бу танлов ва бугунги тақдимот - Ўзбекистон ахборот маконининг ёрқин кўриниши, ҳақиқати. Бутун мамлакатдан ҳамкасб ва сафдошларни бир жойга йиға олган эзгу ташаббус. Республика руҳиятини ва шижоатини акс эттирадиган тадбир. Uzdiplomat.uz ва унинг ҳамкорлари - табриклаймиз, омад ёр бўлсин!

Навбаҳор Имамова

https://t.me/Hurfikruznews

ЎЗБЕК НАВОИЙНИ ЎҚИМАЙ ҚЎЙСА...

Ўзбек Навоийни ўқимай қўйса,
Олтин бошнинг калла бўлгани шудир.
Бедил қолиб, Демян Беднийни севса,
Қора сочнинг малла бўлгани шудир.

Ўзбек Навоийни ўқимай қўйса,
Дод демоққа палла бўлгани шудир.
Маърифатдан айру ўйнаса, кулса,
Аза чоғи ялла бўлгани шудир.

Ўзбек Навоийни ўқимай қўйса,
Алдангани, алла бўлгани шудир.
Юлғич азиз бўлиб, билгич хор бўлса,
Пайтаванинг салла бўлгани шудир.

Эл комил бўлмаса, юрт бўлмас улуғ,
Беқадр маҳалла бўлгани шудир.
Қалб тўла нур халқнинг ризқи ҳам тўлуғ,
Омбор тўла ғалла бўлгани шудир.

Ўзбек ўзлигини англаса бекам,
Унинг "Баракалла" бўлгани шудир.
Оламга: "Навоий наслиман", - деган
Овози баралла дегани шудир.

Эркин ВОҲИДОВ,
Ўзбекистон Қаҳрамони

https://t.me/Hurfikruznews

МИНБАРДА АЙТИЛГАН  "ТЕЗ ЁРДАМ"

  "Тез ёрдам"  хизматига бўлган ишончим кўкка совурилди. Турмуш ўртоғимнинг қон босими 140га кўтарилиб кетди, бу одатдаги меъёрдан 50 га ортиқ эди. Вужуди қалтириб,  кўнгил айнаш бошланди.
  Тиббиётдан олис инсон бундай пайтда нажотни "Тез ёрдам"дан кутади.
 2025 йил 7 февраль куни кеч соат 21.47 да "103" рақамини тердим. Операторга уй манзилим,  бемор ва ҳасталик тўғрисидаги маълумотни тақдим этдим.
 Соғлиқни сақлаш вазири ўзининг чиқишларидан бирида "Тез ёрдам"  Тошкент шаҳрида узоғи билан 10-15 дақиқада чақириқ бўйича етиб боришини таъкидлаганди.
 20,30,40,50 дақиқа ўтдики,  кўзимиз эшикка қадалган. Бу орада беш марта операторга чиқдим. Жавоб бир хил:"Чақириқ кўп,  тайинлаймиз, етиб боришади".  
Умид сўнишни бошлагач,  соғлиқни сақлаш вазирлигининг "Ишонч телефони" ҳисобланган 1023 қисқа, 71-241-10-65 рақамли шаҳар телефонларига уланишга уриндим. Гўшакни кўтарадиган инсон йўқ.
  Яна "103"га тераман. Операторлардан бири билан бўлган диалогимизга қаранг.
  - Қўнғироқ қилганимизга анча бўлди. Қачон келади?!
  - Муҳтарам фуқаро. Боришади. Чақириқ кўп.
 Тилидан бол томиши безовта кўнглимга таскин бермайди.
  -Ҳа,  келмаяпти-ку,  нима қилишим керак?!
Оператор чорасизлигимни маслаҳат сўраш деб тушунган кўринади,  телефон орқали биринчи ёрдам кўрсатишни тушунтирадиган шифокорга улаб юборди.
 - Бошини баланд кўтаринг,  хонани шамоллатинг,  юзини совуқ сувда ювинг...  Кутинг,  тезлатамиз.
 Бир соат ўтди. Дарак йўқ. Роппа-роса 1 соату 7 дақиқада тиббиёт ходимлари кириб келишди. Мана сизга тез ёрдам сифати. Аёлим ваннахонада яна кўнгли бузилиб турганди. Шифокор қон босимини ўлчаганди,  150 га чиқиб бўлган экан. Зудлик билан укол қилишди,  юракка дори беришди. Келгунга қадар узоқ вақт ўтгани сабаб асабийлашган кўринаман.  Ўзимда ҳам юрак ўйноғи уйғониб қолди. Шифокор қон босимимни ўлчаб,  корвалол ичирди.
Икки кун бурун бир танишим илкис юрак ҳуружидан вафот этди. Бир ойдан сал зиёдроқ вақт 57 ёшга кирганди. Ҳар хил ўйлар бошимда чарх урарди.
 Тиббий кўмакка муҳтож бўлишингдан бир соатларча олдин "Тез ёрдам"  рақамини териш керак эканми?!
 Эрталаб хусусий шифохонага чиқишга қарор қилдик. Давлат тиббиёт муассасаларига тушадиган зўриқишнинг олдини олишга ҳисса қўшиш керак-ку!

Ғайрат Болтабоев

https://t.me/Hurfikruznews

ЁХУД КИМДИР БОЛАГА ЗОР, КИМДИР БОЛАНИ ҚИЛАР ХОР

Тошкент вилояти Ўртачирчиқ туманида яшовчи Шабнам (исм-шарифлар ўзгартирилган) Йўлчи билан 2015 йилда ФҲДЁдан ўтиб, турмуш қуришган. Уларнинг икки ўғил ва бир қизи бор. Шабнам 8 йил қайнона-қайнотанинг хизматини қилган. Айрим сабабларга кўра икки йилдан буён ижарада яшашади. Йўлчи асосан бозорда тирикчилигини ўтказади. 2023 йилда Йўлчи содда аёли Шабнамни алдаб, авраб унинг номига “myhous” МЧЖ очади. Шабнам “Бу МЧЖ нима билан шуғулланади?”, дея сўраганида эри унга “Қурилиш билан боғлиқ. Қолганини билишинг шарт эмас”, дея жавоб беради. Нега номард эр МЧЖни ўзини номига очтирмади? Бундан мақсад нима эди?
Йўлчининг ишлари юришмай қолди. Эр аёлини ва болаларини ташлаб кетди. Икки ойдан буён умуман хабар олмайди. Аксини олиб Шабнамнинг 6 ойлик ҳомиласи бор. Болаларининг нафақасига аранг кун кечириб келишмоқда. Ижара уйнинг эгаси таниш бўлгани учун ундан ижара пули олмайди. Аммо коммунал тўловларни Шабнам қилиши керак. МИБдан икки ойдан буён Шабнамга унинг номига очилган МЧЖ учун тўланмаган солиқларини тўлаш ҳақида хат келади. 10 миллион тўлаши керак экан.
Аёлнинг дардларини эшитиб “НОМАРДЛАРДАН ДОД!” деворгим келди. Ўзимни аранг тутдим. Кимдир болага зор, кимдир боласини қилар хор. Энди Шабнам ҳомиладор ҳолида учта боласи билан қаерга борсин?
Мен Шабнамга эридан алимент ундириши учун ариза ёзиб бердим. Йўл-йўриқ кўрсатдим. Қўлимдан келган ёрдамим шу бўлди.
Қачонгача айрим номард эркакларни деб аёллар азият чекади? Болаларни уволи тутмайдими?

Хонбиби ҲИММАТ қизи, Hurfikr.uz сайти мухбири

https://t.me/Hurfikruznews