O‘zbekiston Yozuvchilar uyushmasi Farg‘ona viloyati bo‘limi (rasmiy)

#Zahiriddin_Muhammad_Bobur tavalludining_542_yilligiga

BOBUR GʻAZALIGA TAXMIS

Bu fano g‘avg‘osidin ko‘ngil safosi qoldimu?
Ichmagan g‘urbat mayin kun ibtidosi qoldimu?
Jon kechibmen toki ul ishqin adosi qoldimu?
Charxning men ko‘rmagan jabru jafosi qoldimu?
Xasta ko‘nglim chekmagan dardu balosi qoldimu?

Bu jahon ko‘zgusida derlar ayonmish har yurush,
To qiyomatga qadar aylarmish ul shundoq yumush,
Ne ajab, nomim bukun olam arodir hindikush,
Meni xor ettiyu qildi muddaiyg‘a parvarish,
Daxri dunparvarning o‘zga muddaosi qoldimu?

Ko‘zlarimdin oqdi tinmay qancha-qancha qonli yosh,
Bilsangiz, endi dilim bo‘ldi misoli tiyra tosh,
Qo‘rqaman bir kun bu tosh gar sachrasa qolgaymu losh,
Meni o‘lturdi jafou javr birla ul quyosh,
Emdi turguzmak uchun mehru vafosi qoldimu?

Ne qilay, dil ko‘nmagay hech bir so‘zimga, ey rafiq,
Tunlari xob kelmagay, naylay, ko‘zimga, ey rafiq,
Qil shifo somon sifat so‘lg‘on yuzimga ey rafiq,
Oshiq o‘lg‘och ko‘rdim o‘lumni o‘zumga, ey rafiq,
O‘zga ko‘nglimning bu olamda harosi qoldimu?

To abad jonim fido erdi, Karima, qilma ayb,
Qilmangiz buncha malomat, o‘ylamangiz bo‘ldi sayd,
Chin vatandin tushdim ayro, bo‘ldi bu ish kori g‘ayb,
Ey ko‘ngul, gar Bobur ul olamni istar qilma ayb,
Tengri uchun de, bu olamning safosi qoldimu?

✍️ KARIMABEGIM

🏛Oʻzbekiston Yozuvchilar uyushmasi Fargʻona viloyati boʻlimi
Telegram | Facebook | Instagram‌‌

#Zahiriddin_Muhammad_Bobur tavalludining_542_yilligiga

SHOH BOBUR

Buncha uzun oh tortdingiz, oh Bobur,
Muttahamlar dunyosida shoh Bobur.

Andijonu Hindu — yetti iqlimda
Topilmadi Sizga bir dodxoh, Bobur.

Ollohimning dargohlari keng, lekin
Sig‘dirmadi Sizni bu dargoh, Bobur.

Kecha uzun, manzil olis, yo‘l uzoq,
Sizga faqat yolg‘iz oy hamroh, Bobur.

Nonko‘r beklar, beoqibat mirzolar,
Kimlar Sizga qazmadilar choh, Bobur.

Gʻurbat bo‘ldi oxir toju taxtingiz,
Podshohlar ham yig‘larkan-da, voh Bobur!

Qismat qattiq, alam bisyor, el g‘ofil,
Bu dunyoda bormi bir dilxoh, Bobur?

Umri otda o‘tgan buyuk musofir,
Davlat nadir asli, nadir joh, Bobur?

Shoirligi shohligidan ulug‘roq,
Shohligi ham she’riday ogoh, Bobur.

Alisherbek deysiz, nazm sultoni,
Siz ham shunda topdingiz panoh, Bobur.

Shamshiringiz yanglig‘ Jayhun yarqirar,
Ko‘kda moh ham Sizning mangu oh, Bobur.

✍️ Sirojiddin Sayyid

🏛Oʻzbekiston Yozuvchilar uyushmasi Fargʻona viloyati boʻlimi
Telegram | Facebook | Instagram‌‌

#Zahiriddin_Muhammad_Bobur tavalludining_542_yilligiga

BOBUR GʻAZALIGA TAXMIS

Men nechuk uzgum umid fazli kiroming borida,
Ne qilay dunyonikim, maqsudi koming borida,
Dil qushi parvoz etarmu zulf – doming borida?
Ne ko‘ray to‘boni qaddi xushxiroming borida?!
Ne qilay sunbulni xatti mushkfoming borida?!

Kim quyosh nurin tilar ul gul yuzing nurfoshida?
Kim jamoling jilvasini istamas ko‘z yoshida?
Kim jununi ishqing ichra yormagay bosh toshida?
Kim Xizr suyin og‘izlag‘ay labingning qoshida?
Kim Masih alfozidin degay kaloming borida?!

Ishq eli anglar – sening zikring bila til muhtaram,
Gʻayr naqshidin o‘zin saqlash bila dil muhtaram,
Ahli dil hajringda chekkan dardini bil muhtaram,
Oshiqingni davlati vasling bila qil muhtaram,
Husn ahli ichra muncha ehtiroming borida.

Topgusi boqiy saodat ulki, etding yod ani,
Ishq aro afsona chun Majnun ila Farhod ani,
Dardi ishqin afzun aylab, chektirib faryod ani,
Bizdin ayru doim el birla icharsen bodani,
Bizni ham gohi sog‘in shurbi mudoming borida.

Gar tilarsen, vaslini sen urmagil behuda dam,
O‘tgan umring lahzasidin qolmasin aslo nadam,
Mosivalloh zanglarin gar yuvsa dildan ko‘zda nam,
Ey ko‘ngul, gar g‘ayr so‘zi zahri qotildur, ne g‘am,
Lablaridin sharbati yuhyil-izoming borida.

Ishq eli ayro hushidin, zohido, etma izo,
Man etib mayxonadin sen chekmagil tiyg‘i jafo,
Istasang may lazzatin gar, ishq aro bo‘lgil gado,
Tarki nomus aylabon badnom bo‘lg‘il ishq aro,
Kim seni oshiq degay nomusu noming borida?!

Tolib o‘ldim, bir dili vayronadurman subhu shom,
Soqiyo, sungil qadah o‘zni yo‘qotmoq menga kom,
Dashti bexudliq aro men mast o‘lib aylay xirom,
Bobur, ul gul ko‘yida bulbul kibi topting maqom,
Bir navoye rost qil mundoq maqoming borida.

✍️ Tolibjon Ro‘ziboyev