Halol luqmaHar qanday musulmon kasbining fiqhini (qonun-qoidalarini) bilishi farzi ayn, ya’ni shartdir. Shulardan biri halol yoʻl bilan pul ishlab topishdir.
***
Alloh taolo Oʻz Kitobida marhamat qiladi:
«Ey iymon keltirganlar: Sizlarga rizq qilib berganimiz pok narsalardan yenglar» (Baqara surasi, 172-oyat).
Xoʻsh, harom narsalar yemayotgan boʻlsak, buning bizga nima aloqasi bor? — degan savol paydo boʻlar ehtimol.
Aynan harom narsalardan iste’mol qilmasangiz-da, ularni kasb qilishda halolni haromga aylantirib qoʻyadigan bir amal qilsangiz ham luqmangiz botil boʻladi.
***
Kuzatuvlarim va tajribamdan kelib chiqib ayta olamanki, oʻzbek grafik dizaynchilarida koʻp uchratganim narsa bu — Adobe’ dasturlarining buzilgan shaklidan (cracked version) foydalanishlaridir. Vaholanki, ushbu tashkilot oʻz dasturlarini bu shaklda ishlatishni man qilgan.
Demakki, buzilgan fotoshop va hkz. adob dasturlaridan istifoda etgan holda pul topishlari nojoiz, harom. Adob dasturlarini oʻzlari belgilab bergan tariflardan biriga toʻlov qilib, ishlatish kerak boʻladi.
Yana bir toʻqnashganim holat shuki, toʻlovni arzonroq qilaman deb ba’zilar yashab turgan davlatini Oʻzbekistonni belgilamay boshqa davlat nomidan roʻyxatdan oʻtishar ekan(davlatga qarab toʻlovlar farq qiladi).
Ishingizni yolgʻon ustiga qursangiz, unda toʻlov qilishdan nima ma’no qoladi? Shunday qilib topadigan pulingiz tatiydimi?
***
Toʻlov qilishga imkon yoʻq boʻlsa, nima qilamiz? Alloh taolo taqvo qilgan bandasiga oʻzi kutmagan joydan yoʻl ochib qoʻyadi. Siz rizqim halol boʻlsin deb harakat qilar ekansiz, Razzoq boʻlgan Zot, albatta, ishingizni yengil qilib qoʻyadi.
Toʻlov qilishda qiynalayotganlarga quyidagilarni tavsiya qilishim mumkin:
1) Ish joyingizdagi boshliqlarga vaziyatingizni tushuntiring, ularga ishlab berish evaziga siz ulardan dasturlarga toʻlov qilib berishlarini soʻrang.
2) Adob dasturlariga muqobil boʻlgan tekin dasturlardan foydalaning. (Buni SI dan qidirib topa olasiz)
***
Nima boʻlishidan qat’i nazar, kichik xarajatdan qochib,
oʻzingizga harom narsani ravo koʻrmang. Undan nafratlaning, hazar qiling!Haromdan topib yeyishni boshlasangiz, asta-asta singib, gunohlarga mayl ortadi, oxir-oqibat sizni xarob qiladi.
Ushbu gaplar nafaqat grafik dizaynchilar, balki hammaga tegishli. Kasbingizning qonun-qoidalari bilan yaxshilab tanishib chiqing, faqatgina halol yoʻl bilan kasb qilishga intiling!
Ushbu postni tanishlaringizga ulashing, ularni ham ogoh eting.
@uu_dizayn
