G‘ayratbek Xoldarov | Blog

Yolg'izlik bu ozodlik?

Seni ko'p tanishlaring, qarindoshlaring odamga qo'shilmaydi bu, yovvoyi muomalasi yo'q, odam bo'lmaydi bu deb o'ylashadimi? Haa... bu tanish holat.

Aslida sen shunchaki ulardan boshqachasan. Senga ularning qo'shnisi qanchaga mashina olgani umuman qiziqmas. Seni butun boshli yer sayyorasi, koinotdagi rasmlarda zarracha nuqta bo'lib ko'ringan yerdan boshqa joyda ham ongli mavjudotlar bo'lishi mumkinligi qiziqtiradi.

Do'stlar bilan yig'ilganda osh pishishini kutib o'tirganingda, hayolingda odamlar mol sutini iste'mol qilishni qachon o'ylab topishgan ekan deb o'ylab o'tirasan.

Qarindoshlarnikiga to'y yoki maraka bo'lsa borging kelmaydi. Chunki borganda sun'iy tirjaygan yuz bilan hamma bilan ko'rishib chiqishing kerak...(f** idiot)

Bugun to'yi bo'lgan kelin-kuyov uchun aytilgan "Ikki yosh baxtli bo'lsin".. O'g'il to'ylar bo'lsin" kabi tilaklar aytging kelmaydi. Chunki 1 yildan keyin uyidagi qaynona-kelin muammosi sabab ajrashgan yigitning keyingi to'yida ham xuddi shu tilaklar aytilaverishini guvohi bo'lgansan.

Senga yolg'izlik yoqsa bu yomon narsa emas. Yolg'izlikni yaxshi ko'rgan insonlar kuchli insonlar bo'ladi. Chunki ular qanday zerikmaslikni biladi.

Oqibatimiz yo'qolmasin deydigan do'stlaring, bir kun kelib foydang tegmay qolganida, umuman boshqa yuz bilan senga munosabat qilganida, vaqtingni bekor sarflaganingni tushunib yetasan.

Inson so'zlari bilan bir tiynga qimmat aslida. Xarakat barcha narsani hal qiladi. Insonni qilayotgan ishlariga qarab baho berish kerak, gapirayotgan gaplariga qarab emas.

Ba'zi odamlar bor, gaplashmasa turolmaydi. Farqi yo'q kimnidir g'iybat qiladimi, siyosatni gapiradimi, qo'shnisini sigiri tuqqanidan keyin o'zini qanday tutayotganimi...suhbatga muhtoj.

Sen esa kitob bilan ham suhbatlasha olasan. Ularni hayotida o'zingni his qila olasan. Yozuvchilar bilan, qahramonlar bilan gaplashasan.

Lekin ular seni o'ziga o'xshatmoqchi bo'ladi. Ularni gapini eshtishingni xohlashadi. Eng yomoni shuki o'zlari hayotda baxtsiz insonlar senga baxt formulasini chizib berishadi. Ular xohlaganday yashashing kerakligini istashadi.

Kuching boricha tupur. O'z yo'lingdan qolma. Sen tanlagan yo'l eng to'g'risi. Mutlaqo to'g'risi.

Keyinchalik xato qilib, o'sha xatolardan xulosa chiqara olganingni sezsang, davom etaver.

Sen uchun baxt boshqalarnikidan farq qilishi mumkin. Kim uchundir ko'zining ko'rishi baxt bo'lsa, kim uchundir kuni bo'yi sigaret chekmay, kechga borganda sigaretni qoniqib tortish baxt.

Shu uchun senga nima kerakligini sendan boshqa hech kim bilmaydi. Sen baxtli bo'lasan. Davom etaver.

Baxtingni asra, so'z bilan ifoda etma, seni baxtli ekanligingni bir zamonlar senga formula tuzib berganlar shundoq ham sezishadi. Baxtli bo'lma, baxtni yarat do'stim!

