Stat.uz I About Uzbekistan

Ўзбекча таниш-билиш

Бир сўм минг сўм бўлади,
Ишинг осон бўлади,
Ҳатто душман кўнади,
Ўзбекча таниш-билиш!

Келин ҳам топилади,
Мошин ҳам олинади,
Муаммо ёпилади,
Ўзбекча таниш-билиш!

Бу йўллар очиқ-сочиқ,
Ҳеч ким қилолмас "қичиқ",
Эгилар катта-кичик,
Ўзбекча таниш-билиш!

Ер сероб гектар-гектар,
Боғ сероб нектар-нектар,
Таниши йўқ, бўл баттар!
Ўзбекча таниш-билиш!

Битта душман топилмас,
Ғам-ғуссага пайт қолмас,
Пул тиққани жой қолмас,
Ўзбекча таниш-билиш!

Ишинг аниқ тўрида,
Машинанг ҳам зўридан,
Кучлироқсан бўридан,
Ўзбекча таниш-билиш!

Хоҳласанг уй қурасан,
Хоҳласанг уй бузасан,
Зўр планлар тузасан,
Ўзбекча таниш-билиш!

Докторлар хизматингда,
Ошпазлар хизматингда,
Артистлар хизматингда,
Ўзбекча таниш-билиш!

Ҳокимга ўшқирасан,
Қудасини танийсан,
Чойхонада ош ейсан,
Ўзбекча таниш-билиш!

Ишларинг секундда ҳал,
Ўтириб топарсан "кал",
Ҳаётинг ўтар асал,
Ўзбекча таниш-билиш!

Не билишинг қизиқмас,
Кимни танишинг қизиқ,
Танишсиз ишинг унмас
Ўзбекча таниш-билиш!

Зиё Зуҳал шеър ёзди,
Яқин танишлар учун,
Ишлари битиб қолди
Ўзбекча таниш-билиш!

©️ Зиё Зуҳал

@ziyo_zuhal

МЕНДАН ФАҚАТ ДАРС СЎРАНГ!

Ўттиз йил мен пахта тердим,
Кўк далага меҳр бердим,
Яна қанча "калтак" едим -
Мендан фақат дарс сўранг!

Оқлашни зўр ўргатдингиз,
Ҳашарни зўр ўргатдингиз,
Қурувчига ўхшатдингиз -
Мендан фақат дарс сўранг!

Барча жойни тозаладим,
Ўтин-ахлат тиззаладим,
Обрўсиздек иззаландим -
Мендан фақат дарс сўранг!

Пул йиғишга ўргатдингиз,
Безбетликка ўргатдингиз,
Билмам нима кўрсатдингиз?!
Мендан фақат дарс сўранг!

Келиб конспект сўрайсиз,
Режа-жадвал сўрайсиз,
Бир балолар сўрайсиз -
Мендан фақат дарс сўранг!

Бир сўм учун ухламасдан,
Дарсу-ҳашар юраман,
Пора бер деб тиламасдан -
Мендан фақат дарс сўранг!

Тўгараги ўлиб кетсин,
Юкламаси ўлиб кетсин,
Тадбирлари ўлиб кетсин -
Мендан фақат дарс сўранг!

Мен устозман касбим ахир
Илм бериш, зиё бериш
Формасию давомати -
Мендан фақат дарс сўранг!

Рўмолини мен ечайми?
Соч-соқолин мен бичайми?
"Жума"сидан кечтирайми?
Мендан фақат дарс сўранг!

Мен милиция, маҳаллаком
Мен агентлик, мен профком,
Мен тадбирбоз, мен родком
Мендан фақат дарс сўранг!

Ўттиз йилда кўмиб бўлдиз,
Таълимни сўйиб бўлдиз,
Қоғозга тиқиб бўлдиз
Мендан фақат дарс сўранг!

Ҳар куни йиғим-сиғим,
Ойликни ушлайди ким?
Мен устозми ёки ким?
Мендан фақат дарс сўранг!

Қизил, сариқ ва яшил,
Ранг-барангмиз биз аҳил,
Ҳар кун топшириқ ҳар хил
Мендан фақат дарс сўранг!

Ойлигимни михлаб қўйинг,
Минг долларлаб тахлаб қўйинг,
Коррупцияни яхлаб қўйинг -
Кейин мендан дарс сўранг!

Охирида битта гап,
Галстукни ечиб қўйинг,
Баҳо беришдан аввал
Шароит бериб қўйинг!

Битта боксёр битта жанг
Битта уйли бўлармиш!
Бир устозу минг шогирд -
Бўёққа пул йиғармиш...

