Bintu Sodiq

Илм олиш ҳар бир инсон учун муҳим, айниқса, қизлар учун катта аҳамиятга эга. Боиси, улар келажак авлодни тарбиялашдек муҳим вазифани бажарадилар. Шу сабабдан ҳам бунга давлат миқёсида катта эътибор қаратилади.

17 январь куни Salam school халқаро мактабида устоз Одинахон Муҳаммад Содиқ иштирокида давра суҳбати ташкил этилди. Унда айнан қизларнинг илм олиши ҳақида сўз борди. Суҳбат аввалида илм даргоҳининг кичик синф ўқувчилари ўз мактаблари ҳақида шеър айтдилар.

Сўнгра суҳбат савол-жавоб кўринишида давом эттирилди ҳамда мактабнинг юқори синф ўқувчи қизлари устозага ўз саволларини беришди. Ўз навбатида, устозамиз уларга ўзларининг керакли тавсия ва маслаҳатларини бериб ўтдилар.

@BintuSodiq

Илм - инсонни жаҳолатдан ёруғликка олиб чиқувчи, ҳаёт йўлини равшан қилувчи ва ҳар қандай қийинчиликни енгишга кўмаклашувчи неъмат. Илм йўлини тутган инсонлар жамиятнинг ахлоқий ва маънавий даражасини юксалтиради. Сўнгра бошқа одамларга ҳам тўғри йўлни кўрсатишга ёрдам беради. Аждодларимиз буюк сиймолар, беназир олимлар бўлган юртимизда илмнинг аҳамиятини теран англаган холда бугунги кунда ҳам ёш авлоднинг илм олишига алоҳида эътибор қаратилмоқда. Юртбошимиз ташаббуси сабаб кўплаб олий таълим муассасалари очилиб, фаолият юритяпти.

Шундай илм даргоҳларидан бири бўлмиш Ўзбекистон касаба уюшмалари Федерацияси Меҳнат ва ижтимоий муносабатлар Академиясида устоза Одинахон Муҳаммад Содиқ билан суҳбат ўтказилди. Суҳбат айнан “Илм олиш манфаатлари ҳамда унинг йигит-қизлар тарбиясида тутган ўрни” мавзусида ташкил этилди. Тадбирда устоза илм олиш, илмли инсонларнинг мартабаси жамиятда улуғ бўлиши ҳақида ўз фикр-мулоҳазаларрини билдириб ўтдилар. Суҳбат давомида ўқув даргоҳининг ўқитувчи ва талабалари у кишидан ўзларини қизиқтирган саволларга жавоб олдилар.

@BintuSodiq

2025 йил – "ИНТЕРНЕТПАРҲЕЗ ЙИЛИ"

Муҳтарама опа-сингилларимиз!

Ҳар бир замоннинг ўз муаммолари бўлар экан. Ахборот асрининг офати – ижтимоий "қармоқ"лар бўлди. Ҳа, биз атайлаб "қармоқ" деб ёздик, чунки бу офатнинг қармоғига илинганлар ундан қутулиб кета олмай қоляпти.
Устозларимиз айтганидек, бугун барчамизнинг бошимиз эгик... Чунки ҳаммамиз мук тушиб, телефон титкилаш дардига мубтало бўлганмиз.
Дардимиз сурункали касалга айлангач, энди унинг давосини топа олмай ҳасратдамиз. Аммо Аллоҳ таоло нимаики дард берган бўлса, унинг давосини ҳам бериб қўйган, жумладан, ижтимоий тармоққа қарамликнинг давоси ҳам бор. Ҳар қандай дарднинг асосий муолажаси парҳез бўлганидек, интернетқарамлик дардининг муолажаси ҳам парҳездир. Шунинг учун бу йилни "ИНТЕРНЕТПАРҲЕЗ ЙИЛИ" деб эълон қиламиз.
Келинг, азиза опа-сингиллар, бу оғир дардга қарши биргалашиб курашайлик. Иймонимизни, ихлосимизни ўртага қўйиб, интернетдан парҳез қилайлик. Телефонга, компьютерга, интернетга фақат динимиз, дунё ва охиратимиз учун хайрли бўлган, зарурат бўлган ишлар учунгина кирайлик. Бошқа пайт эса жамиятдаги ҳақиқий ўрнимизни билайлик, оиламиз, турмуш ўртоғимиз, фарзандларимиз, яқинларимиз билан жонли мулоқот қилайлик, яхшилик улашайлик, ёмонликдан қайтарайлик. Токи фарзандларимиз бизнинг телефонга муте бўлиб ўтирганимизни эмас, оиланинг солиҳа бекаси мақомида турганимизни кўриб улғайсин. Токи интернетпарҳез йили барча зарарли иллатлардан халос бўлиш йили бўлиб номаи аъмолимизга ёзилсин.

Хабарингиз бор, сал олдин бу йилни устозимиз шайх Муҳаммад Содиқ Муҳаммад Юсуф роҳимаҳуллоҳнинг хотираларига «Буюк хотира йили» деб номлаганимизни эълон қилган эдик.
Демак, 2025 йилда икки ном остида фаолият юритамиз. Мазкур мавзулар доирасида лойиҳалар ишлаб чиқамиз, иккала мавзу орасини жамлаб, материаллар тайёрлаймиз, интернетдан пархез қилган вақтимизни кўпроқ Ҳазратни хотирлашга, у кишининг илмий меросларини ўрганишга сарфлаймиз!

Биз билан бирга бўлинг, биз бундан мамнунмиз!

@BintuSodiq