@gayratbek_xoldarov

"Elon Musk" kitobini o'qiyapman. U yozgan emas. U haqida yozishgan.

G'ayritabiiy inson ekan, hech narsadan qaytmaydigan, kitobdan boshini ko'tarmaydigan, qilaman dedimi oxirigacha boradigan xarakteri bor ekan.

Ya'ni o'ylagan narsasi haqiqatda xato yoki umuman amalga oshirib bo'lmasligini o'z ko'zi bilan ko'rmaguncha to'xtamaydigan.

U boyda, hamma narsaga puli yetadi deb o'ylardim. Yo'q u yoshlikdan shunday. Odamovi, do'stlari kam bola bo'lgan.

Qo'pol qilib aytganda, sen buni qila olmaysan degan insonlarga tupurib, hech kim ishonmasa ham harakatda davom etadigan kuchli xarakter egasi ekan.

Kitob va uning hayoti juda ham ruhlantirarkan. Oldingizga kattaroq maqsadlar qo'yishga undarkan.

Kitoblar holatingizga kuchli ta'sir qiladi. Shu sababli hadeb "psixologik travma" oladigan kitoblarni o'qiyvermasdan, positiv kitoblarni ham o'qib turing.

400 bet atrofida ekan, men esa endi 60 bet o'qidim) Tugatganda bu kitobga yana qaytamiz Xudo xohlasa.

Xo'sh, sizchi qanday kitob o'qiyapsiz?(o'qisangiz albatta)

@gayratbek_xoldarov

Butun umrlik motivatsiya

- Dada,
- Ha, og'lim.
- Tarix o'qimoqchiman. Yurist bo'laman.
- Aqling yetyaptimi, qiziqyapsanmi gazini bos!

- Dada, ingiliz tili o'rganmoqchiman. Hozir til o'rganish ko'p sohalarga eshik ochar ekan.

- Aqling yetyaptimi? Qiziqyapsanmi? Gazini bos!

- Dada, telegramda kanal ochib yuritmoqchiman. Online daromadni oshirish uchun.

- Aqling yetyaptimi? Qiziqyapsanmi? Gazini bos!

- Dada, kopirayterlikni o'rganmoqchiman... biroz pul ketib qolarkan...

Qiziqyapsanmi? Gazini bos! Pulidan o'ylanma, sen yaxshi o'qisang bo'ldi.

Biror narsa qilmoqchi bo'lsam hech narsaga to'sqinlik qilmagan shu vaqtgacha. Natijasi noma'lum desam ham, o'rganganing qoladi deydi.

Onam ham doim fikrimni ma'qullaganlar.

Mana hozir o'rgangan barcha narsam asqotyapti. Asta-sekin o'z yo'nalishimni topa boshlayapman.

Bilmadim nega ko'p ota-onalar o'z farzandlarini, ular xohlamagan sohaga yo'naltirib qo'yishadi. So'rasangiz hatto farzandi nimani xohlayotganini ham bilishmaydi.

U bola katta bo'lgunigacha ota-onasini fikri va ularning qarorlari bilan yashagan.

Va yana kamiga 18 ga to'lganda "katta bo'la bo'lib qolding, o'zing qaror qabul qila olmaysanmi? Shunga ham aqling yetmaydimi?" Deb koyib ham qo'yishadi.

Yosh paytingizda qiziqayotgan narsalaringizni sinab ko'ring. O'xshamasa ham hech narsa yutqazmaysiz.

Yoshingiz ulg'ayganda tavakkal qilsangizu, o'xshamasa, vaqt va pul yo'qotasiz.

Bu postni men ham qachondir dada bo'lganimda, o'zimga eslatma bo'lishi uchun yozdim)

Ungacha esa sizga ham dadamning gaplari:

Aqlingiz yetyaptimi? Qiziqyapsizmi? Gazini bosing!

