Yaasin.uz

2024, men sendan nafratlanmayman. Lekin sen oson yil bo’lmading. Hayotimni qiyinchiliklar, sinovlar va saboqlar bilan to’ldirding. Menga hayot bir lahzada butunlay o'zgarib ketishi mumkinligini ko'rsatding. Lekin eng muhimi, salomatlikning, xoh u jismoniy yo ruhiy bo'lsin, qadriga yetish kerakligini tushuntirding.

Sen har bir savolga darhol javob topish oson emasligini, har bir yakun esa yo’qotish emasligini o’rgatding. Yiqilish hammasi tugadi degani emas ekan. Ba’zan, bu hayotning yangi imkonlar yaratishi uchun kerak bo’lar ekan.

Yo‘q, men sendan nafratlanmayman. Lekin hali kechira olmayman ham. Sen meni yuzlashishni xohlamagan haqiqatlar tomon olib kelding. Hali his qilishga tayyor bo‘lmagan yo‘qotishlarni boshdan kechirdim. Menga hali bitmagan jarohatlar va tushunarsiz bo‘laklar qoldirding. Yorug‘lik hali ko‘rinmayapti. Qorong'ulik.

Lekin, ehtimol, sening asosiy darsing shu edi: sen meni tuzatish yoki qutqarish uchun kelmading. Sen hayotning oldindan aytib bo’lmas, shafqatsiz va adolatli ekanligini tushuntirish uchun kelding. Meni qayta qurib bermading. Faqat o’zimni qayta qurish tanlovi bilan yolg’iz qoldirding.

Rahmat senga, 2024. Sen oson bo‘lmading, lekin zarur eding.

@YaasinUz 🖤

Odatda ko'pchilik yil so'nggida kelasi yil uchun rejalar tuzadi. O'zgarmoqchi bo'ladi. Ko'p holatlarda bu qisqa davom etadigan motivatsiya ta'sirida bo'lganligi sababli yil oxirigacha tuzilgan rejalarning katta qismi bajarilmay qolib ketadi.

Buning eng yaxshi yechimi realistik, bajarishga ko'zingiz yetadigan rejalar tuzish va davomiylikdir. O'zgarish bittada amalga oshmaydi, lekin toma-toma ko'l bo'lur )

Siz ham rejalar tuzib qo'ygandursiz-a, allaqachon?)

@YaasinUz

Shunchaki tushunmayman, tushuna olmayman.

Insonga bu umr, bu hayot bir martagina beriladi. Shu birgina umrni yolg'onlarsiz, marazliklarsiz, g'irromliklarsiz yashash nahotki qiyin?

- Nega bir inson boshqasining haqqini yeyishi kerak?

- Nega bir inson boshqasining yillar umrini o'g'rilashi kerak?

- Nega bir inson o'z shaxsiy manfaatlari yo'lida boshqalarning hayoti bilan o'ynashishi kerak?

Nahotki hayotni go'zal yashab o'tish shunchalar qiyin?

Savollar ko'p, ammo...

@YaasinUz

15-dekabr.

Bugun bir narsaga amin bo‘ldim: inson o‘z kunini tartibga solmas ekan, hayotida baraka bo'lmaydi. Intizom muhim. Keyin esa o‘yladim: kunni tartiblab olishni nimadan boshlash kerak?

Menimcha, buning uchun eng yaxshi qadam – uyqu rejimini tartibga keltirish. Har kuni erta yotib, ertalab barvaqt turish foydali. Avvaliga ko'nikish oson bo'lmaydi, oson bo‘lishi shart ham emas, lekin uddasidan chiqish muhim.

Shaxsan o'zim uchun, uyqu limitini 6 soat 30 daqiqa qilib chegaralamoqchiman. Mavzuga oid yana izlanishlar olib boraman, foydali ma'lumotlarni ulashib ham turarman balki.

Avval kunimizni, so'ngra hayotimizni tartibga solamizmi?
Birgamisiz?)

@YaasinUz

Bugun hali ertaga hammasi yaxshi bo‘lib ketadi deb e'tiqod qilib yashayotganimga o‘n yil bo‘libdi!

Fyodor Dostoevskiy

@YaasinUz 🖤

Hech bir uchrashuv tasodifiy emas. Qarshimizga chiqqan har bir insonning o‘ziga xos sababi bor. Ba’zan ular bizga do‘st bo‘lib kirishadi, ba’zan esa bizga hayot sabog‘i berishadi.

@YaasinUz

Айтилиши керак бўлган гаплар кўп!
Айтилмаслиги кераги ундан хам кўп!

Usoma V. | @YaasinUz

20-25 ёшларда мусофир юртга кетиш ҳудди ўлишдек гап. Сен бошқа бир мамлакатга кетасан, маҳалла-кўй, синфдошлар, танишлар сени нари борса бир ҳафта сўрашади ёки эслашади.

Шу бир ҳафта давомида сени четга кетганингни ҳамма билади, фалончи четга кетибди деб гапиришади, ундан кейин эса ҳеч ким эсламайди. Ҳамма ўз ташвиши билан ўзи овора бўлади…

Сен эса, ўзга юртда ҳотираларинг билан яшайверасан. 5 балким 10 йилдан кейин Ватанга қайтасан. Бу орада сендан 5 ё 10 ёш кичик болалар етилган, энди уларни даври бошланган бўлади.

Сен 10 йил олдинги шижоатинг билан қолиб кетгансан, кўчаларни тўлдириб юргинг, ёшлик даврини, давронини сургинг келади, чунки айни шу даврон суриш вақтида “сургансан”, лекин энди сени даврингни бошқалар эгаллаган. Сен кетишингдан олдинги ёш-ёш “чурвақалар” забт этган.

Сени тенгқурларинг, синфдошларинг ҳаммаси уйлик-жойлик, оилалик, энди сен уларга ҳам қўшила олмайсан, энди уларни ўз муҳити, қўрғони бор…

Сен энди на у дунёдасан, на бу дунёдасан…
Қайсидир орзу ҳаваслар деб, ёшлигингни йўқотдинг.
Сени, шу ерда қолганлар ҳавас қиладиган ҳамма нарсанг бор, лекин улар совуриб юборган, ёшлик, завқ-шавқ сенда йўқ…

Энди сен улғайганингни ҳис қиласан, ҳаётга бошқа кўз билан қарайсан. Ўткинчи ошна-оғайнигарчилик, бир кўришда ёқтириш каби туйғулар шунчаки қуруқ сафсата, аслида ҳаёт сен кўриб турганингдан кўра шафқатсизроқ, сен англаганингдан кўра теранроқ эканини тушунасан…

Shoxruh Mirzo | @YaasinUz