Kanada orzusi

Эронликларнинг бир-бири билан хайрлашаётганда ишлатадиган ибораси ёқди — “Худо ҳафез”

@chnizomiddinova

#maktab_formasi

Баъзан йўқ жойдан “мактаб формаси”, вазирлик стандарти, “долзарб форма ойлиги” деган гаплар чиқиб қолади. Ҳамма бир хил кийиниши керак, палон пулга мактаб тасдиқлаб берганини олсин, ҳаммаси мажбурий деган “қатъий талаблар”дан, рости, энсам қотади.

Бундай қоидаларни мактабига хоҳлаганини кийиб, вақти келса, пижамаси, уй шиппаги, севимли ўйинчоғи билан дарсда ўтирадиган эдмонтонлик ўқувчи эшитиб, миясига сиғдиролмаса керак. Бола ўзига қулайини кийиб келади.

Тўғри, ҳар нарсада меъёр, муайян чеклов бор – бу ердагилар ҳам шунга риоя этади, жуда бачканалашмайди. Аммо жонажонда формадан-да муҳим ишлар тиқилиб ётганда яна форма дейилса, ёмғир ёғиб, лой-балчиққа айланган йўлдан мактабига қатнаётган болалар расми кўз олдимга келади.

Мактаблари таъмирталаб, канализация етиб бормаган ёки ичимлик сувда муаммоси талай, дарсликлари баҳсталаб, танқидлар ичида қолган, ўқитувчилари маоши паст бўлган бир пайтда формага ёпишиш – пойдевори қулай деяётган уйни косметик таъмирлашга ўхшайди мен учун. Ялтираб турса бўлди-да.

Қизим 1-синфга Эдмонтонда чиқди (бундан, рости, хурсандман. Чунки икки давлат таълим тизимини таққослайвермайди). Ҳеч қандай форма, алоҳида кийим олиб бермадик. Бисотида борини, ҳали кичраймаган бўлса, ювиб, дазмоллаб кийиб чиқаверди. Август охирида мактаб бозорига югур, янги носки, сочига тасма, кофта-юбка, дафтар-ручка ол қилмадик.

Ўқув қуроллари мактаб маъмурияти имейлга юборган ҳавола орқали буюртма берилади – онлайн дўконнинг ўзи мактабга етказади. Бир йилда бир марта. Фонд пули, ремонт пули, дарслик ижараси, ўқитувчилар байрамига йиғ, 8-мартга совға ол, битирув кечасига кўйлак тиктир деган гаплар умуман йўқ.

Боланинг бор эътибори ўқиш, саводини яхшилаш, танқидий/ижодий фикрлашни ўстириш, жисмоний машғулотлар ва ижтимоий фаолликда бўлади.

Биз ота-оналар олдига мактаб маъмурияти қатъий талаб ёки шартлар қўймади бирор масалада. Аксинча, қандайдир тадбир, лойиҳа бўлса, узрхоҳлик билан имейл ёзилади ва вақт-шароитга қаралади. Боланинг ўқишдаги камчилиги, сустлиги ё муаммоси бўлса, синф раҳбари индивидуал гаплашиб, бирга ечим қидиради.

Афсуски, оҳори тўкилмаган форма жорий қилган билан таълим ривожланиб, болалар ақлли, илмда пешқадам бўлиб кетмайди-да.

@chnizomiddinova

Кеча кичкинамни боғчадан олгани вақтлироқ бордим. Кийинтириб, кетишга тайёрлагунимча бир непаллик аёл билан суҳбатлашиб қолдим.

Непал ҳақида ҳужжатли фильм кўрганман, дегандим, гап-гапга уланиб кетди. Одатда “Қачондан бери Канададасиз?”, “Эдмонтон ёқдими?”, “Бошқа провинцияларда ҳам яшаб кўрганмизсиз?”га ўхшаш саволлардан бошланади гап. Суҳбатни шулар қиздиради-да.

Непаллик опанинг айтишича, Канадада яшаш у ва оиласи учун энг тўғри танлов бўлган экан. Саккиз йил олдин иккита сумкам, икки болам ва эрим билан келганмиз. Қўлимизда арзимаган чой чақа, оёғимда резина шиппак бор эди дейди. Ҳозир ўйлаганларимга озми-кўпми етдим. Астойдил ишласанг, бу ерда орзуларинг тезроқ ушалади – умринг қашшоқликда ўтиб кетмайди. Ҳарҳолда, оч қолмайсан, пулинг бўлади, дейди.