@gayratbek_xoldarov

2 yil oldin ochgan kanalimni topib oldim. Muhabbat, haqida rosa yozgan ekanman)

O'qib, o'zim hayron qoldim nahotki shu postlarni men joylaganman deb.

Ancha o'zgardimmi? Yoki o'zimni o'zgargandek tutyapmanmi? Bilmay qoldim.

Ammo hozir barchasi boshqacha nazarimda. Tuyg'ular, fikrlar...

Balki yana 2 yildan keyin bu yozganlarim ham o'zimga g'alati tuyular. Shunday bo'lishini umid qilaman.

Sodiq bo'lmoq kerak: so'zga, majburiyatlarga, boshqalarga, o'ziga sodiqlik. Shunday boʻlish lozimki, sizni eslaganda gʻazablanishmasin...

Rad etilishdan qo'rqasizmi?

Tog'am bilan mashina bozorga chiqdik. Ish bor yordam berasan degandi, ho'p dedim.

Ijtimoiy tarmoqlar va xizmatlarini jamlagan leaflet(varaqa) tarqatishim kerak edi.

Qo'limga 400-700 atrofida varaqa tutqazdi. Bozordagi barcha odamga berib chiqasan dedi, ha oson ekanku deb o'yladim.

Bozorga kirdim. O'rtada turibman. Barchasi begona. Qotib qoldim. Hech nima qila olmadim.

Nimaga? Chunki qo'rqdim. Nimadan? Rad etilishdan. Har bir insonga gapirib aka buni oling deb chiqishim kerak edi. Pullik emas, oddiy narsaku berib qo'yish deb o'ylashingiz mumkin.

Ammo, odamlar har-hil. Oddiy bir bola bilan ishi yo'q. Tabiiyki qo'lida katta pul aylanadi ularni.

Bor boshqa ish qil, menga kerakmas, boshqa odamga bor. Shu kabi gaplar bo'lishi ehtimoli yuqori.

Ota-onam harakatlari va Xudo bergan rizq bilan, hech nimadan kamchilik yo'q katta bo'ldim.

Hech kimga yalinmasdim. Chunki, bunga ehtiyoj yo'q edi.

O'sha kuni o'zimdan qattiq ranjidim. Nahotki shu darajada zaif bo'lsam... tarqatishni boshladim.

Odamlar qiziqyapti. Nima tarqatyapsiz deb o'zlari so'rab kelishdi. Hayron qoldim. Rad etganlari ham bo'ldi. Qo'rquvimga qarshi turishni o'rgandim. Ishimda davom etdim...

Biz doim rad etilishdan qo'rqamiz. Shu sababli qilmoqchi bo'lgan ishlarimizni ayta olmaymiz.

Kimnidir yaxshi ko'rasan o'ziga aytolmaysan, rad etilishdan qo'rqasan. Muammoying bor hech kimga aytolmaysan, hatto yaqinlaringa ham, chunki rad etilishdan qo'rqasan.

Ba'zida hech nimani o'ylamasdan, boricha harakat qilib ko'rish kerak. Chunki, haqiqiy hayot biz o'ylagandaka qo'rquvlarga to'la emas.

@gayratbek_xoldarov

Bu hayotda baxtli bo'lishning yo'li undan ko'p narsa kutmaslikdir. Bo'lmasa qanotlari sindirilgan qushga aylanib qolasan.

Abadiymas bogʻlar, mangumas bahor,
Olov mudom yonmas, oʻchmogʻi tayin.
Yoshlik jismimizni tark aylagan chogʻ,
Yurib boʻlmas axir endi betayin.

Sezmay qolding, ana, onang qarigan,
Ancha choʻkib qoldi otangning qaddi.
Mahkam ushlagancha toʻning baridan,
Sendan madad kutib oʻsar farzanding.

Endi qoʻyib yubor oʻtmishni, unut,
Kuzga yarashmaydi bahoriy hislar.
Oyda-yilda bir bor qoʻymaydi eslab,
Xayoli qalbingdan oʻchmagan qizlar.

