Farg‘ona tumanida firibgarlik jinoyatlari oldini olishga qaratilgan seminar o‘tkazildi

Farg‘ona tumanida axborot texnologiyalari yordamida sodir etiladigan firibgarlik jinoyatlarini oldini olish maqsadida “Firibgarlik va axborot texnologiyalari sohasidagi jinoyatlarning oldini olish, jamiyatda huquqiy madaniyatni yuksaltirish” mavzusida seminar tashkil etildi.

Seminarda tuman Ichki ishlar bo‘limi boshlig‘i Jahongir Xasanov, tuman Adliya bo‘limi boshlig‘i Sarvarbek Maxkamov, mahalla yettiligi a’zolari, ko‘chaboshilar va mahalla faollari ishtirok etdilar. Tadbir davomida firibgarlik jinoyatlarining zamonaviy usullari, ularning oqibatlari va oldini olishning samarali usullari haqida batafsil ma’lumot berildi.

Tadbirda ishtirokchilarga axborot texnologiyalari sohasidagi xavfsizlikni ta’minlash bo‘yicha amaliy tavsiyalar berildi. Xususan, fuqarolarni o‘z shaxsiy ma’lumotlari va moliyaviy resurslarini himoya qilish, internetdagi firibgarlik sxemalarini tanib olish va ulardan saqlanish usullari bo‘yicha tushuntirishlar o‘tkazildi.

Ma’lumot uchun: Huquqbuzarliklar profilaktikasi to‘g‘risidagi qonunga muvofiq, adliya organlari manfaatdor tashkilotlar bilan hamkorlikda jamiyatda huquqiy ong va madaniyatni yuksaltirish, qonuniylikni mustahkamlash hamda aholi o‘rtasida huquqiy targ‘ibot faoliyatini muvofiqlashtirish vazifasini bajaradi.

Seminar ishtirokchilari mazkur mavzuni o‘z hududlarida keng targ‘ib qilish va aholiga firibgarlikdan himoyalanish yo‘llarini tushuntirishda faol ishtirok etishga tayyor ekanliklarini bildirdilar. Ushbu tadbir tuman aholisining huquqiy ongini oshirish va xavfsizligini ta’minlashga qaratilgan muhim tashabbus sifatida baholandi.


Sayt | Telegram | Facebook | Instagram | YouTube | X | Threads | WhatsApp