Halima Ahmedova

ҲАЛИМА АҲМЕДОВАНИНГ "ЯШИЛ" КИТОБИДАН ТАГИГА ЧИЗИБ ЎҚИГАНЛАРИМ

Эй, қайғу билан бахтни яраштирувчи,
Эй, Ажал кўзларини қамаштиргувчи,
Ўзимни ўзимда адаштирувчи
Ноламга гул тиккан – тонгни кўрдингми,
Кўрдингми, иситмаси баланд шафақни...
*
Айтгин, нима учун, не учун ахир,
Минг йилки, жонимда эримайди қор?
*
Қачонлардир мен ҳам ям-яшил эдим,
Дарёга талпинган жилғадай яшил.
*
Кулиб йиғламоқнинг баҳоси қанча,
Йиғлаб кулмоқликнинг қиймати надир?
*
Қушлар тилин ўрганолмадим,
Аммо ўрганганман соғинч тилин, жуда мукаммал.
*
Баъзида толиқиб қолган пайтларим,
Тошкент дарахтлари берар сабрини.
*
...Анча яшаб қўйдим шекилли,
Гоҳи йўл йўқотдим, йўл топдим баъзан.
Билган ҳақиқатим шу бўлди фақат:
Юрак қибласида тураркан Ватан.
*
Қайта туғилмоқлик рост бўлса агар,
(О, бу ширин истак жўш урар қонда)
Онасин соғинган бир мурғак янглиғ
Ёлвориб сўрардим Парвардигордан:
Қайта туғилайин Ўзбекистонда!
Қайта туғилайин Ўзбекистонда!
*
Кўнглимнинг хилватида
ғанимлар майсага,
дўстлар нурга айланадилар.
*
Мунғайиб учаётган қушлар кўксидан
Биз ҳайдаб юборган ишқ берар овоз.
*
Яшагим келади шаббодаларнинг
Ўрик гули тўла хаёлларидай...
*
Яшаш нелигини билганим сари
Кўксимда дийдоринг мавжланар, Худо...
*
Қаранг,
Ахир, яхшилаб қаранг,
Дунё кўзин қамаштирмоқда
Тўмариснинг тожидаги нур.
*
Ҳаёт бу – Ватандир, Ватан – бу ҳаёт.
*
Ва дейман:
Бойлигу молу дунё деб
Ўзини ўзида адаштирганлар,
Хас ташлаб ватаннинг кўзига,
Ғанимнинг тўрига лаққа тушганлар,
Қаранг, Широқ келяпти!
*
Ҳали вақт бор...
Дарёларнинг тоза оҳангларидан,
Маст бўлиб яшамоқ мумкиндир ҳали.
Оч қолган кўнгилни тўйдирса бўлар,
Уфқ ёш гўдакдай кулган маҳали...
*
...Орзу соҳилида қачондир менга
Йиғладинг,
Жилмайдинг, нимадир дединг.
Узилиб тушаётган баргдек титрайман.
Наҳотки, наҳотки ўша сен эдинг?!
*
Оппоқ хайригуллар хайр қилдилар,
Ҳар куним савдои дайр қилдилар,
Кўнглимда Мажнунлар сайр қилдилар.
Нажоткорим, соянг кўзимга тушди,
Ўзимдан ажралган ўзимга тушди.
*
Эй бахт, кўзи юмуқ тилсимда эдинг,
Бадбахтлар чорлаган сим-симда эдинг.
Умримни эллик тўрт бўлакка бўлиб,
Борсам, йўқ экансан, сен кимда эдинг?!
*
Мен куламан, кўзимдаги ёшни синдириб...
*
Ҳар лаҳза нафасинг сўзимга келди,
Баҳорнинг қарғиши кузимга келди.
Хазонни эркалаб юпатган эдим,
Ёраб, унинг ранги юзимга келди.
*
Қобиқларни ёринг, бу издиҳомда,
Қуёш таронасин бузмасдан ғамлар.
Дўстмисиз, ғанимми, ўзгами, барибир,
Мен сизни соғиниб кетдим, одамлар!!
*
Ёдинг олис,
Ёдинг ширин, ёдинг мукамбар.
*
Ҳаётнинг кўзлари бирам чиройли...
*
Бир қуш бўлсам, қанотлари зумрад бўлсам,
Санинг розинг кўмилган бир узлат бўлсам,
Нигоҳингни ичган малактийнат бўлсам,
Манзилингни берармидинг?!
*
Йиғласам, йиғимда осмон кўринса...
*
Исминг куйлагандим қушлар тилида,
Гул унди бўғзимдан забонимгача.
*
Ёдингдами, кўнглимизнинг туғилган куни?!
*
Аммо, ҳозир енгилсам гар,
Ютқазсам агар,
Қайда қолар менинг ўша Ҳалималигим.
*
Нечун бу тонг дилда хазон жилмайди...
*
Энди мени тинч қўй, йўлимдан қочгин,
Мени енгиш сенга бўлмайди осон.
Ахир менинг каби девоналарга
Худо меҳрибондир, худо меҳрибон.

✍️ Ҳалима АҲМЕДОВА

(Otabek Bakirov postidan olindi)
@halima_ahmad

Сувлар маъюс тортди,
Сўлган ялпизнинг
Хотирасин олиб кетди олисга.
Сувлардан ажралиб қолган соғинчни
Юпатиб тўлдирдим ям-яшил ҳисга.
Аммо вужудимнинг томирларида
Эмаклаб чарчади бетаскин ҳаёт
Овоз бер, қайдасан, қўлларингни чўз,
Ўзимни қайтадан айлайин бунёд.
Бемажол қоқсуяк бармоқларимда
Адашиб кетади кунлар саноғи.
Ўчиришга шайдир қайсар шамоллар
Қорачиғимдаги илинж чироғин…
Сен борсан, дарахтлар орзусидай пок,
Ҳар бир ҳужайрамда жимирлар само.
Сен борсан,
Дарёни ҳўплаган булутлар билан
Ёдимга шудрингдай тушасан гўё.
Ёмғир товушида сенинг қадаминг
Юрагим зарбига кетар қовушиб.
Ўзимни ўзимга таништириб қўй,
Хазонлар ичида кетмай адашиб…
Сен борсан…
✍Ҳалима Аҳмедова

@halima_ahmad

* * *

Oy o'g'irlab ketsa bir kuni,
Mani g'amgin nurlar yurtiga.
Yuragimni yashirgin, ona,
Botayotgan quyosh ortiga.
Yalpizlarning diliga cho'kkan
Bolaligim ko'zlarini top.
Aldab, yupat, meni eslab gar,
Kelsa bedil xotirkash azob.
Ishqning mangu darvozasiga
Ro'molimni osib qo'y, ona.
Man malaklar bazmidan u kun,
Termulgayman ishqli devona.
Shamolga ayt, keltirsin xabar,
Unga manim ismimni boyla.
Man tushiga kiray dunyoni
Onajon, sen alla ayt, alla.
Oy o'g'irlab ketsa bir kuni
Mani g'amgin nurlar yurtiga.
Yuragimni yashirgin, ona,
Botayotgan quyosh ortiga.

✍️ Halima Ahmedova
@halima_ahmad