Oʻzingni tuproqqa qoʻymaslaridan
Ustiga tuproq tort, muhabbatni koʻm.
Shunda boshlanadi haqiqiy hayot.
Shunda roʻy beradi chinakam oʻlim...

@gayratbek_xoldarov

Duo qilsang hammasi yaxshi bo'ladi (mi?)

Hayotda qiyinchilikka uchrasak aytishadi - Duo qil

Ish topa olmayapsanmi? - Duo qil

Iymonli turmush o'rtoq izlayapsanmi? - Duo qil

Biznesing yurishmayaptimi? - Duo qil

Imtixoning keyingi xaftami? - Duo qil

Agar biz mo'jiza bo'lishini kutib, yaxshi umid va duo qilsagu, ammo hech nima o'zgarmasa yana aytamiz " Ehtimol, hali hammasi yaxshi bo'lib ketar, sabrli bo'l"

Bu yerda men duoning kuchiga ishonchsizlik bildirmayapman, ammo, umuman harakat qilmay, biror narsa yuz berishini kutish ... bu... bu shunchaki illuziya:

-Agar ish qidirayotgan bo'lsang, oldin sohangdagi bilimlaringni oshir. Sheriklar, tanishlar bilan aloqangni kuchaytir. Ish beruvchilarni "eshigini taqillat" va Duo qil.

- Agar Iymonli turmush o'rtoq izlayotgan bo'lsang, avval o'zingni gunohlardan saqla. Juftingda qanday hislatlar bo'lishini istaysan, barchasini o'zingda shakillantirishga harakat qil va Duo qil

- Agar biznesing yurmayotgan bo'lsa, muammoni top, tizimni o'zgartir, ishga olish va ishdan bo'shatish, jamoa va xodimlar bilan ishlash mahoratingni oshir va Duo qil

- Agar keyingi hafta Imtixoning bo'lsa, kuchliroq o'qi, takrorla, sun'iy imtixonlar topshir va keyin Duo qil

@gayratbek_xoldarov

Bu yo'nalishdagi faoliyatim yakunlanadi

Media sohasiga kirganimga ham salkam 3 yildan oshdi.

Ijtimoiy tarmoqlardan foydalanishni boshlaganimga esa bundan ham ko'proq.

Muvaffaqiyat Sirlari brendini yurgizishni boshlaganimdan beri anchagina narsa o'rgandim.

Ijtimoiy tarmoqlar, odamlar psixologiyasi.

Post va videolar tayyorlayman deb anchagina kitoblar o'qidim. Bular meni dunyoqarashimni o'zgartirishga yordam berdi.

Yuzim tanilmagan bo'lsa ham, videolarim orqali insonlarga yordam bera olgan bo'lsam, men uchun bundan ortiq mukofot yo'q.

Ammo...

Ammo, shuncha yil davomida bu tarmoqlardan sezilarli hech narsa o'rganmadim. O'zingiz izlanib post tayyorlab o'rganishingiz mumkin, lekin shunchaki reels ko'rib o'rganmaysiz.

Ishoning hech narsa!

Videolar ko'rasiz tilga oid, dinga, nimalarnidir o'rgatadigan videolar. O'zingizcha yangi narsa o'rganasiz.

Ammo 1 daqiqalik videoning foydasi, keyingi reels videolarni ko'rganingizdan keyin yo'qoladi. Natijada, o'rganyapman, vaqtimni bekor sarflamayapman degan illuziya bilan yuraverasiz.

Ko'p odamlarga tavsiya bergan ekanman, ijtimoiy tarmoqlarga chiqing, daromadingiz oshadi. Rivojlanasiz deb.

Adashgan ekanman. To'g'ri bugungi kunda daromadingiz sezilarli darajada oshishi mumkin. Ammo ba'zi narsalardan anchagina yiroqlashasiz.

