"ГУЛИСТОН" ЖОМЕ МАСЖИДИ

Ўлим олдидан калимани айта олмаган талаба

Ривоятда ҳикоя қилишларича, Фадил ибн Айязнинг талабаси бор эди. Бир куни хасталаниб қолди. Устози уни зиёрат қилгани бориб, шогирдини оғирлашиб қолганини кўради. Бош томонига ўтириб, дарров Ёсин сурасини ўқий бошлади. Хаста кўзини очди ва:
- Устоз, ўқиманг, тўхтатинг, - деди.
Фадил бироздан сўнг калимайи шаҳодатни ўқиди ва беморга қайтаришни сўради. Талабаси:
- Бу сўзларингиздан безор бўлдим, - деди ва бироздан кейин жон берди.
Фадил уйига қайтди. Талабасининг даҳшатли ҳолига куюниб йиғлади. 40 кун уйидан чиқмади. Бир куни кечаси тушида талабасини дўзах ичида кўрди.
- Сен талабалар ичида энг ғайратлиси, доноси эдинг-ку! Қалбингни иймон тарк этишининг сабаби нима? - дея сўради. Талабаси унга шундай жавоб қилди:
- Бунинг уч сабаби бордир:
1. Иккиюзламачилик. Дўстларимга сиз айтган ўгитларнинг доим тескарисини айтар эдим.
2. Ҳасад. Жуда қизғанар эдим. Дўстларимга кўп ҳасад қилардим.
3. Ичкилик. Бир хасталигим бор эди, шуни даволайман деб баъзан май ичар эдим.
Мазкур ҳикоятда англашилганидай, ўлим келганда яхши ва ёмон банданинг ҳоли маълум бўлади. Ояти карималарда Аллоҳ таоло мунофиқларга ўлимдан ҳам қаттиқ хабарни билдиради. Пайғамбар истиғфор айтса ҳам, Роббим кечирмайди ва уларни ҳидоятга йўлламайди. Зеро, гуноҳкор ва гумроҳ ҳолида охиратга сафар қилишнинг оқибати қандай хатарли эканлиги маълум.

"Обидлар йўли" китобидан.
Гулистон жоме масжиди имом ноиби М.Абдуманопов

https://t.me/guliston_jome_masjid

Кўп таом ейишнинг зарарлари:
1. Кўп овқатланиш – қалбни қаттиқлаштиради. Иймон нурини сўндиради.
2. Кўп ейиш органлар фаолиятини издан чиқаради. Саломатлигингизга путур етади. Қорни тўқ одам ҳаром нарсаларга қарашга ўрганади. Манманликка берилади. Ёмон сўз билан бошқаларнинг дилини оғритади.
3. Кўп таом ейиш идрок, хотирани заифлаштиради.
4. Кўп ейиш кам ибодат қилишга сабаб бўлади. Чунки вужуд оғирлашиб, дангаса бўлиб қолади. Ривоят қилишларича, бир куни пайғамбар Яҳё алайҳиссалом шайтонга дуч келиб қоладилар. Шайтоннинг қўлида шохчали чивиқни кўриб бунинг нималигини сўрайдилар. Шайтон шундай жавоб беради:
– Нафснинг истагидир. Бу билан одамларни алдайман.
– Мени ҳам ҳеч алдашга уриниб кўрдингми?
– Йўқ. Фақат бир кеча тўйгунча таом егандинг, ўша тун ибодатингни қилмай ухлаб қолдинг, – деди шайтон.
– У ҳолда бундан кейин тўйиб овқатланмайман, – дедилар Яҳё алайҳиссалом.
– Ундай бўлса, бундан кейин бу ҳийлани ҳеч кимга ишлатмайман, – деди шайтон.
5. Кўп таом ейиш туфайли ҳаром луқма ейиш эҳтимоли ортади. Чунки ҳалол ризқ танага етарли миқдорда берилади бандага. Ҳаром ризқ, мол эса эҳтиёждан кўп микдорда келади.
6. Кўп овқатланиш жон таслим қилар чоғида оғир азобларга сабаб бўлади.
7. Қорин бандаси бўлиб қолган кимсалар охират савобидан маҳрумдирлар. Аллоҳ таоло шундай буюради: “Кофир бўлган кимсалар дўзахга дучор қилинадиган кунда (уларга дейилур): “Сизлар ўз ҳузур-ҳаловатларингизни дунёдаги ҳаётингиздаёқ кетказдингиз ва улардан фойдаланиб бўлдингиз. Энди бугун у ерда ноҳақ кибр қилганингиз ва фосиқ бўлганлигингиз сабабли, хорлик азоби билан жазоланурсиз” (Аҳқоф, 20-оят).
8. Кўп овқат ейдиган кимса қиёмат куни банди қилинади ва сўроққа тутилади. Ҳалол таом ейишда нима учун ҳаддидан ошгани ҳисоби сўралади ва азобланади. Юқорида санаб ўтилганлар қорин бандасига айланган кимсаларни кутаётган азоблар эди. Киши ўзини-ўзи ўтга ташламаслиги лозим. Аллоҳ марҳамати ва карамига эришиш учун нафсни тия олиш, меъёридан ортиқ таомга муккасидан кетмаслиги зарур. Ҳазрат Пайғамбаримиз соллаллоҳу алайҳи ва саллам шундай марҳамат қиладилар: “Ҳаромдан ўсган ҳар бир жасад дўзахга ҳақлидир”.

“Обидлар йўли” китобидан.
Гулистон жоме масжиди имом хатиби А.Усмонов

https://t.me/guliston_jome_masjid

Солиҳ салафлар Шаъбонда

Шаъбон ойи келса, Ҳабиб ибн Абу Собит: «Бу қорилар ойи», – дер эди.
* * *
Амр ибн Қайс эса эшикларини тамбалаб олиб, Қуръон қироатига киришар эди.
* * *
Ҳасан ибн Шуҳайл раҳимаҳуллоҳ Шаъбонда кўп Қуръон ўқир ва: «Раббим, икки улуғ ойни менга манфаатли қил», – дер эди.

Ибн Ражабнинг «Латоифул маориф» китобидан.

https://t.me/guliston_jome_masjid

ЖАННАТДА ҲАМ БОЗОР БОР

Анас ибн Молик розияллоҳу анҳу ривоят қилади: «Расулуллоҳ соллаллоҳу алайҳи ва саллам дедилар: "Жаннатда бир бозор бор. Ҳар жума унга (жаннатийлар) келадилар. Сўнгра шамол эсиб, уларнинг юзларию кийимларига мушк сочади ва уларнинг ҳусни жамоли зиёда бўлади. Кейин (уларнинг) ҳусни ва жамоллари зиёда бўлган ҳолда қайтадилар. Аҳллари уларга: "Аллоҳга қасам, биздан кейин ҳусни жамолда янада зиёда бўлибсиз", дейдилар» Имом Муслим ривояти.

https://t.me/guliston_jome_masjid

«“Ё Аллоҳим! Қуръонни қалбимнинг баҳори қилгин”, деб дуо қилар экансиз, Мусҳафингизни очинг, ўқинг ва Аллоҳнинг Каломини тафаккур қилинг. Қуръон ўқиш учун вақт ажратинг. Ҳар куни шу тартибга риоя қилинг. Шундагина Каломуллоҳ қалбингиз баҳори бўлади.
Қуръон токчада турса ёки баъзи хонадонлардаги каби зийнат учунгина олинса, асло киши қалбининг баҳори бўлмайди».

Шайх Абдураззоқ Бадр

https://t.me/guliston_jome_masjid