Непалда-чи, десам, устимдан куляпсанми, ўзимни юртимда шундай яшасам, совуқдан совуқ Канадага келармидим дегандек қаради.

Қандай тилда гаплашасизлар, деб сўрасам, расмий тил непали экан. Лекин юздан ортиқ қабила, каста тиллари бўлганига биримиз иккинчи кастани тушунишимиз қийин дейди. Унда умуммулоқот қандай бўлади, десам, инглиз тили бор-ку дейди. Унга кўра непалликларни инглиз тили бирлаштираркан. Бошқа каста тилини ўргангунча, сочим оқариб, умрим ўтади, инглиз тили энг осон, қулай тил дейди. Инглиз тилимиз бўлгани учун ҳам шундай давлатларга иккиланмай йўлга чиқаверамиз деб қўйди.

Яна бошқа гаплар ҳам бўлдию, уларни ёзмаганим яхши. Ўзим билганим етар😅

Ҳаёт қизиқ: бири ўзбекистонлик, бошқаси непаллик бўлан икки иммигрантнинг боғчада бир-бировига ҳасрат қопини очиб ўтиришини ким ўйлабди...

@chnizomiddinova

#maktab_xabarlari

Директоримиз мактаб янгиликларидан доимий бохабар қилади. Қандай янгилик, тадбир ё ҳаракат бўлиши ҳақида имейл ёзади.

Таълим ҳаёт-мамот масаласи бўлгани учун ўша хабарлардан бир чимдимдан ёзиб турмоқчиман.

Хуллас:

– Душанба куни Эдмонтон мактабларида CUPE Local 3550 вакиллари, яъни маъмурий бошқарув ходимлари, кутубхоначилар, мактаб ҳамширалари, таржимонлари, техник ходимлари, дефектологлари, ассистентлари, ошпазлари, умуман, таълим ишларига орқа планда туриб ёрдам берувчи ходимлар маош масаласида норозилик намойиши бошларкан.

Шаҳар мактаблари бўйича суперинтендант шу ҳақида хат ёзиб, “ота-оналар, мактаб олди бу пайт оломонга тўла бўлиши мумкин, олдиндан режангизни қилинг” дебди. Намойишчилар билан тезда муроса столига ўтиришни ҳам истисно қилмабди.

Лекин бу билан дарслар, мактаб иши тўхтамайди. Ҳаммаси ўз ўрнида кетаверади доимгидек. Фақат намойишчилар кўчаларда плакат, қоғоз кўтариб, норозилигини билдираверади. 72 соатга чўзилиши мумкин экан.

Ўтган йил охири Канада почтаси ходимлари ҳам 30 кундан ортиқ намойиш ўтказганди. Почта бўлимлари шифтигача жўнатма, хатларга тўлиб кетгани, одамлар Крисмас совғасини вақтида ололмаслигини сезиб, ҳукумат ён берганди. Почтачилар бўш келмай, қанча бўлса, шунча кутганди. Кўрамиз, буниси қандай бўларкин...

– Яна бир энг муҳим ва қўрқинчли хабар – мактабда бит чиқибди😱
Қизимга айтсам, тушунмади. Нима у, деди. Гугллаб, фотосини кўрсатдим ва қандай паразитлигини тушунтирдим. Қўрқиб кетди, ёйган сочини тезда йиғди ва ҳалигача қайта-қайта сўраяпти: нима қилсам, битламайман деб. Уни кўриб, раҳмим келяпти. Бит нималигини билмаган одамга яхшигина зарба бўлди. Сочи узун, жони ширин, “Бит қонимни сўриб, ўлдириб қўйса-чи?” дейди.

Мактаб ҳам қараб турмайди. Битлаган боланинг ота-онасига бу билан қандай курашиш бўйича Алберта ССВ чиқарган йўриқномани беришибди. Агар бизам ташвишланиб қолсак, клиникага боришимиз мумкинлиги ёки қисқа ёрдам рақамига боғланиш айтилибди. Хуллас, бит дегани совуқми-иссиқми танламаскан. Бош бўлса, бўлди экан.

Ҳозирча шу икки хабар етса керак. Қолганларини кейин яна ёзаман.

@chnizomiddinova