Xususan diningizdan, o'rganayotgan bilimlaringizdan va real hayotdan.

Sizga bu boshida bilinmaydi. Ammo vaqtlar o'tgan sayin asabiy va sabrsiz bo'la boshlaysiz.

Fikr-hayolingiz like, izohlar, ko'rishlar soni bilan bog'liq bo'lib qoladi.

Men esa, real hayotga qaytishni xohlayapman. O'z ustimda ishlashga ko'proq vaqtim bo'lishi uchun.

Faqatgina ushbu telegram kanalim qoladi holos. Bu ham o'z fikrlarimni yozib borish uchungina.

Balki qachondir ijtimoiy tarmoqlarga ham qaytarman. Unda boshqacha va boshqa yo'nalishda qaytish qilamiz)

@gayratbek_xoldarov

2024 - yilda 12 ta kitob

Ushbu yilda o'qigan kitoblarim va ulardan olgan asosiy xulosalarim bilan bo'lishmoqchiman:

1. Muvaffaqiyatli insonlarning 7 ko'nikmasi - Stiven Kovi

Odamlarning gaplarini qiziqish bilan tinglash ular bilan mustahkam aloqa o'rnatishimizga yordam berishligini o'rgandim.

2. Do'st orttirish va odamlarga tasir o'tkazish - Deyl Karnegi

Odamlarning ismlarini eslab qolish kerakligini o'rgandim.

3. Ey O'glim - Ali Tantoviy

O'g'il bolalarning nafsi va ahloqini sodda usul va misollar bilan tarbiyalagan.

4. Iymon - Shayx Muhammad Sodiq Muhammas Yusuf

Islom dini bo'yicha sizni qiynayotgan barcha savollarga javob topasiz.

5. Deep Work - Kal Nyuport

Chalg'ituvchi omillardan qochib, diqqatni jamlash orqali yuqori samaradorlikka erishish haqida.

6. Eat That Frog -Brayan Treysi

Eng qiyin va muhim ishlarni birinchi qilish kerakligini o'rgandim

7. Do it Today - Darius Foroux

Ishlarni kechiktirmay o'z vaqtida qilish uchun hayotiy maslahatlar bergan

8. It ends with Us - Kolin Xuver

Hayotdagi qiyin tanlovlar va murakkab qarorlarni tasvirlab beradi

9. Noldan birga - Piter Til

Biznesda monopolyaning ahamiyati qanchalik kuchli ekanligini ko'rsatib bergan.

10. Al Kimyogar -Paulo Koelyo

O'z orzularing ortidan quvish va hayotning ma'nosini topish haqida

11. Ilm olish sirlari - Imom Zarnujiy

Ilm olishda nimalarga ko'proq e'tibor berishimiz kerakligini din va dunyo bilimlari oltin o'rtalig'ida tushuntirgan.

12. Hammasi Rasvo - Mark Manson

Umidsizlikka tushgan vaqtingda, hayotga optimistik nigoh bilan qara va qiyinchiliklarni qabul qilishni o'rgan.

@gayratbek_xoldarov

Ularni eshitmang

Yosh mutaxassissiz

Zamonaviy kasblar bo'yicha

O'zingiz xohlagan, yaxshi ko'rgan ishingiz bor

Ertalab turasiz, birorta kafega borasiz, chiroyli atmosferada MacBook'ingizni olib quloqchinni taqib ishingizga kirishasiz

Montaj, kontent, til o'rganish farqi yo'q

Muhimi, ishonavering, 50 yil oldin odamlar havas qilgan hayotda yashayapsiz

Erkinsiz

Instagram oxirgi paytlar juda ham shovqinli bo'lib qoldi

Hamma o'zinikini tiqishtirgisi, "hashamatli hayot"i bilan miyyangizni qotirmoqchi bo'ladi

Hozir sizni eng yaxshi davrlaringizdan biri

Zavqlaning

"Hashamatli hayot"ning emas, qiziqishlaringiz, rivojlanish ortidan boring

Buyam balki keladi, bir kun...