P.S. Касбига садоқат билан ишлаб юрган ўқитувчи-мураббийларга бағишланади!

©️ Зиё Зуҳал

@ziyo_zuhal

МЕН МАЖЛИСНИ СЕВАМАН!

Мен мажлисни севаман,
Менга мажлис ёқади
Гар мажлис ўтказмасам
Ичим ёниб кетади!

Мажлиснинг ҳар номи бор,
Селекторли жойи бор,
Аппаратний, планёрка
ВКСдек йўли бор!

Мажлис борки юрар иш,
Мажлиссиз бўлмайди иш,
Мажлис ўтказай кўпроқ -
Тиним билмай ёзу қиш!

Мен мажлис ўтказмасам,
Ҳодимлар ишламайди,
"Даже" оддий нарсага -
Калта ақли етмайди!

Шанба-бозор фарқи йўқ!
Эртами кеч фарқи йўқ!
Менга қолса ярим тун -
Ўтказаман фарқи йўқ!

Мажлиссиз бошланган иш,
Бошга келтирар ташвиш!
"Чора-тадбир" туздириб -
Бошлаш керак ахир иш!

Протоколга кўмаман,
Топшириққа кўмаман,
Кабинетга кирволиб -
Ижросини сўрайман!

Мана сиз ҳам кўрасиз,
Ҳали яхши бўлади
Ҳар кун мажлис ўтказсам -
Тараққиёт келади!

Кейин раҳмат айтасиз,
Ҳар бир мажлисларимга
Офарин шу вазирга -
Етсин ниятларига!

Борай мен, соат бешда,
Яна бир мажлисим бор
Мажлис қилмасам агар
Ишимда ташвишим бор!

Мен мажлисни севаман,
Мажлис менга ёқади!
Ҳар кун мажлис ўтказсам -
Қуёш кулиб боқади!

Мажлис борки, бор прогресс!
Мажлис йўқ, демак регресс!
Ўзбекистон гуллайди -
Мажлис борки, қилма стресс!

©️ Зиё Зуҳал

@ziyo_zuhal

ПРЕЗИДЕНТ КЕЛАР ЭМИШ...

Ташқари ғала-ғовур,
Одамлар бидир-бидир,
Кўчалар супур-сидир,
Президент келар эмиш...

Тугамайди иш вақти,
Селектор тўлиб кетди,
Ҳаммаёқ "гуллаб" кетди
Президент келар эмиш...

Майса кўкка бўялди,
Арча кўкка бўялди,
Деворлар ҳам бўялди,
Президент келар эмиш...

Асфальт босилди йўллар,
Гулга кўмилди чўллар,
Ҳар ким мансабин ўйлар,
Президент келар эмиш...

Костюм-шимли қоринлар,
Етиб келди "барин"лар,
Бир-бирига кариллар,
Президент келар эмиш...

"Зулфиялар" терилди,
Спортчилар йиғилди,
"Установка" берилди,
Президент келар эмиш...

Миллионлик лойиҳалар,
Янги иш, фабрикалар,
Тоғ терилган олмалар,
Президент келар эмиш...

Раҳбарлар турнақатор,
Юришибди бир қатор,
Юзида жиддий хатар,
Президент келар эмиш...

"Маршрутлар" тайёрланди,
"Объектлар" тайёрланди,
"Учрашув" тайёрланди,
Президент келар эмиш...

Фақатгина оддий халқ,
Ҳеч нарсани билмайди,
Мансабдорлар фақат ҳақ,
Президент келар эмиш...

Ҳамма жойда ваҳима,
Тилларда битта нағма,
Чеккада турма, қара!
Президент келар эмиш...

Бирдан тўхтади ишлар,
Барча ёқасин тишлар,
Енгил нафас олишлар -
Президент келмас эмиш...

Чала қолди йўллар ҳам,
Қуриб кетди гуллар ҳам,
Қуриб кетди арчалар,
Президент келмас эмиш...

Эски ҳаммом, эски тоз,
Мансабдорлар жуда чоғ,
Оддий халқ яна гумроҳ,
Президент келмас эмиш...

Президентдан шундай қўрқув,
Аллоҳни лек билмайсан,
Ўнгу чапга боқмасдан,
Халқни тинмай талайсан!

Агар Аллоҳ дилингда,
Бўлганида қанийди.
Президент келишидан -
Қўрқмасдинг аниқ эди!

Тўғри ишлаган инсон,
Юртини гуллатармиш!
Эгрида фақат бир гап -
Президент келар эмиш...

Зиё Зуҳал

@ziyo_zuhal