BOTINKA HAQIDA ERTAK

Tushib borar zinadan shaxdam
davlatiga o‘rangan bilqis...
qor yog‘adi, deydi radiodan
yangiliklar o‘qigan bir qiz.

Planshetni olib shu asno,
internetga bosaman “inter”,
kiyinaman o‘ranib, go‘yo
adashmaydi “gidrometsentr”.

Bekat bilan ikkimiz birga
kech kuzakda kutamiz ulov.
Termilgancha sizning qasrga,
o‘tib borar yo‘lakdan birov.

Ozg‘in, uzun, yupun va rangpar,
izg‘irinda quritgan tinka,
qo‘lida charm muqova daftar,
oyog‘ida yirtiq botinka...

Avtobus ham kelar haytovur,
xizmatini keltirar bajo
va to‘qqizdan oltiga dovur
meni ming bor o‘ldirar dunyo.

Ammo bugun yog‘maydi yana
siz intizor kutayotgan qor –
mo‘ynalarga o‘rab mastona,
sayrlarga olib chiqmas yor.

Bulutlar qor sepmayin atay,
jig‘ingizga o‘ynab qo‘yar sal...
Qor yog‘maydi
ozg‘in bolakay
olmaguncha yangi poyabzal.

Mansur Jumayev

@dengizgaketamiz