@gayratbek_xoldarov

Qarzdorlik, pul kamligi va ko'p pul topish haqida

Asosiy kanalimda ushbu muammolarni juda ham ko'p so'rashgan. Bunga biroz eslatma qilmoqchi bo'ldim.

Uyda yotib, qo'lida hech qanday hunari yo'q bo'la turib yana ko'p pul topish illuziyasi bilan yurganlar ko'p.

Ko'p pul topmoqchimisiz sohangizda zo'ri bo'ling.

• Ijtimoiy tarmoqlarga chiqing
• O'zingizni, ishingizni taniting

Bilimingizni oshiring. Mana Youtube siz uchun mutlaqo bepul platforma.

Bugungi kunda 1 mln topasizmi 10 mln topasizmi farqi yo'q, rizqingizdan oshiqchasini ololmaysiz.

Shu sababli Allohdan pul so'ramasdan, hozirgi topayotgan pulingizga baraka so'rab, tushkunlikka tushmay harakatda davom eting.

Bularning barchasi, barcha bilgan sodda haqiqatlar.

Siz buni qiyinlashtiryapsiz holos

@muvaffaqiyat_sirlari_tg

Bugun maktabni bitirgan va yoki yaqin yillarda bitiradigan uka-singillarim uchun yozmoqchiman.
(Post uzun bo'ladi)

Bu hech qanday motivatsiya yoki antimotivatsiya emas. Bu ichingdagi barcha seni qiynaydigan savollarga yechim bo'ladigan post bo'ladi in shaa Allah.

Hozir shunday paytdasan ichingda juda ham ko'p savollar. Kim bo'lsam ekan, qanday kasbni tanlay? O'qisammi yoki diplom kerak emasmi?

Pul topishim kerak. Ota-onamga, oilamga moddiy yordam berishim kerak. Chet elda o'qisammikin chunki ishlab pul topsa ham bo'larkan?

Hunaring bo'lsa ijtimoiy tarmoqlarga chiq. Daromading ko'payadi.

Kasb tanlasha qiynalayotgan bo'lsang 1 ta muhim jihatga e'tibor ber. Agar sen odamlar bilan aloqa qilishni xohlasang shunga doir kasblarni o'rganib chiq.

Agar komputerda o'tirib raqamlar bilan yolg'izlikda ishlay olsang IT va komputer bilan ishlaydigan kasblarni qidirib ko'r.

O'zi diplom kerakmi degan savolga javob, diplom emas o'sha universitetdagi 4 yil seni dunyoqarashingni o'zgartirgani kerak.

Universitet haqidagi ba'zi fikrlarni yoritib bermoqchiman. Ko'pchilik o'qitmaydi deb shikoyat qiladi. Umringni isrof qilasan deydi. Bular mutlaqo noto'g'ri.

Universitet ham maktabga o'xshaydi. Ba'zi o'qituvchilar juda ham zo'r o'tadi ba'zilarini darslari senga yoqmaydi.

Eng muhimi ushbu 4 yilda sen yana ko'p narsaga erishishing mumkin. Xohlasang qo'shimcha bilimlar ol. Qiz bola bo'lsang maktabni bitirishingga turmushga berib yuborishmaydi.

Chet elga ishlash va o'qishga kelsak, chetga borib ishlayotganlar qay darajada qiynalayotganini sen bilmaysan ham. Umuman Instagramdagi hayotga ishonma. Videolarda faqat hamma baxtli yurganini qo'yadi.

Hech kim oson ish topib oilasiga dollarlab pul jo'natayotgani yo'q. Barchasi qiyinchilik ko'radi.

Postni oxirigacha o'qidingmi yoki yo'q bilmayman. Agar o'qigan bo'lsang barchasini chuqur o'ylab ko'rish vaqti keldi.

