Денов тумани ҳокимлиги Ахборот хизмати

Китоб, газета ва журналлар қандай тайёрланади? Нашриёт ва босмахонага пресс-тур

Сурхондарё вилояти Ахборот ва оммавий коммуникациялар бошқармаси томонидан журналист ва блогерлар учун Термиз шаҳридаги “Surxon-nashr” нашриёти ҳамда “Сурхон тонги” ва “Заря Сурхана” газеталари бирлашган таҳририяти босмахонасига пресс-тур ташкил этилди.

Тадбир давомида иштирокчилар дастлаб нашриётда китобни чоп этиш жараёни, хусусан, муҳаррирларнинг қўлёзмани таҳрирлаш, дизайнернинг муқова ва суратларни ишлаш, монтаж жараёнида электрон файл кўринишидаги қўлёзма бетларини тўғри жойлаштириш, хомаки нусхани махсус текис металл (тунука)га тушириб, босма қолиплар тайёрлаш, китобни босиш, буклаш, тикиш, муқовалаш, кесиш ва қадоқлаш ишлари, шунингдек, буюртмалар асосида бажарилаётган полиграфия хизматлари билан яқиндан танишдилар.

“2005 йилдан буён ноширлик ва полиграфия фаолияти билан шуғулланиб келаман. Украина полиграфия институтини тамомлаганман. Фаолиятимизни дастлаб 1 дона компьютер жамланмаси ва чоп этувчи кичик дастгоҳ билан бошлаган бўлсак, ҳозирда 20 нафар ишчи-ходим Япония, Германия ва Хитойда ишлаб чиқарилган энг сўнгги турдаги 30 га яқин ускуналарда ишлашмоқда. Хитой, Ҳиндистон, Эрон ва россиялик соҳа мутахассислари билан ўзаро тажриба алмашиб, фаолиятимизни йилдан-йилга кенгайтириб бораяпмиз” – дейди “Surxon-nashr” нашриёти раҳбари Жума Шайматов.

Иштирокчилар “Сурхон тонги” ва “Заря Сурхана” газеталари бирлашган таҳририяти босмахонасида ҳам қизғин иш жараёни билан яқиндан танишиш имкониятига эга бўлишди. Ҳиндистон ва Хитойдан келтирилган энг сўнгги технологияларнинг чоп этиш қуввати, вилоятдаги газеталарнинг яратилиши ва бунда нималарга аҳамият қаратилиши уларнинг диққатида бўлди. Мутахассислардан газеталарнинг чоп этилишига оид турли саволларга жавоблар олишди.

🌐 https://t.me/AOKA_Surxondaryo