Omad!

@gayratbek_xoldarov

Tayyor bo’ling

2017-yil.

Universitetda 2-kurs edim. Namoz sabab 2-yilga yotoqxona berishmadi — qadriyat uchun badal to’lashni o’rgandim.

Ijaraga oilali hovli topdim. Sharoiti juda og’ir, issiq suv muammo, 5 talaba bir kichik xonada, tagimiz zax, to’shakda yotardik — yashash uchun chidashni o’rgandim.

Stipendiyam 450 ming so’m. Uydagilar pul berisholmasdi. Ijara 200 ming, 3 mahal ovqatga kunlik 8 000 byudjetim bor edi — och qolmaslik uchun rejalashtirishni o’rgandim.

70-80% darslar bo’lmasdi yoki befoyda bo’lardi. Aksar kursdoshlarim gaplashib o’tirishar edi. Men esa qulog’imga narsa tiqib darslarda kitob o’qirdim — rivojlanish uchun chalg’imaslikni o’rgandim.

7 yil o’tdi. Yuqorida aytilgan va aytilmagan barcha qiyinchiliklar qolmadi, lekin olgan darslarimni hech biri yodimdan chiqmadi.

Tushundim. Haqiqiy ilm, tajribalar qattiq og’riqlardan, qiyin vaqtlarda olinar ekan, oson yoki to’kin hayotdan emas.

Rivojlanmoqchimisiz? Qiyin yo’llardan o’tasiz. Tayyor bo’ling.

Ukalaringizni rivojlantirmoqchimisiz? Qiyinroq yo’llardan yurgazing. Tayyor qiling.

©Abdulloh_shamsutdinov

@gayratbek_xoldarov

Unutilgan duolar

Kichkinaligimda namoz vaqtlari ko'rsatilib turiladigan soat bo'lardi. Orqasida islomiy savol-javoblari bilan.

O'qirdim. Yodlardim. Ammo tushunmasdim. Bular nima? Nega yodlashim kerak?

Ayniqsa Chahoriyorlar - Abu Bakr Siddiq, Hazrati Umar, Hazrati Usmon va Hazrati Ali. Bular kimlar?

Doim o'qiganimda shu savolni o'zimga berar edim. O'sha payt Allohdan so'raganman "Ey Alloh, menga bularni tanit. Ularni o'rganishimga yordam ber"...

Yillar o'tdi. Nimadir bo'ldi, tarix faniga qiziqib qoldim. O'rganyapman...7-sinf O'zbekiston tarixi Abu Bakr Siddiq, Umar, Usmon va Ali. Xalifalik davri...

U paytlar, qilgan duolarimni va bularni o'rganishni istaganimni ham eslay olmasdim

Bugun tushunib yetdim. Hech bir narsa o'z o'zidan bo'lmaydi.

Bugungi kundagi yutuqlaringiz, qachonlardir qilgan ishlaringiz samarasi.

Qachonlardir samimiylik va to'la ishonch bilan qilingan duolar samarasi

@gayratbek_xoldarov

Tugaydi

Bir joyda qotib qolding.
Rivojlanolmayapsan.

Hamma bir nimalar bilan band, sen esa o'sha o'sha.

Hamma qayerlardadir baxtli. Sen esa yolg'iz.

Yordam so'ramoqchi bo'lasan - nima yordam kerakligini tushunmaysan.

Kasal ham emassan - sog' ham.

Vaziyatni o'zgartirmoqchi bo'lasan - qo'lingdan kelmaydi.

Qiynalyapsan.

Senda ham shundaymi?

Siqilma, bu holatdan barcha o'tadi. Ishlaring o'xshamasligi bu - sinov!

Oz qoldi. Tugaydi...

Biroz dam ol. Iymoningni yangila. Sayrga chiq. Asosiysi noshukur va noumid bo'lma.

@gayratbek_xoldarov